Пкъы фыкъуагъэ зиIэхэм IэпыIэгъу зыщафэ­хъухэрэ адаптивнэ спорт еджапIэу респуб­ликэм итыр зызэхащагъэр илъэс 11 хъугъэ.

Сэкъатныгъэ зиIэхэм яфизкультурнэ-спорт Гупчэу 2013-рэ илъэсым ар апэ къызэIуахыгъагъ. ЦIыфхэм япсауныгъэ зэрэщагъэпытэжьырэм имызакъоу, паралимпийскэ спорт лъэпкъ зэфэшъхьафхэмкIэ мыщ зыща­гъасэщтыгъ. Илъэс 11-м шъо­лъырым, къэралыгъом, дунаим зыцIэ щыIугъэ спортсменхэр Гупчэм ыгъэхьазырыгъэх.

— Джыдэдэм спорт еджапIэм нэбгыри 150-мэ зыщагъасэ. Медицинэм ылъэныкъокIэ мыдэ­ныгъэ хэмытмэ, еджапIэм къа­кIорэм пэпчъ ежь нахь ыгу зы­фэщэгъэ спорт лъэпкъыр къыхихын ылъэкIыщт, — хегъэунэфыкIы спорт еджапIэм ипащэу Нэгые Заур. — ЗипсауныгъэкIэ фыкъуагъэ зиIэхэм зыщагъэсэн алъэкIынэу спорт лъэпкъ 14-кIэ еджапIэм десэхэр къыщызэIутхыгъэх. Ахэм специалистхэр алъэплъэх, упчIэжьэгъу афэхъух. Тэрэзэу зымылъэгъухэрэм пауэр­лифтингыр, голболыр, теннис цIыкIур, зэхэзымыхыхэрэм — дзю­до, самбо, тхэквондо, щэрыоныр, зыIэпкъ-лъэпкъ узыхэрэм дартс, бочча, щэрыоныр, есыныр, шы тесыныр къыхахы. Ныбжь зэфэшъхьаф зиIэхэр еджапIэм къакIох, ахэм сабыйхэри, нэжъ-Iужъхэри ахэтых. ГущыIэм пае, илъэс 74-рэ зыныбжь спортсменым теннисымкIэ Урысыем ичемпионат я 4-рэ чIыпIэр къыщыдихыгъ. Ащ фэдэ гъэхъагъэхэм лъэшэу тагъэгушIо.

Пкъы фыкъуагъэ зиIэхэми спор­тым ишIуагъэ къарегъэкIы, ишъып­къэу пылъхэм гъэхъэгъэшIухэр ашIых.

— ЗыцIэ къепIонэу бэ тиIэр: щэрыонымкIэ паралимпийскэ чем­пионэу Валерий Пономаренкэр, дзюдомкIэ сурдолимпийскэ чемпионэу Биданэкъо Заур, дзюдомкIэ ыкIи самбэмкIэ Урысыем ичемпионкэ хъугъэ Инна Кибиткинар. Юлия Башмаковам щэрыонымкIэ Урысыем изэнэ­къокъу я 3-рэ чIыпIэр къыщыди­хыгъ. Тхэ­квондомкIэ УФ-м икубок къы­хьыгъ тижъогъо ныбжьыкIэу Ма­рия Притула, къэралыгъом ичемпио­нат я 3-рэ, ипервенствэ я 2-рэ чIыпIэхэр къащыдихыгъэх. Тенни­сымкIэ Грознэм щыкIогъэ зэнэ­къокъухэм тиспортсмен ныб­жьы­кIэу Дмитрий Нехаевыр чемпион ащыхъугъ. Спорт еджапIэр зызэ­хащагъэр илъэс 11 зыщыхъугъэм гъэхъэгъэ­шIухэр тшIыгъэх, — хи­гъэунэфыкIыгъ Нэгые Заур.

ЕджапIэм ипащэ къызэриIо­рэмкIэ, кIэлэцIыкIухэр нахьыбэу къафакIохэ хъугъэ. Непэрэ мафэм ехъулIэу ахэм япчъагъэ нэбгырэ 90-м нэсы. Дэеу зылъэгъурэ ыкIи зэхэзыхырэ сабыйхэр зыще­джэхэрэ интернатым зэпхыныгъэ дыряI.

— КIэлэцIыкIухэм афытегъэ­псыхьэгъэ спорт лъэныкъохэр тиIэх. ГущыIэм пае, шы тесыныр зиIэпкъ-лъэпкъ узырэ сабыйхэмкIэ Iэзэгъу. Илъэс зыныбжьыхэм къащыублагъэу 6 — 7 зыныбжьыхэм анэсыжьэу иппотерапием зыфагъасэ. Федеральнэ шап­хъэ­хэм татекIырэп, — еIо Заур.

Спортым профессиональнэу ыуж ихьэхэрэр бэу къахэкIых. АщкIэ гъэхъэгъэшIу зышIыгъэ цIыфхэр щысэтехыпIэ афэхъух. Боччи спорт лъэпкъымкIэ зызыгъасэу Николай Соколовым еджа­пIэу къыздакIорэм шIуагъэу къы­фихьыгъэр къыкIегъэтхъы: «Пкъы фыкъуагъэ зиIэхэм IэпыIэгъу зы­щафэхъухэрэ спорт еджапIэр къызызэIуахыгъэм щегъэжьагъэу сикIуапI. Сэкъатныгъэ зиIэ цIыф­хэр спортым пылъынхэ фае. Сэ сшъхьэкIэ ар сикIас. Ренэу тыкъызэрэкIорэм тиIэпкъ-лъэпкъы­хэр епсыхьэх, ишIуагъэ къытэкIы».

ЕджапIэм ипащэ къызэриIуагъэмкIэ, щэбзэщэ онымкIэ спорт отделение къызэIуахыным дэлажьэх.

АР-м и ЛIышъхьэу КъумпIыл Мурат ыкIи АР-м физическэ культурэмкIэ ыкIи спортымкIэ и Комитет яIэпыIэгъу ишIуагъэкIэ еджапIэр гъэхъэгъэшIухэм къафэкIуагъ.

Александра Балабась. Сурэтхэр авторым иех.