Мыекъопэ къэлэ администрацием физическэ культурэмкIэ ыкIи спортымкIэ и Комитет кIэщакIо зыфэхъугъэ Iофтхьабзэу «Жэжъые биатлоныр» ятфэнэрэу рагъэкIокIыгъ.

Зэнэкъокъум хэлэжьэнхэу команди 137-мэ зарагъэтхыгъагъ, ау къекIолIагъэр нахь макI. Шэмбэт пчэдыжьым зэрэчъыIагъэм зырызхэр ыгъэщынэгъэнхэ фае. Жэжъые биатлоныр зыгу рихьы­хэрэр республикэ шахмат клубым дэжь щызэрэугъоигъэх. КIэлэцIыкIу командэ 31-рэ, бзылъфыгъэхэр ыкIи хъулъфыгъэхэр зыхэтхэр, джащ фэдэу зэхэпхъагъэхэр текIоныгъэм фэбэнагъэх.

Зэнэкъокъум хэлэжьагъэхэм пшъэрылъ шъхьаIэу яIагъэр гъэпщыгъэ жэжъыехэм арысхэу метрэ 200 къачъыныр ыкIи гъогогъуи 5-рэ ос IашкIэкIэ щэрыонхэр ары. БлэукIыхэрэм тазыр атыралъхьэщтыгъ.

КIэлэцIыкIу командэхэм зэ­нэкъокъур къызэIуахыгъ. Зэфэ­хьысыжьхэм къызэрагъэлъэгъуагъэмкIэ, апэрэ чIыпIэр къыда-хыгъ Симашкевичхэм яунагъо, ар къэ­­зыгъэлъэгъуагъэхэр зэшхэу Лев ыкIи Борис. Бзылъфыгъэхэм язэнэкъокъу командитIумэ зэфэдэ уахътэ къыщагъэлъэгъуагъ. Ащ къыхэкIыкIэ ахэр икIэрыкIэу зэрагъэнэкъокъужьыгъэх, текIоныгъэр къыдэзыхыгъэр Татьяна ыкIи Варвара Олейниковхэм якомандэу «Zа sport» зыфиIорэр ары. Хъулъ­фыгъэхэмкIэ апэрэ чIыпIэр къыдэзыхыгъэр командэу «Щагъдый», ащ хэтыгъэх Константин ыкIи Дмитрий Логиновхэр. Зэхэпхъэгъэ командэхэм язэнэкъокъу анахь щылъэшыгъ ыкIи рекорд ыгъэуцугъ «Синхронисты» зыфиIорэм, ащ хэтыгъэх Андрей ыкIи Софья Тришинхэр.

СыхьатиплI фэдизрэ кIогъэ Iоф­тхьабзэр гъэшIэгъонэу рекIо­кIыгъ. Ащ хэлэжьэгъэ нэбгырэ пэпчъ диплом ратыгъ, хагъэунэфы­кIырэ чIыпIэхэр зыубытыгъэ­хэм медальхэр, текIоныгъэр къы­дэзыхыгъэхэм а пстэуми кубокхэр ягъусэхэу афагъэшъошагъэх. Джащ фэдэу нэбгырэ 20-мэ джэголъэ шъабэхэр шIухьафтынэу аратыгъэх. Ау пстэуми анахь шъхьаIэр ахэм япсауныгъэ зэ­рагъэпытагъэр, зэрэчэфыгъэхэр ары. ­