Бюджет чIыпIэхэр къэнэфагъэх
Урысыем шIэныгъэмрэ апшъэрэ гъэсэныгъэмрэкIэ и Министерствэ бюджет чIыпIэхэр апшъэрэ еджапIэхэм ыкIи шIэныгъэ организациехэм атегощэгъэнхэмкIэ зэIухыгъэ зэнэкъокъоу 2024 — 2025-рэ илъэсхэм ателъытагъэм изэфэхьысыжьхэр ышIыгъэх. Ащ къыдыхэлъытагъэу Мыекъопэ къэралыгъо технологическэ университетым бюджет чIыпIэ 1126-рэ къыратыгъ.
Тиапшъэрэ еджапIэ учIэхьанымкIэ гъэрекIо пчъагъэу иIагъэр къэнэжьыгъ, ау гъэсэныгъэ программэ зэфэшъхьафхэмкIэ чIыпIэ пчъагъэу иIэщтыр зэблэхъугъ. Непэрэ экономикэм къыгъэнэфэрэ шапхъэхэм планыр адештэ.
Мыекъопэ къэралыгъо технологическэ университетым къыфагъэнэфэгъэ бюджет чIыпIэхэр нахьыбэрэмкIэ зытырагощагъэхэр инженернэ, техническэ ыкIи медицинэ лъэныкъохэр ары. Джащ фэдэу анаIэ тырагъэтыгъ цифрэ шIыкIэм тет экономикэм фэгъэзэгъэ IофшIэнхэм ягъэхьазырын. Непэрэ бэдзэрыр анахьэу зыщыкIэрэр инновационнэ IT Iофыгъохэр, импортыр зэрэзэблахъурэ цифрэ Iэмэ-псымэхэр ыкIи ахэм ягъэцэкIэн ары. Ахэм якадрэхэр гъэхьазырыгъэным телъытэгъэ бюджет чIыпIэхэр бакалавриатыми, специалитетыми, магистратурэми къафыхахыгъэх.
Апэрэу бюджет чIыпIэхэр къаратыгъэх ординатурэм епхыгъэ сэнэхьатыкIэхэм, анестезиолог-реаниматологхэм ыкIи оториноларингологхэм. Мы лъэныкъомкIэ 2022 — 2023-рэ илъэсхэм Мыекъопэ технологическэ университетым щытхъу хэлъэу лицензированиер ыкIугъ.
Бюджет чIыпIэ пчъагъэу бакалавриатым, специалитетым ыкIи магистратурэм ателъытагъэхэм япчъагъэ зыфэдэщтыр щылэ мазэм и 20-м нэс хэушъхьафыкIыгъэ сайтым къырагъэхьащт. Апшъэрэ еджапIэм учIэхьанымкIэ ищыкIэгъэщт тхьапэхэм яштэн мэзаем и 1-м къыщегъэжьагъэу аублэщт.
Урысыем шIэныгъэмрэ апшъэрэ гъэсэныгъэмрэкIэ и Министерствэ 2024 — 2025-рэ илъэсхэм бюджет чIыпIэ мин 620,5-рэ апшъэрэ еджапIэхэм атыригощагъ. КъызэраIуагъэмкIэ, ащ ипроцент 70-р шъолъырхэм Iоф ащызышIэрэ гъэсэныгъэм иорганизациехэм яех.