Адыгеим и ЛIышъхьэу КъумпIыл Мурат Урысые Федерацием ипрокуратурэ и Мафэ фэшI республикэм ипрокуратурэ икъулыкъушIэхэм ямэфкIкIэ афэгушIуагъ. Урысыем ипрокуратурэ зызэхащагъэр мыгъэ илъэс 302-рэ хъугъэ.

[caption id="attachment_144064" align="aligncenter" width="716"] А. Гусев[/caption]

Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и МВд, УФ-м и Следственнэ комитет и Следственнэ гъэIорышIапIэу Адыгэ Республикэм щыIэм, щынэгъончъэнымкIэ Федеральнэ къулыкъум и ГъэIорышIапIэу Адыгэ Республикэм щыIэм, АР-м и Апшъэрэ хьыкум япащэхэр, прокуратурэм икъулыкъухэм яветеранхэр ыкIи нэмыкIхэр. АР-м ипрокурорэу Игорь Шевченкэм зэIукIэр зэрищагъ. ПэIудзыгъэ шIыкIэм тетэу УФ-м и Генеральнэ прокурорэу Игорь Красновыр республикэм ипрокуратурэ иIофышIэхэм къафэгушIуагъ. Адыгеим ипрокуратурэ гъэхъагъэу ышIыгъэхэм къатегущыIэзэ, федеральнэ ведомствэм ипащэ къыгъэнэфагъэх республикэм хэбзэгъэуцугъэр щамыукъонымкIэ пшъэ­рылъэу щытхэр.

ЗэIукIэм хэлажьэхэрэм закъыфигъа­зэзэ Адыгеим и ЛIышъхьэ къызэриIуагъэмкIэ, прокуратурэр къэралыгъом ицыхьэшIэгъу кIэгъэкъонэу щыт, цIыфхэм яфитыныгъэхэмрэ яшъхьафитыныгъэрэ къеухъумэх.

Республикэм и ЛIышъхьэ джащ фэдэу къызэрэхигъэщыгъэмкIэ, шъолъырым социальнэ лъэныкъомкIэ зыпкъитыныгъэ илъыныр бэкIэ зэлъытыгъэхэм ащыщ прокурорскэ надзорыр щыIэныр. Ащ амал къеты анахь лъэныкъо шъхьаIэхэмкIэ хэхъоныгъэ ашIынэу.

«Анахьэу шъунаIэ зытежъугъэтын фаер хэбзэгъэуцугъэу щыIэр икъоу гъэ­цэкIагъэ хъуныр, республикэм щыпсэурэ цIыфхэм яфитыныгъэхэр укъуагъэ мы­хъун­хэр, ахэр зыгъэгумэкIырэ Iофыгъо­хэм икъоу адэлэжьэгъэныр ары. ТичIыпIэгъухэу хэушъхьафыкIыгъэ дзэ операцием ишъолъыр зипшъэрылъхэр щызгъэ­цакIэхэрэм яфитыныгъэхэр укъуагъэ мыхъунхэм пшъэдэкIыжьыныгъэ ин хэлъэу тынаIэ тедгъэтын фае», — къы­Iуагъ КъумпIыл Мурат.

Адыгеим и ЛIышъхьэ анахьэу анаIэ зытыраригъэдзагъэр хэбзэгъэуцугъэр ыкIи цIыфхэм яфитыныгъэхэр укъуагъэ хъугъэхэу къызыхагъэщыкIэ, ащ лъыпытэу ищыкIэгъэ Iофхьабзэхэр зэрахьанхэ зэрэфаер ары. ЗэкIэми зэдытипшъэ­рылъэу щытхэм язэшIохынкIэ зэдегъэштэныгъэ тхэлъыным, анахьэу общественнэ мэхьанэ зиIэ Iофыгъохэм язэшIохынкIэ тIэ зэкIэдзагъэу тызэдэлэжьэн зэрэфаер ащ къыхигъэщыгъ.

«Къэралыгъом ипащэу Владимир Путиным къызэрэхигъэщыгъэмкIэ, анахь мэхьанэ зиIэр тицIыфхэр законым къы­зэриухъумэхэрэр икъоу зэхашIэныр, хэбзэгъэуцугъэм икъэухъумэн ежь къэралыгъоми ренэу ынаIэ зэрэтыригъэтын фаер ары. Джыри зэ къэсэIо: респуб­ликэм зыпкъитыныгъэ хэлъэу хэхъоныгъэ ышIынымкIэ ыкIи цIыфхэм ящыIакIэ нахь зыкъыIэтынымкIэ апшъэрэ мэхьанэ зиIэр правовой лъэныкъомкIэ Iофыгъоу къэуцухэрэр цыхьэшIэгъоу зэшIохыгъэ хъунхэр ары», — къыIуагъ КъумпIыл Мурат.

Урысыем и Президент ихэдзынхэу мы илъэсым гъэтхапэм рекIокIыщтхэм языфэгъэхьазырын зыщыкIорэ лъэхъаным пшъэдэкIыжь ин хэлъэу прокуратурэм ипшъэрылъхэр ыгъэцэкIэнхэ зэрэфаем мэхьанэшхо зэриIэр респуб­ликэм и ЛIышъхьэ къыхигъэщыгъ.

Урысые Федерацием ипрокуратурэ иIофышIэхэм я Мафэ ехъулIэу прокуратурэм ипащэхэм, иIофышIэхэм ыкIи иветеранхэм КъумпIыл Мурат къызафэгушIо нэужым къыIуагъ Адыгеим ипрокуратурэ икъулыкъухэм тапэкIи яIоф­шIэнкIэ хэбзэ шIагъоу щыIэ хъугъэхэр зэрэлъагъэкIотэщтхэм, гуетыныгъэ фыряIэу обществэм зэрэфэлэжьэщтхэм ицыхьэ зэрэтелъыр.

Iофтхьабзэм къыщыгущыIагъэх АР-м ипрокурорэу Игорь Шевченкэр, АР-м и Къэралыгъо Совет – Хасэм и Тхьаматэу Владимир Нарожнэр, АР-м и Апшъэрэ хьыкум и Тхьаматэу Шумэн Байзэт. ЗиIофшIэнкIэ гъэхъэгъэшхохэр зышIыгъэ­хэм АР-м и ЛIышъхьэ ыкIи АР-м и Къэралыгъо Совет – Хасэм ярэзэныгъэ тхылъхэр, джащ фэдэу ведомствэ шIухьафтынхэр къаратыгъэх. АР-м и ЛIышъхьэ ипресс-къулыкъу