ДзэкIолIхэм ягупсэхэм адэжь
АР-м и ЛIышъхьэу КъумпIыл Мурат Тэхъутэмыкъое районымкIэ псэупIэу Яблоновскэм зэкIом, хэушъхьафыкIыгъэ дзэ операцием хэлажьэхэзэ фэхыгъэхэми, джыдэдэм зидзэкIолI пшъэрылъ зыгъэцакIэхэрэми яунагъохэм арыхьагъ.
[caption id="attachment_144051" align="aligncenter" width="800"] А. Гусев[/caption]
Республикэм ипащэ ахэм арысхэм адэгущыIагъ, щыкIагъэу яIэхэр зэригъэшIагъэх, шIухьафтынхэр аритыгъэх, ИлъэсыкIэмкIэ ыкIи РождествомкIэ афэгушIуагъ. ХэушъхьафыкIыгъэ дзэ операцием хэлажьэхэрэм якIэлэцIыкIухэм апае илъэсыкIэ шIухьафтынхэр шъхьафэу агъэхьазырыгъагъэх.
Адыгеим и ЛIышъхьэ апэрэп старшэ лейтенантэу, Урысые Федерацием и ЛIыхъужъэу Заволянский Валерий Иван ыкъом янэ-ятэхэм заIукIэрэр. Шъугу къэтэгъэкIыжьы Валерий Рязань дэт апшъэрэ дзэ-десант команднэ училищыр къызэриухыгъэр, разведчик купым икомандир идзэ ипшъэрылъ ыгъэцакIэзэ зэрэфэхыгъэр.
Урысыем и Президентэу Владимир Путиным и УказкIэ лIыхъужъныгъэшхо зэрэзэрихьагъэм фэшI Валерий Заволянскэм идунай ыхъожьыгъэу Урысые Федерацием и ЛIыхъужъыцIэ къыфагъэшъошагъ. Спецназым ия 16-рэ бригадэу Валерий къулыкъу зыщихьыгъэр Тамбовскэ хэкур ары зыдэщыIэр. Мы хэкум ипромышленнэ-технологическэ колледжрэ кIалэр зыщеджэгъэ гурыт еджапIэу Хабаровскэ краим итымрэ ащ ыцIэ афаусыгъ. ПсэупIэу Яблоновскэм, джыдэдэм иунагъо зыщыпсэурэм ар щагъэтIылъыгъ. Урысыем и ЛIыхъужъ ыцIэ поселкэм иурамхэм ащыщ фаусыгъ. АР-м и ЛIышъхьэ иунашъокIэ псэупIэм игъэцэкIэжьынрэ изэтегъэпсыхьанрэ апэIухьащт мылъкур къыхагъэкIыгъ.
КъумпIыл Мурат зэрэхигъэунэфыкIыгъэмкIэ, ныбжьыкIэхэмкIэ Валерий Заволянскэр ренэу щысэтехыпIэу щытыщт.
ХэушъхьафыкIыгъэ дзэ операцием щыфэхыгъэ Артем Сергеевми тиреспубликэ рэгушхо. Ащ ишъхьэгъусэрэ ыпхъурэ джыдэдэм псэупIэу Яблоновскэм дэсых. КъумпIыл Мурат ахэм адэжь щыIагъ, ящыIэкIэ-псэукIэ зыщигъэгъозагъ, зыфэныкъохэр зэригъэшIагъ, кIэлэ дэгъу зэрапIугъэм фэшI ны-тыхэм зэрафэразэр ариIуагъ. Артем лIыхъужъныгъэшхо зэрихьэзэ, идзэкIолI пшъэрылъ ыгъэцакIэзэ заом щыфэхыгъ.
«Тикъэралыгъо ифедэхэр къыгъэгъунэзэ Артем фэхыгъ. ЕгъэшIэрэу ар тыгу зэрилъыщтым сицыхьэ телъ. Тихэгъэгу илIыхъужъхэм ясатырэ хэуцогъэ кIалэр агъэлъэпIэщт, Хэгъэгум узэрэфэшъыпкъэн фаемкIэ ренэу щысэтехыпIэу щытыщт», — къыIуагъ Адыгеим и ЛIышъхьэ.
Республикэм ипащэ зэрэхигъэунэфыкIыгъэмкIэ, хэушъхьафыкIыгъэ дзэ операцием хэлажьэхэрэм яунагъохэр ясоциальнэ Iофыгъохэм язэшIохынкIэ IэпыIэгъум щыгугъынхэ алъэкIыщт. Муниципалитетхэм, ведомствэхэм япащэхэм ащкIэ пшъэрылъ гъэнэфагъэхэр афашIыгъэх. КъумпIыл Мурат сабыибэ зэрыс Дюковхэм яунагъо зыщэIэм, ащ фэдэ пшъэрылъхэр зэрагъэцакIэрэр нэрылъэгъу къыфэхъугъ. Унагъом ышъхьэу Роман Дюковыр джыдэдэм дзэ хэушъхьафыкIыгъэ операцием хэлажьэ. Ащ ишъхьэгъусэу Янэ сабыищ епIу. ГъэрекIо итыгъэгъэзэ мазэ АР-м и ЛIышъхьэ зэдэгущыIэгъу занкIэ зыдешIым, Яблоновскэм иурамхэм ащыщ нахь зэтырагъэпсыхьанэу ар елъэIугъагъ. КъумпIыл Мурат пшъэрылъ зэрафишIыгъэм тетэу хэушъхьафыкIыгъэ дзэ операцием хэлажьэрэм иунагъо зытес урамыр зэпагъэнэфыгъ, зэхэонкIэ щынагъоу щыт чъыгхэр рахыкIыгъэх. АР-м и ЛIышъхьэ зэрелъэIугъэ нэмыкI Iофыгъохэри тапэкIэ зэшIохыгъэ хъущтых.
«Тэ хэушъхьафыкIыгъэ дзэ операцием хэлажьэхэрэм яунагъохэм арысхэм яIофыгъохэм ренэу тафэгумэкIы. Пшъэрылъ шъхьаIэу тиIэр тидзэкIолIхэм ягупсэхэр зэутэлIэрэ Iофыгъохэм язэшIохынкIэ IэпыIэгъу тафэхъуныр ары. Урысые Федерацием и Президентэу Владимир Путиныр кIэщакIо зэрэфэхъугъэм тетэу ащ пае фондэу «Хэгъэгум иухъумакIохэр» зыфиIорэр зэхащагъ. ДзэкIолIхэми, ахэм яунагъохэм арысхэми социальнэ IэпыIэгъу ятыгъэным иIофыгъохэр зэрэзэшIуахыхэрэр сшъхьэкIэ сэуплъэкIу. Хабзэм иреспубликэ къулыкъухэми, муниципалитетхэми япшъэрылъ нэбгырэ пэпчъ ищыкIагъэр зэрагъэшIэныр, амал зэриIэкIэ IэпыIэгъу фэхъунхэу», — къыIуагъ КъумпIыл Мурат.
Шъугу къэтэгъэкIыжьы хэбзэ къулыкъухэм тичIыпIэгъухэм къулыкъу зыщахьырэ дзэ частьхэм ренэу гъусэныгъэ зэрадыряIэр. Дзэ къулыкъушIэхэм яунагъохэм финанс, юридическэ IэпыIэгъу зэфэшъхьафхэр арагъэгъотых, фэгъэкIотэныгъэхэр афашIых. IофшIапIэ къафэгъотыгъэнымкIэ, унэгъо кIоцI Iофыгъохэм язэшIохынкIэ ахэм IэпыIэгъу афэхъух. ХэушъхьафыкIыгъэ дзэ операцием кIохэрэм джыдэдэм зэтыгъоу сомэ мин 200 араты. Ащ нэмыкIэу республикэм имуниципалитети 8-мэ сомэ мини 100-м къыщегъэжьагъэу сомэ мини 120-м нэсэу ахъщэ IэпыIэгъу тедзэхэр зэтыгъоу аратых. ХэушъхьафыкIыгъэ дзэ операцием хэлажьэхэрэм якIэлэцIыкIухэми IэпыIэгъу зэфэшъхьафхэр арагъэгъотых.