Щылэ мазэм и 13-р урысые печатым и Маф
Адыгэ Республикэм ижурналистхэу, къэбар жъугъэм иамалхэм Iоф ащызышIэхэу лъытэныгъэ зыфэтшIыхэрэр! Урысые печатым и Мафэ фэшI тышъуфэгушIо!
Журналистикэр — сэнэхьат къодыеп, цIыфыр ыгукIэ лъэшэу ащ фэщагъэу щытын, IэпэIэсэныгъэ хэлъын, къэбарыр зытетым тетэу цIыфхэм алъигъэIэсын, творческэ екIолIакIэ Iофым фыриIэн, гум къинэжьырэ тхыгъэ гъэшIэгъонхэр ыгъэхьазырын фае.
Джырэ лъэхъаным къэбарлъыгъэIэс амалхэр ары нэбгырэ миллион пчъагъэмэ къэбарыр аIэкIэзгъахьэрэр, обществэм ищыIэныгъэкIэ ахэм мэхьанэшхо яI. Ахэм яшIуагъэкIэ хъугъэ-шIагъэхэм нэIуасэ тафэхъу, уасэ афэтэшIышъу, еплъыкIэ зэфэшъхьафхэм ащыгъуазэ тэхъу.
Журналистхэм яIоф екIолIакIэу фыряIэм, щыIэныгъэм къыхэхъухьэхэрэр къызэрагурыIохэрэм бэкIэ ялъытыгъ цIыф жъугъэхэм яеплъыкIэ-екIолIакIэхэри зыфэдэщтхэр, обществэм культурэмкIи, нэмыкI лъэныкъохэмкIи нахь зытыриубытэн ылъэкIыщт шэпхъэ гъэнэфагъэу щыIэхэм цIыфыр арыгъозэным иамали ащ къыреты.
Адыгеим ижурналистхэм яIэпэIэсэныгъэ, республикэм къихъухьэхэрэм, ащ ихэхъоныгъэхэм агу етыгъэу цIыфхэр нэIуасэ зэрафашIыщтхэм, яхъупхъэгъэ- чаныгъэ тапэкIи къызэрэкIимычыщтым тицыхьэ телъ.
Ныбджэгъу лъапIэхэр, тхыгъэ гъэшIэгъонхэр ыкIи зигъоу щытхэр цIыфхэм зэралъыжъугъэIэсырэм пае инэу тызэрэшъуфэразэр къэтэIо. Шъуитворческэ гуетыныгъэ къыкIимычэу, псауныгъэ пытэ, щыIэкIэшIу шъуиIэу, Адыгеимрэ Урысыемрэ яфедэ зыхэлъ IофшIэным гъэхъэгъакIэхэр щышъушIынхэу шъуфэтэIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр