Мы мафэхэм осэу къесыгъэм дунаир къыгъэдэхагъэми, ащ гумэкIыгъуаби къыздихьыгъ. Республикэм, ащ икъэлэ шъхьаIэу Мыекъуапэ яхэушъхьафыкIыгъэ къулыкъухэм гъэлъэшыгъэ шIыкIэм тетэу Iоф ашIэ.

Осым иIухын тегъэпсыхьэгъэ техникэм гъогухэр еукъэбзых, ахэр мыцIэнлъэгъон­хэм пае ищыкIэгъэ фэIо-фашIэхэр зэрахьэх. ЛъэсрыкIуапIэхэм, транспорт уцупIэхэм, лъэсгъогу зэпырыкIыпIэхэм яукъэбзын IэкIэ зэшIуахы.

БлэкIыгъэ мэфитIум чъыIэр градуси 2 – 6-м нэсыщтыгъэмэ, нычэпэ 0-м нэс къыдэкIоегъагъ, ощх-ос цIынэ зэхэт къехыным ищынагъуи щыIэу синоптикхэм къаIо. Ос цIынэр чъыгхэм, электроэнергием ирыкIуапIэхэм, унэхэм, нэмыкI псэуалъэхэм атепкIэн ылъэкIыщт, Iумыл къэхъуным ищынагъуи щыI.

Джащ пае ошIэ-дэмышIэ IофхэмкIэ къулыкъум цIыфхэм агу къегъэкIыжьы сакъыныгъэ къызхагъэфэн зэрэфаер:

— урамхэм шъуарыкIо зыхъукIэ, элек­троэнергием ирыкIуапIэхэр, электро­тран­спортым ыгъэфедэхэрэр, чъыг къу­тамэхэр псаухэмэ шъунаIэ тежъугъэтын фае; — шъуищагухэм улэбыгъэ псэуалъэхэр адэтхэмэ, ахэр тэрэзэу жъугъэпытэнхэ фае цIыфхэм шъобжхэр ахамыхынхэм фэшI; — водительхэр ямашинэхэм арысхэу къамыкIухьэмэ нахьышIу е гъогум гъэ­лъэшыгъэу щысакъынхэ фае; — лъэсрыкIохэми джащ фэдэу сакъы­ныгъэ ин къызхагъэфэн фае автомобиль гъогухэр зэпачыхэ е ахэм апэблагъэу къакIухьэ зыхъукIэ.

Гъогухэр сыд фэдизэу аукъэбзыхэми, гъогу хъугъэ-шIагъэхэр къатехъухьанхэр зэпыурэп.

Адыгеим и Къэралыгъо автоинспекцие зэхэщэн-аналитическэ IофшIэнымкIэ ыкIи пропагандэмкIэ иотдел ипащэу, полицием иподполковникэу Бзэджэжъыкъо Мурат къызэриIуагъэмкIэ, щылэ мазэм и 9-м республикэм игъогухэм хъугъэ-шIэгъэ 33-рэ къатехъу­хьагъ. Адрэ мафэхэм ялъытыгъэмэ, ар бэкIэ нахьыб, ом изытет къыпкъырыкIыгъ. Анахьыбэр зыщатхыгъэр Тэхъутэмы­къое районымрэ Мыекъуапэрэ. Теуцожь ыкIи Тэхъутэмыкъое районхэм осэу къащесыгъэр нахьыб.

Адыгеим и Къэралыгъо автоинспекцие цIыфхэм зафегъазэ сакъыныгъэ къызхагъэфэнэу, шIокI имыIэу зэпэчыжьагъэу машинэхэм азыфагу илъын фаер къыдалъытэнэу ыкIи лъэшэу мызечъэнхэу.

Мы уахътэм гъогу-патруль къулыкъум иIофышIэхэр гъогурыкIоным хэлажьэхэрэм зэпымыоу алъэплъэх, ищыкIэгъэ IэпыIэгъур арагъэгъоты. Хэгъэ­унэфыкIыгъэн фае, къулыкъу транспортым ыкIоцI ищыкIэгъэ пкъыгъохэр илъых, осым хэнэгъэ автомобильхэр къызэрэхащыжьыщт гъучIыч кIапсэхэм анэсыжьэу.

Гъогу транспорт хъугъэ-шIагъэхэр затхырэ уахътэр нахь макIэ шIыгъэным пае а купхэм яIофшIэн агъэлъэшыгъ. Автомобильхэр зэрыкIорэ гъогухэу осыр зыщызэтырихьэрэ чIыпIэхэр полицейскэхэм къыхагъэ­щых ыкIи аукъэбзынхэм пае ащ фэгъэзэгъэ къулыкъухэм къэбарыр алъагъэIэсы.

Осыр зытхъурэ техникэм иIофшIэн пэрыохъу фэмыхъунхэм пае унэе автомобильхэр гъогу напцэхэм цIыфхэм къаIуа­мыгъэнэнхэу къяджэх.

Адыгеим и Къэралыгъо автоинспекцие къушъхьэхэм якIурэ гъогум ыкIи М-4 «Дон» зыфи­Iорэм язытет инэплъэгъу ригъэ­кIырэп.

Синоптикхэм къызэратырэмкIэ, къушъхьэхэу метрэ 1500-м нахь лъагэхэм ателъ осыр непэ­рэ неущырэ къяхыным ищынагъо щыI. Ащ пае ошIэ-дэмышIэ IофхэмкIэ къулыкъур цIыфхэм къяджэ зызщыбгъэцIанлъэ хъущт гъогууанэхэм анэмыкI амыгъэфедэнэу, ом изытет зызэрэзэрихъокIырэм лъыплъэнхэу, осы­шхо щыIэ зыхъукIэ къушъхьэ­хэм ахэмыхьанхэу, осыр къе­цIэнлъэхын зыщилъэкIыщт чIы­пIэхэм ямыкIолIэнхэу. Ар зыщыхъушъущтыр градус 30-м нахьыбэу зизэндагъэхэр арых.

ОшIэ-дэмышIэ Iоф шъухэфагъэмэ, IэпыIэгъу шъуищыкIагъэ­мэ, мобильнэ телефонымкIэ номерхэу 01, 101, 112-м шъуа­теон фае.

Iэшъынэ Сусан.