Тэхъутэмыкъое районым ит къуаджэу Бжыхьэкъоежъым Адыгеим и ЛIышъхьэу КъумпIыл Мурат хэлажьэзэ гурыт еджэпIакIэу N 11-р къыщызэIуахыгъ. Ар кIэлэеджэкIо 250-мэ атегъэпсыхьагъ ыкIи лъэпкъ проектэу «Гъэсэныгъэм» къыхиубытэрэ федеральнэ проектэу «Джырэ уахътэм диштэрэ еджапIэр» зыфиIорэм телъытагъэу ашIыгъ.

Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, АР-м иминистрэхэм я Кабинет и Тхьаматэу КIэрэщэ Анзаур, АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевыр, муниципальнэ образованиеу «Тэхъутэмыкъое районым» ипащэу Шъэо Аскэр, АР-м иминистрэхэм я Кабинет хэтхэр, АР-м и Къэралыгъо Совет —Хасэм идепутатхэр, муниципалитетым ипащэхэр ыкIи районым идепутатхэр, общественностым илIыкIохэр.

Къызэрэугъоигъэхэм закъыфигъазэзэ АР-м и ЛIышъхьэ еджэпIакIэр къызэрэзэIуахыгъэм, зэтегъэпсыхьэгъэ унакIэм апэрэ еджэгъу мафэр зэрэщаублагъэм апае зэкIэми къафэгушIуагъ. КъумпIыл Мурат къызэрэхигъэщыгъэмкIэ, УФ-м и Президентэу Владимир Путиным хэгъэгум щыпсэурэ цIыфхэм ящыIакIэ нахьышIу шIыгъэным пае стратегическэ мэхьанэ зиIэ пшъэрылъэу къыгъэуцугъэхэм ар зыкIэ ащыщ.

«Мы хъугъэ-шIагъэм бэрэ ежагъэх. Тэхъутэмыкъое районыр зызэхащагъэр илъэси 100 зэрэхъурэм ипэгъокI шIухьафтын дэгъу хъугъэ еджэпIакIэм икъызэIухын. ЕджапIэр зычIэтыгъэ унэр бэшIагъэ зэблахъун фаеу залъытэгъагъэр, кIэлэеджакIохэу зипчъагъэкIэ нахьыбэ хъухэрэми чIыпIэу ащ иIэр афикъужьыщтыгъэп. Непэ мыщ шIэныгъэхэр щызэрагъэгъотынхэм ыкIи кIэлэегъаджэхэм япшъэрылъ щагъэцэкIэным апае амал дэгъухэр иIэх. ГъэсэныгъэмкIэ технологиякIэхэр щыIэх, кIэлэегъаджэхэри Iэпэ­Iэсэныгъэ зыхэлъ, опыт гъэнэфагъэ зиIэ цIыфхэу щытых. Сицыхьэ телъ кIэлэ­еджакIо пэпчъ анаIэ зыщатырагъэтыщт, зыщафэгумэкIыщтхэ чIыпIэу мы еджэпIакIэр зэрэхъущтым», — къыIуагъ АР-м и ЛIышъхьэ.

КъумпIыл Мурат мы еджапIэм къызэкIом кIэлэегъаджэхэми, кIэлэеджакIохэми гущыIэгъу афэхъугъ. Ахэм къаIуагъ хэгъэгум и Президенти республикэм и ЛIышъхьи еджэпIакIэм пае зэрафэразэхэр, къоджэдэсхэм бэшIагъэ ащ фэдэ псэуалъэ зящыкIэгъагъэр. Ащ ыпэкIэ кIэлэцIыкIухэр зыщеджэщтыгъэхэр я XX-рэ лIэшIэгъум иублэгъум ашIыгъэгъэ унэр ары. Тэхъутэмыкъое районым ицIыф гъэшIуагъэу, шъхьафит бэнэнымкIэ СССР-м спортымкIэ Адыгеим иапэрэ мастерэу ЛIый Аскэр къоджэдэсхэм ярэзэныгъэ къызхэщырэ гущыIэхэр къы­Iуагъэх. ЕджапIэу N 11-м ипащэу Георгий Кайшевым къызэриIуагъэмкIэ, 1997-рэ илъэсым къыщегъэжьагъэу кIэлэеджа­кIоу мыщ чIэсыр фэди 4-кIэ нахьыбэ хъугъэ. НепэкIэ кIэлэцIыкIу 430-рэ щеджэ, классхэр 20 зэрэхъухэрэр. Ахэм ащыщэу 6-р лъэпкъыбзэмрэ культурэмрэ язэгъэ­шIэн фытегъэпсыхьагъ. ЕджапIэр зыщыIэм къыщыублагъэу нэбгырэ 30-мэ дышъэ ыкIи тыжьын медалькIэ ар къаухыгъ, IофшIэнымкIэ чIыпIэ зэфэшъхьафхэм лъэгэпIэшхохэр ар къэзыухыгъэхэм ащыщхэм щаIыгъ.

Гъэсэныгъэ Iофыр нахьышIоу зэхэщэгъэнымкIэ амалыкIэу еджапIэм иIэ хъугъэхэм яшIуагъэ къызэрэкIощтым ицыхьэ зэрэтелъыр АР-м и ЛIышъхьэ къыIуагъ. УнэкIэ инэу корпуси 2 хъурэм кабинет зэфэшъхьафхэр хэтых. Ахэр Iэмэ-псымэхэмкIэ дэгъоу зэтегъэпсыхьагъэх, интернетым епхыгъэх, кIэлэегъа­джэхэм яIоф­шIэпIэ чIыпIэхэри шапхъэхэм адештэх, ноутбукхэр, принтерхэр яIэх. Джащ фэдэу зыщеджэщтхэ, производствэм епхыгъэ къуланыгъэхэр аIэ къызщырагъэхьащт мастерскойхэр, спортым зыщыпылъыщтхэ ыкIи актовэ залхэр, кружок зэфэшъхьафхэм атегъэпсыхьэгъэ унэхэр, тхылъеджапIэр, шхапIэр, медицинэ пунктыр ыкIи нэмыкIхэр хэтых. Щынэгъончъэу IофшIэныр кIоным пае электрон шIыкIэм тетэу системэ гъэнэфагъэхэр хагъэуцуагъэх, видеолъыплъэ­нымкIи камерэхэр хэтых. Электрон киоскэу гупчэ унэм хэтым информа­ционнэ порталыр, урокхэм яграфик ыкIи нэмыкIхэр рагъотэнхэ алъэкIыщт.

Ащ нэмыкIэу еджапIэм къыхиубытэрэ чIыпIэм спорт гупчи, зызщагъэпсэфыщт шъолъыри къыщыдалъытагъэх. ЗипсауныгъэкIэ пыч зиIэ кIэлэцIыкIухэм яегъэджэн нахь Iэрыфэгъу зэ­рэхъущтым диштэрэ амалхэри еджапIэм щарагъэгъотых. Илъэ­сэу къихьащтым къыщыублагъэу цифрэтехнологиехэм ягъэфедэн­кIэ гупчэу «Точка роста» зыфиIорэр мыщ къыщызэIуахыщт. Адыгеим и ЛIышъхьэ къызэриIуагъэмкIэ, Урысыем и Президентэу Владимир Путиным къыгъэуцугъэ пшъэрылъым игъэцэкIэн республикэм щылъа­гъэкIотэщт, кIэлэеджакIохэм нахь шIэныгъэ куухэр ягъэгъотыгъэнхэмкIэ, къэлэ ыкIи къоджэ еджа­пIэхэм ачIэсхэм зэфэдэ амалхэр яIэнхэмкIэ ищыкIагъэр зэкIэ агъэцэкIэщт. Анахьэу анаIэ Тэ­хъу­тэмыкъое районым тыра­гъэты. «Районым псынкIэу хэхъоныгъэ ешIы, унабэ къыдэтаджэ. Ащ пшъэрылъ къегъэуцу чIыпIэр нахь зэтегъэпсыхьэгъэнэу, социальнэ псэуалъэхэр нахьыбэу щышIыгъэнхэу. КIэлэеджакIохэм апае нахьыбэу чIыпIэхэри щыIэнхэ фае. А Iофыгъом изэшIохын зэрэдгъэпсынкIэщтым тынаIэ тетэгъэты. Мы аужырэ илъэси 6-м лъэпкъ проектэу «Гъэсэныгъэм» тегъэпсыхьагъэу Тэхъутэмыкъое районым къыщызэIутхыгъэ еджапIэхэм мыр яящэ­нэрэу щыт. Джыри Тэхъутэмыкъое районым нэбгырэ 1100-рэ зырыз зычIэфэщт еджэпIищ щытэшIы: зыр — къуаджэу АдыгеякIэм, тIур — псэупIэу Яблоновскэм», — къыхигъэщыгъ КъумпIыл Мурат.

Шъугу къэтэгъэкIыжьы: мы аужырэ илъэсихым Адыгеим еджэпIи 5 щагъэпсыгъ (къуаджэу Бжыхьэкъоежъым къыщызэIуа­хыгъэри зэрахэтэу), джыри 5 ашIы, кIэлэцIыкIу IыгъыпIэ 19 агъэпсыгъ, ахэм ащыщэу 2-р аухы пэт. Къоджэ еджапIэхэм атегъэпсыхьагъэу «Точка роста» зыфиIорэм фэдэу гупчэ 89-мэ Iоф ашIэ. Ахэм ащыщэу 25-р 2023-рэ илъэсым къызэIуахыгъ. Ащ нэмыкIэу кIэлэцIыкIу технопарки 4-мэ, гупчэу «IТ-клуб» зыфиIорэм фэдэу 2-мэ Iоф ашIэ. Къуаджэхэм хэхъоныгъэ ягъэшIыгъэным пае къэралыгъо программэм къыдыхэлъытагъэу мы аужырэ илъэситIум шъолъы­рым еджэпIэ 15 щагъэцэкIэ­жьыгъ. АР-м и ЛIышъхьэ къулы­къум пшъэрылъ фишIыгъ а пчъагъэхэм ахигъэхъонэу ыкIи къыкIэлъыкIощт илъэси 2-м рес­публикэм иеджапIэхэу игъэкIотыгъэ гъэцэкIэжьын IофшIэнхэр зэрашIылIэщтхэм япчъагъэ амал зэриIэкIэ нахьыбэ ышIынэу.

АР-м и ЛIышъхьэ ипресс-къулыкъу