Урысыем печатым и Мафэ ехъулIэу, организациеу «Дом Шварца» иIофышIэхэм АР-м и Лъэпкъ тхылъеджапIэ «Мыекъопэ гъэзетым» 1910 – 1915-рэ илъэсхэм иномерэу къыдэкIыгъэхэм атехыгъэу яэлектрон шъуашэм илъхэр къыратыжьыгъ. Революцием ыпэкIэ къыдэкIыщтыгъэ гъэзетыр цифрэ шIыкIэм къыгъэкIэжьыгъ.

«Майкопская газета» зыфиIорэр тикъэлэ шъхьаIэ иапэрэ хэутыгъэ къыдэкIыгъоу щытыгъ. Ащ иапэрэ номер 1910-рэ илъэсым бэдзэогъум и 11-м къыдэкIыгъагъ. Гъэзетым иапэрэ редакторыгъэр А. И. Вознесенкэр ары.

Гъэзетым соми 6-кIэ укIэтхэн плъэ­кIыщтыгъ е чапычищкIэ ащэщтыгъ. «Мыекъопэ гъэзетыр» тхьамафэм зэ къыдэкIыщтыгъ, етIанэ мы Iофыр нахь зызэтеуцом, щэ къыдэкIы хъугъагъ. 1911-м щегъэжьагъэу гъэзетыр мафэ къэс къыхаутыщтыгъ. ЩыIэныгъэм щы­хъурэ-щышIэрэ къэбар зэфэшъхьафыбэ ащ итыгъ. Анахьэу бэу къихьэщтыгъэхэр фельетонхэр ары.

Адыгэ Республикэм гъэзетым иномерхэр ибгъотэжьынхэу щытыгъэп, ахэр къызыхэнагъэхэр Урысые къэралыгъо тхылъеджапIэу Москва дэтым ифонд ары. «Мыекъопэ гъэзетыр» цифрэ шIыкIэм тетэу гъэкIэжьыгъэнымкIэ анахьэу зишIуагъэ къэкIуагъэр «Дом Шварца» пхырищырэ проектэу «Майкопцы: возвращенные имена» зыфиIорэр ары. РГБ-м репрографиемкIэ иотдел гъэзетым инэкIубгъо мини 5-м нахьыбэ цифрэ шIыкIэм ригъэкIугъ. Гъэзетэу «Майкопская газета» зыфиIорэм ятIонэрэ щыIэныгъэ фэшIыгъэныр зишIушIагъэхэр «Дом Шварца», Урысыем и Къэралыгъо тхылъеджапIэ, АР-м культурэмкIэ и Министерствэрэ Адыгеим зекIонымрэ зыгъэпсэфыпIэхэмрэкIэ и Комитетрэ.

Зигъо Iофтхьабзэм – гъэзетым илъэтегъэуцо хэлэжьагъэх АР-м культурэмкIэ иминистрэ игуа­дзэу Кушъу Светланэ, АКъУ-м тарихъымкIэ ифакультет идеканэу ПэкIэшхо Нурбый, «Дом Шварца» ипэщэ чанэу Надежда Суховаяр, ныбжьыкIэхэр ыкIи Лъэпкъ тхылъеджапIэм иIофышIэхэр.

Мамырыкъо Нуриет. Сурэтхэр: А. Лаутеншлегер.