КIымэфэ лъэхъаным зэпахырэ узхэм нахь зыкъаIэ­тэу ха­бзэ. Ащ елъытыгъэу республикэм эпидемиологием изытет ты­щыкIэупчIагъ щэфакIохэм яфитыныгъэхэр ыкIи цIыфым игупсэ­фыныгъэ къэухъумэгъэнхэмкIэ Федеральнэ къулыкъум и Гъэ­Iоры­шIапIэу Адыгэ Республикэм щыIэм.

[caption id="attachment_144129" align="aligncenter" width="800"] А. Лаутеншлегер[/caption]

Эпидемиологие лъыплъэнымкIэ отделым ипащэ игуадзэу Iэшъынэ Нэфсэт къызэриIуа­гъэмкIэ, къихьэгъэ илъэсым ия 2-рэ тхьамафэ изэфэхьысыжьхэм уахаплъэмэ, пэтхъу-Iутхъур ыкIи гриппыр къызэузыхэрэм япчъагъэ хэхъуагъ, ау эпидемие шапхъэу агъэнэфагъэм ар блэкIырэп.

— Тхьамафэ къэс пчъагъэхэм талъэплъэ. 2024-рэ илъэсым ия 2-рэ тхьамафэ пэтхъу-Iутхъур (ОРВИ) ыкIи гриппыр къызэузыгъэ нэбгырэ 1400-м ехъурэ агъэунэфыгъ. А пчъагъэр апэрэ тхьамафэм едгъапшэрэп, сыда пIомэ мэфэкI зыгъэпсэфыгъохэм къахэкIэу цIыфхэм медицинэ учреждениехэм зафагъэзэнэу хъугъэп. Ау икIыгъэ илъэсым ия 52-рэ тхьамафэ ебгъапшэмэ, процент 13-кIэ нахьыбэ хъугъэ. ТхьамафэмкIэ эпидемие шап­хъэу агъэнэфагъэм ар процент 18-кIэ нахь макI, — хигъэунэфыкIыгъ Iэшъынэ Нэфсэт.

Джащ фэдэу тигущыIэгъу къызэриIуагъэмкIэ, къалэу Мые­къуапэ пэтхъу-Iутхъур къызэузы­гъэу нэбгырэ 360-м ехъу ща­тхыгъ, икIыгъэ илъэсым ия 52-рэ тхьамафэ ебгъапшэмэ, процент 32-кIэ нахьыбэ хъугъэ, эпидемием ишапхъэ проценти 10-кIэ нахь ар макI.

Сымэджэщым къыщамыу­бытыгъэ тхьабыл плъыр-стыр (пневмониер) къызэузыхэрэм япчъагъи проценти 10-кIэ зыкъыIэтыгъ. КъекIокIырэ зэпахырэ узхэм коронавирусри ахэт. Тызхэт илъэсым ия 2-рэ тхьамафэ ар нэбгыри 9-мэ къахагъэщыгъ.

Зигугъу къэтшIырэ пIалъэм гриппыр къызэузыгъэу респуб­ликэм щатхыгъэр нэбгырэ 20 мэхъу, къалэу Мыекъуапэ —нэбгыри 10.

Зэпахырэ узхэм апкъ къикIыкIэ сымэджэщым нэбгырэ 88-рэ чIагъэгъолъхьагъ.

— Лабораторнэ уплъэкIунхэм къызэрагъэлъэгъуагъэмкIэ, республикэм щызекIорэр на­хьыбэрэмкIэ «свиной гриппэу H1N1-кIэ» заджэхэрэр ыкIи ри­но­вирусхэр, аденовирусхэр, парагриппым ыкIи Rs-м явирусхэр ары, — къыIуагъ Iэ­шъынэ Нэфсэт.

ЩэфакIохэм яфитыныгъэхэр ыкIи цIыфым игупсэфыныгъэ къэухъумэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм илIы­кIо цIыфхэм зафегъазэ зэ­пахырэ узхэм защаухъумэнэу. Зэпахырэ узхэр къызэузыхэрэм япчъагъэ хэхъуагъ нахь мышIэми, джыри гумэкIыгъо дэдэу Iофым эпидемиологхэр хаплъэ­хэрэп, ау цIыфхэм ищыкIэгъэ пэшIорыгъэшъ Iофтхьабзэхэр зэрахьанэу, япсауныгъэ нахь фэсакъынхэу къяджэх. Жьы къабзэм мэхьанэ иI. Унэ кIоцI­хэм бэрэ жьы къабзэ арыбгъэ­хьан фае. Пэтхъу-Iутхъу нэша­нэхэр яIэ зыхъукIэ медикхэм зафагъэзэн зэрэфаер агу къагъэкIыжьы.

Iэшъынэ Сусан.