Хэдзынхэм зафагъэхьазыры
АР-м хэдзынхэмкIэ и Гупчэ комиссие тыгъуасэ я 30-рэ зэхэсыгъо иIагъ. Ащ Iофыгъуи 8-мэ щатегущыIагъэх, унэшъо гъэнэфагъэхэр щашIыгъэх. Iофтхьабзэр зэрищагъ комиссием и Тхьаматэ игуадзэу Елена Майор.
Пэублэм хэдзын правовой культурэм хэхъоныгъэхэр ышIынхэмкIэ икIыгъэ илъэсым IофшIэнэу агъэцэкIагъэм, хэдзын комиссием хэтхэм яегъэджэн, 2023-рэ илъэсым республикэмкIэ хэдзын технологиехэм ахэгъэхъогъэным фэгъэхьыгъэу ашIэгъэ IофшIэным атегущыIагъэх.
Елена Майор къызэриIуагъэмкIэ, анахьэу анаIэ зытетыгъэр комиссием хэтхэм яегъэджэн, гъэрекIо нэбгырэ 2028-мэ яшIэныгъэхэм ахагъэхъуагъ ыкIи сертификатхэр аратыжьыгъэх. Урысыем и Президент ихэдзынхэм япэгъокIэу IэпыIэгъу къафэхъущт тхылъ цIыкIухэм якъыдэгъэкIын ыуж итыгъэх. Джащ фэдэу ныбжьыкIэхэр хэдзынхэм ахэлэжьэнхэм, мыщ епхыгъэу яшIэныгъэхэм ахагъэхъоным мэхьанэшхо зэрэратырэр ащ къыIуагъ.
Урысыем и Президент ихэдзынхэм яхъулIэу проектэу «ИнформУИК» зыфиIорэр щыIэныгъэм щыпхыращыщт. Ащ ишIуагъэкIэ хэдзын комиссием хэтхэу пэшIорыгъэшъэу агъэхьазырыгъэхэм унагъохэр къакIухьащтых, хэдзыным фэгъэхьыгъэ упчIэхэр аратыщтых ыкIи амакъэ зыщатыщт чIыпIэмкIэ яупчIыщтых. ГъэрекIо пилотнэ проектыр апэрэу Урысыем щаушэтыгъ, ащ ишIуагъэкIэ хэдзынхэм ахэлэжьагъэхэм япчъагъэ процент 13-кIэ нахьыбэ хъугъэу агъэунэфыгъ. Адыгеим мыщ фэдэ шIыкIэр апэрэу щагъэфедэщт.
Джащ фэдэу республикэ бюджетым къыхэхыгъэ сомэ миллион 24-рэ мин 900-м ехъурэр АР-м хэдзынхэмкIэ и Гупчэ комиссие зэригъэфедэщтым тегущыIагъэх.
ДЕЛЭКЪО Анет.