Адыгеим и ЛIышъхьэу Къум­пIыл Мурат АР-м иминистрэхэм я Кабинет изэ­хэсыгъо зэрищагъ. Илъэсэу икIыгъэм икIэух шъхьаIэхэм, тапэкIэ зэшIуахын фаехэм, IофшIэнхэр зэрэкIощтхэм мыщ щатегущыIагъэх.

Республикэм и ЛIышъхьэ анаIэ зытыраригъэдзагъэр Урысыем и Президентэу Владимир Путиныр кIэщакIо зыфэ­хъугъэ стратегическэ лъэны­къохэм япхырыщын, джащ фэдэу къэралыгъо программэхэмрэ лъэпкъ проектхэмрэ къыдалъы­тэхэрэм алъыкIэгъэхьэгъэным яIофыгъохэр ары.

АР-м иминистрэхэм я Кабинет и Тхьаматэу КIэрэщэ Анзаур къызэриIуагъэмкIэ, 2023-рэ илъэсым лъэпкъ проектхэмрэ къэралыгъо программэхэмрэ къыдалъытэрэ Iофтхьабзэхэм Адыгеим сомэ миллиард 24,6-рэ апэIуигъэхьагъ. ПэшIоры­гъэшъэу къызэрэрадзагъэмкIэ, федеральнэ мылъкур аIэ къызэрэрагъэхьагъэмкIэ (процент 99,8-рэ) Къыблэ федеральнэ шъолъырым хэхьэрэ субъект пэ­рытхэм Адыгеир ахэфагъ. Ащ къикIырэр Iофтхьабзэу рахъу­хьагъэхэмрэ социальнэ, гъогу ыкIи инженер инфраструктурэм изытет нахьышIу шIыгъэнымрэ мылъкур зэрапэIухьагъэр ары. ПстэумкIи 2023-рэ илъэсым фе­деральнэ къэкIуапIэхэр къыз­фагъэфедэхэзэ республикэм псэолъэшIын, зэтегъэпсыхьан, капитальнэ гъэцэкIэжьын Iофыбэ щызэшIуахыгъ, псэолъэ 88-рэ сетьхэм апашIагъ. 2024-рэ илъэ­сым псэолъэ 60-мэ япхыгъэ IофшIэнхэр агъэнэфагъэх.

Ащ нэмыкIэу проектышхохэм ягъэцэкIэн макIо — гъэпсэфыпIэ чIыпIэу «Лэгъонакъэрэ» промышленнэ паркэу «Инэмрэ» ящыкIэгъэ инфраструктурэр ашIы.

Лъэпкъ проектым тегъэпсы­хьагъэу 2024-рэ илъэсым гъогоу агъэцэкIэжьын фаехэмкIэ пла­нэу рахъухьэгъагъэр непэ ехъу­лIэу республикэм щагъэцэкIэгъах. ЧIыопсым изытет гумэкIыгъо гъэнэфагъэхэр къыздехьых нахь мышIэми, псэу­пIэ-коммунальнэ хъызмэтым зыпкъ итэу Iоф зэришIэрэм къыкIимычыным къулыкъу пстэуми анаIэ тырагъэты. АР-м и ЛIы­шъхьэ гъогухэм афэгъэзэгъэ къулыкъухэм осыр лъэшэу къе­сэу Iумыл хъумэ яIофшIэн зыпкъ итэу зэхэщагъэ хъуным джыри нахь лъэшэу анаIэ тырагъэтын зэрэфаер къыIуагъ. Коммунальнэ авариехэу къэ­хъун ылъэкIыщтхэр щыгъэзыегъэнхэмкIэ къулыкъу пстэуми зэ­дегъэштэныгъэ ахэлъэу япшъэ­рылъхэр агъэцэкIэнхэ фае.

Программэу «Къуаджэхэм зэдиштэу хэхъоныгъэ ягъэшIыгъэныр» зыфиIорэм тегъэпсы­хьагъэу бэ зэшIуахырэр. Федеральнэ гупчэм иIэпыIэгъу хэ-лъэу фельдшер-мамыку IэзапIэхэр, культурэм иунэхэр ашIых ыкIи агъэцэкIэжьых, псы ыкIи газрыкIуапIэхэр, гъогухэр ашIых, зэтырагъэпсыхьэх, цIыфхэм псэукIэ амалэу яIэр нахьышIу шIыгъэнымкIэ, чIыпIэхэр зэтегъэпсыхьэгъэнхэмкIэ Iофтхьабзэхэр зэшIохыгъэ мэхъух. Къуаджэхэм зэдиштэу хэхъоныгъэ ашIыным ипрограммэ Адыгеим зэрэщыпхыращырэм осэшIу къыфишIыгъ УФ-м мэкъу-мэщымкIэ иминистрэ иапэрэ гуадзэу Оксана Лут шэкIогъум республикэм къызэкIом.

«Зэхэугъоягъэу къэпIон хъумэ, илъэсэу икIыгъэм бэ зэшIотхыгъэр, шъолъырым ихэ­хъоныгъэ ипсынкIагъэ къэд­гъэнэжьын тлъэкIыгъ. ЦIыфхэми янэрылъэгъух а зэхъокIыныгъэ­шIухэр. Джыри бэ Iофэу къытпыщылъыр, нахь кIэухышIухэм тыкъызэрафэкIощтым тынаIэ тетэгъэты. Джащ пае илъэсыр къызихьагъэм къыщыублагъэу зэкIэми нахь чаныгъэ тхэлъэу итхъухьэгъэ проектхэр зэшIохыгъэ зэрэхъущтхэм тыдэлэжьэн фае. Iофхэм язэшIохынкIэ теурыкIуагъэ къызыхэшъумыгъаф. Владимир Путиным къышIыгъэ пшъэрылъхэмрэ кIэщакIо зы­фэхъугъэ стратегическэ Iоф­тхьабзэхэмрэ щыIэныгъэм щы­пхырыщыгъэнхэм пае анахь мэхьанэшхо зиIэхэм язэшIохын шъунаIэ тежъугъэт», — къы­Iуагъ КъумпIыл Мурат.

АР-м и ЛIышъхьэ цIыфхэм зэдэгущыIэгъу занкIэхэр адыри­Iэнхэ зэрэфаер, цIыфхэр зыгъэ­гумэкIырэ IофыгъохэмкIэ ренэу Iофтхьэбзэ гъэнэфагъэхэр зе­хьэгъэнхэ, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм IэпыIэгъу ятыгъэнымкIэ хэти къытефэрэр зэригъэцэкIэн фаер къыIуагъ.

«Илъэсэу икIыгъэм зэдэгущы­Iэгъу занкIэу цIыфхэм адысиIагъэм къыгъэлъэгъуагъ анахьыбэу зыгъэгумэкIырэ Iофыгъохэр щыIэкIэ-псэукIэу яIэм зэрепхыгъэхэр. Ахэр чIыпIэхэм, муници­палитетхэм ащызэшIошъухынхэ шъулъэкIыщт. «Линие занкIэм» икIэуххэмкIэ пшъэрылъэу афэс­шIыгъэхэр гъэцэкIагъэ зэрэ­хъухэрэм ренэу сынаIэ тесэ­гъэты ыкIи тезгъэтыщт. ТшIэрэр зэкIэ цIыфхэм апай», — къыIуагъ КъумпIыл Мурат.