Бысымхэр нахь лъэшыгъэх
Урысыем ичемпионат и Суперлигэ хэлэжьэрэ «АГУ-Адыифым» зичэзыу ешIэгъоу иIагъэр Астрахань щыкIуагъ.
Тигандболисткэхэм дэгъоу зыкъагъэлъэгъуагъ нахь мышIэми, хагъэунэфыкIырэ чIыпIэхэм афэбэнэрэ «Астраханочкэр» нахь лъэшыгъ, ащ текIоныгъэр къыдихыгъ.
«Астраханочка» — «АГУ— Адыиф» — 31:25 (13:14).
Апэрэ таймым тикомандэ дэгъоу ешIагъ, анахьэу аужырэ такъикъипшIым. А уахътэм ехъулIэу бысымхэр IэгоуищкIэ тапэ итыгъэх, ау типшъашъэхэм пчъагъэр зэфэдиз ашIын алъэкIыгъэ къодыеп, Ангелина Болоба дидзэгъэ Iэгуаом ишIуагъэкIэ 14:13-у апэрэ таймыр къахьыгъ.
Ау ятIонэрэ таймым бысымхэм якомандэ нахь дэгъоу ешIагъ, ар джырэ уахътэм медальхэм афэбанэ. «АГУ-Адыифым» къытекIуагъэх нахь мышIэми, ешIакIэу ащ къыгъэлъэгъуагъэм уигъэрэзэнэу щыт. Ар къыхигъэщыгъ тикомандэ хэт Анастасия Селиверстовам.
Джырэ уахътэм Адыгеим икомандэ я 10-рэ чIыпIэм щыт. Зэнэкъокъум къыдыхэлъытэгъэ пэшIорыгъэшъ едзыгъор ыухынкIэ джыри ешIэгъуитIу къыфэнагъ. Щылэ мазэм и 15-м Тольятти къэзыгъэлъэгъорэ «Ладэр» тихьакIэщт.
Командэхэр зыдэщыт чIыпIэхэр ыкIи очко пчъагъэу рагъэкъугъэр:
1. «Ростов-Дон» — 38. 2. «ЦСКА» — 35. 3. «Астраханочка» — 31. 4. «Лада» — 29. 5. «Черноморочка» — 28. 6. «Кубань» — 21. 7. «Динамо-Синара» — 17. 8. «Звезда» — 12. 9. «Ставрополье» — 10. 10. «АГУ-Адыиф» — 8. 11. «Луч» — 6. 12. «Университет» — 1.
ПэшIорыгъэшъ едзыгъом къыдыхэлъытэгъэ ешIэгъуищ «АГУ— Адыифым» джыри иIэщт, «Астраханочкэм», «Звездам» ыкIи «Ладэм» адешIэщт.