Къуаджэу Бжыхьэкъоежъым нэбгырэ 250-рэ зычIэфэщт еджэпIакIэр къызыщызэ­Iуахым ыуж АР-м и ЛIышъхьэу КъумпIыл Мурат Тэ­хъу­тэмыкъое рай­оным иIо­фышIэ анахь чанхэм зэIу­кIэгъу адыриIагъ.

Муниципалитетым ыкIи рес­публикэм яхэхъоныгъэкIэ зэшIохыгъэн фэе анахь Iофыгъо шъхьаIэхэм ахэр атегущыIа­гъэх.

Республикэм и ЛIышъхьэ къызэрэхигъэщыгъэмкIэ, хэгъэгум и Президентэу Владимир Путиным къыгъэнэфэгъэ лъэныкъо шъхьаIэхэм зыкIэ ащыщ демографиемкIэ Iофхэм язытет нахьышIу шIыгъэныр. Ащ пае цIыфхэм ящыIакIэ зыкъегъэIэтыгъэным, IофшIэнымкIэ гъэхъэ­гъэшIухэр ашIынхэм тегъэпсы­хьэгъэ Iофтхьабзэхэр лъыгъэ­кIотэгъэнхэм мэхьанэшхо иI. Тэхъутэмыкъое районэу зызэхащагъэр илъэси 100 зэрэхъу­рэр мыгъэ хэзгъэунэфыкIыщтыр республикэм имуниципалитетхэмкIэ анахь гугъэпIэ инхэр зэрапхыхэрэм зыкIэ ащыщ. Ащ зиушъомбгъугъ, унабэ щагъэпсы, цIыфэу исхэми япчъагъэ илъэс къэс хэхъо. Ащ телъытагъэу гъогу, инженер ыкIи социальнэ инфраструктурэм хэхъоныгъэ ягъэшIыгъэным пае пшъэрылъхэри къэуцух.

Муниципальнэ образованиеу «Тэхъутэмыкъое районым» ипа­щэу Шъэо Аскэр ыкIи цIыфхэу къекIолIагъэхэм къаIуагъ районым ынаIэ къызэрэтыригъэтырэм пае КъумпIыл Мурат зэ­рэфэразэхэр, федеральнэ гуп­чэмрэ республикэм ихэбзэ къулыкъухэмрэ яIэпыIэгъу хэлъэу мы аужырэ лъэхъаным зэхъокIыныгъэ инхэу районым фэхъухэрэр зэрэнэрылъэгъухэр къыхагъэщыгъ. ГущыIэм пае, илъэсыбэхэм къакIоцI апэрэу гъогухэр игъэкIотыгъэу агъэцэкIэжьыгъэх, социальнэ мэхьанэ зиIэ проектышхохэр зэшIуахых. Мы илъэсым изакъоу псэупIэу Яблоновскэм щагъэ­псырэ псэолъэ зэфэшъхьафхэм, фэдэ ыпэкIэ къыхэмыкIыгъэу, бюджетым къикIыгъэ ахъщэшхо апэIуагъэхьагъ.

Районым щыпсэухэрэм къатыгъэ упчIэхэм яджэуапэу ЛIы­шъхьэм къыхигъэщыгъэр Iоф­шIэнхэр джыри зэрэлъагъэкIо­тэщтхэр, Яблоновскэм зэрищыкIагъэм тетэу лъэныкъо пстэумкIи щызэшIохыгъэн фаеу къэуцурэ Iофхэр икъоу агъэцэкIэнхэм зэрэдэлэжьэщтхэр ары. Мы илъэсым псауныгъэм игъэпытэн фытегъэпсыхьэгъэ псэолъи 2 ашIыщт, гъогухэм, лъэсрыкIохэм, транспорт уцупIэхэм, урамхэм якъэгъэнэфынкIэ агъэфедэрэ пкъыгъохэм ягъэцэкIэжьын епхыгъэ IофшIэнхэр зэшIуахыщтых. Ащ дакIоу илъэсэу къи­хьагъэм еджэпIи 3-мэ яшIын ыкIэм нагъэсыщт. Мы илъэсым иIоныгъо мазэ къыщыублагъэу къуаджэу АдыгеякIэмрэ псэупIэу Яблоновскэмрэ еджапIэхэм яIофшIэн ащаублэщт. Мы илъэ­сым джыри зы еджапIэ Яблоновскэм щатIупщыщт. Гъэсэныгъэм иучреждениякIэхэу нэбгырэ 1100-рэ зырызым атегъэ­псыхьагъэхэр джырэ уахътэм диштэрэ проектым тетэу ашIых.

«А Iофтхьабзэхэм яшIуагъэкIэ еджэпIакIэхэм чIыпIэу яIэр на­хьыбэ хъущт, непэ нэс Iоф зы­шIэхэрэми ачIэсхэр нахь ма­кIэ зэрэхъущтхэм епхыгъэу яIофшIэни нахь тэрэзэу зэхащэн алъэкIыщт. Партиеу «Единэ Россиер» кIэщакIо зыфэхъугъэ ыкIи Урысые Федерацием и Президент къыздыригъэштэгъэ программэу илъэситфым телъы­тагъэр — еджапIэхэр игъэкIотыгъэу гъэцэкIэжьыгъэнхэр —дгъэцэкIэщт. ТшIэрэр зэкIэ зы­фэгъэхьыгъэр республикэм гъэсэныгъэмрэ пIуныгъэмрэ алъэныкъокIэ иIофхэм язытет нахьышIу хъуным, тикIэлэцIыкIухэр джырэ уахътэм диштэрэ, зэтегъэпсыхьэгъэ еджапIэхэм ачIэсынхэм пай», — къы­­хи­гъэщыгъ КъумпIыл Мурат.

Джащ фэдэу АР-м и ЛIышъхьэ агу къыгъэкIыжьыгъ кIэлэ­еджакIохэр сэнэхьатэу къыхахыщтым тегъэпсыхьагъэу егъэджэгъэнхэ, республикэм иэкономикэ пае кадрэхэм ягъэхьа­зырын епхыгъэ пшъэрылъхэр гъэ­цэкIэгъэнхэ зэрэфаер. Промышленнэ паркэу «Инэм» Iоф­шIэпIэ чIыпIакIэу щызэхащэрэр мы охътэ благъэхэм джыри нахьыбэ хъущт. Нафэу зэрэщытымкIэ, Тэхъутэмыкъое районым имызакъоу, зэрэреспубликэу экономикэм ылъэныкъокIэ хэ­хъоныгъэ ышIыным кIочIакIэ ащ къыхилъхьащт.

Районым ипащэхэм ыкIи ащ щыпсэухэрэм гущыIэгъу зафэ­хъум республикэм и ЛIышъхьэ къафиIотагъ анахь лъэгэпIэ иным диштэу медицинэ IэпыIэгъу ятыгъэным пае Iофтхьабзэу зэрахьэхэрэм афэгъэхьыгъэу. КъумпIыл Мурат районым ипащэхэм пшъэрылъ афишIыгъ Iоф­тхьабзэхэу рахъухьэхэрэр зэкIэ гъэцэкIагъэ хъунхэм лъы­плъэнхэу, кIэухышIухэр афэхъун­хэм зэкIэми акIуачIэ зэдыра­хьылIэнэу.

«Къуаджэ пэпчъ, псэупIэ пэпчъ джырэ уахътэм диштэрэ еджапIэхэр, фельдшер-мамыку IэзапIэхэр, спортымкIэ ыкIи культурэмкIэ псэуалъэхэр ащы­шIыгъэнхэм, гъогухэр гъэцэ­кIэ­жьыгъэнхэм апае ищыкIэгъэ амалхэр ядгъэгъотыщтых, а Iоф­шIэныр лъыдгъэкIотэщт. Федеральнэ гупчэм ишIуагъэ къы­тегъэкIы, амалэу ащ къытырэр зэкIэ икъоу дгъэфедэщт. Сыд фэдэрэ Iофтхьабзи шIуагъэ къытэу зэшIохыгъэ хъуным зэ­кIэми тынаIэ тедгъэтын фае. А IофшIэныр дгъэцакIэ зыхъукIэ цIыфхэм яеплъыкIэ зэдгъэшIэн, зыкъызэрэтфагъэзэрэ лъэ­Iухэм икъоу тынаIэ атедгъэтын, гъэ­псын IофшIэным ежьхэри чанэу къыхэлэ­жьэнхэм фэдгъэчэфынхэ фае. ПсэупIэ пэпчъ адэсхэм ящыIакIэ нахьышIу шIыгъэным, амалышIухэр яIэ хъуным пае зэкIэми ткIуачIэ зэхэлъэу, мамырныгъэрэ зэгурыIоныгъэрэ тазыфагу илъэу тиреспубликэ нахь зэтегъэпсыхьагъэ зэрэхъу­щтым, ыпэкIэ тызэрэлъыкIотэщтым тыдэ­лэжьэн фае», — къы­Iуагъ КъумпIыл Мурат.

АР-м и ЛIышъхьэ ипресс-къулыкъу