Мыекъопэ къэлэ администрацием физическэ культурэмкIэ ыкIи спортымкIэ и Комитет кIэщакIо зыфэхъугъэ Iофтхьабзэу «Жэжъые биатлон» зыфиIорэр ятфэнэрэу Адыгеим икъэлэ шъхьаIэ щыкIощт. Мы Iофтхьабзэр къэлэдэсхэм лъэшэу агу рехьы, командэ 50-м ехъу хэлажьэ. Шъугу къэдгъэкIыжьын, «Жэжъые биатлоныр» апэрэу 2021-рэ илъэсым зэхащагъ. Джащыгъум биатлоным шапхъэу пылъхэр агъэфедэхэзэ жэжъыехэмкIэ унагъохэм язэнэкъокъу рагъэ­кIокIынэу рахъухьагъ. Шъхьафэу зэнэкъокъух бзылъфыгъэ ыкIи хъулъфыгъэ, зэхэгощэгъэ ыкIи кIэлэцIыкIу командэхэр. Iофтхьабзэм хэлажьэхэрэм ящыкIэгъэ жэжъыехэр зэхэщакIохэм къаратых. Iофтхьабзэр зыщыкIощтыр республикэ шахмат клубым къыпэIулъ чIыпIэр ары. Щылэ мазэм и 13-м мафэм сыхьатыр 1-м зэнэкъо­къур аублэщт. Мыщ фэгъэхьыгъэ игъэкIотыгъэ къэбар ижъугъотэщт Мыекъуапэ физическэ культурэмкIэ ыкIи спортымкIэ и Комитет исоциальнэ хъытыоу «Вконтакте» зыфиIорэм.