АР-м терроризмэм пэшIуекIогъэнымкIэ икомиссие изэхэсыгъоу щыIагъэм анахьэу анаIэ зыщытырагъэтыгъэр цIыф лъэпкъ зэфэшъхьафхэм ыкIи дин зэмылIэужыгъо-хэр зылэжьыхэрэм алъэныкъокIэ зэгурыIо-ныгъэ щыIэным иIофыгъохэр ары.

[caption id="attachment_143914" align="aligncenter" width="800"] А. Гусев[/caption]

Адыгеим терроризмэ ыкIи диверсие нэшанэ зиIэ тхьамыкIагъохэр къимыхъу­хьанхэмкIэ ведомствэ зэфэшъхьафхэм язэдэлэжьэныгъэ гъэпытэгъэным анаIэ зэрэтырагъэтын фаем тегъэпсыхьэгъэ Iофтхьабзэу зэрахьан фаехэм зэхэсыгъом щатегущыIагъэх.

Адыгеим и ЛIышъхьэу КъумпIыл Мурат комиссием изэхэсыгъо зэрищагъ. Ащ къызэрэхигъэщыгъэмкIэ, Урысыем и Президентэу Владимир Путиным къы­гъэуцугъэ пшъэрылъхэм атегъэпсыхьагъэу терроризмэм пэшIуекIорэ комиссиехэу шъолъырхэм ащызэхащагъэхэр мы лъэныкъомкIэ Iофыгъоу къэуцухэрэм атегущыIэнхэ фае.

Комиссием иIофшIэн хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиныр, АР-м и Прократурэ, АР-м и МВД, ФСБ-м и ГъэIорышIапIэу Адыгэ Республикэм щыIэм, АР-м и Апшъэрэ хьыкум, Рос­гвардием и ГъэIорышIапIэу Адыгэ Рес­публикэм щыIэм япащэхэр, федеральнэ ыкIи шъолъыр ведомствэхэм, муниципалитетхэм яIэшъхьэтетхэр.

Адыгеим хэгъэгу кIоцI IофхэмкIэ иминистрэу Олег Безсмельницыным къызэриIуагъэмкIэ, щынэгъончъэным ылъэныкъокIэ Iофтхьэбзэ тедзэхэр зехьэгъэнхэм фэгъэхьыгъэ унашъохэр республикэм иминистерствэ къыдигъэ­кIыгъэх. Илъэсэу икIыгъэм къулыкъу ыкIи ведомствэ зэфэшъхьафхэр ягъусэхэу планым къыдилъытэрэ тренировкэхэр ашIыгъэх ыкIи яIэпэIэсэныгъэ зэрэхагъэхъощтым тегъэпсыхьэгъэ Iофтхьабзэхэр зэрахьагъэх. Экстремизмэ ыкIи терроризмэ нэшанэ зиIэ гумэкIыгъохэр къэмыхъунхэм пае ведомствэм Iоф­тхьэбзэ гъэнэфагъэхэр ренэу зэрехьэх.

Адыгэ Республикэм лъэпкъ IофхэмкIэ, Iэ­кIыб къэралхэм ащы­псэурэ тилъэпкъэгъу­хэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр а лъэныкъомкIэ Iофэу ашIэрэм фэгъэхьыгъэу къыIо­тагъ. Адыгэкъа­лэрэ къуаджэу Хьакурынэхьаблэрэ Iэнэ хъураехэр ащызэхащагъэх. Ахэм ахэлэжьагъэх экстремизмэм пэшIуекIогъэнымкIэ Гупчэм иIофышIэхэр, муниципалитетхэм, къо­джэ псэ­упIэхэм япащэхэр, АР-м ина­хьыжъхэм я Совет хэтхэр, общественнэ IофышIэхэм ыкIи дин организациехэм ялIыкIохэр. Терроризмэм пэшIуе­кIорэ Iоф­тхьабзэхэм япхыгъэ Iофыгъоу къэуцухэрэм ателъыта­гъэу конференцие зэхащэгъагъ, лъэпкъ щынэгъончъа­гъэм иIофыгъохэмкIэ Адыгэ къэралыгъо университетым зэIукIэ щы­кIуагъ. Ащ нэмыкIэу Мыекъопэ къэзэкъ отделым, мэщытым, Адыгэ Ха­сэм Iоф­тхьабзэхэр ащызэрахьагъэх. АР-м и ЛIышъхьэ дэжь щызэхэщэгъэ Советэу лъэпкъ зэфыщытыкIэхэм ыкIи дин зэфэшъхьафхэр зылэ­жьыхэ­рэм азыфагу зэзэгъыныгъэ илъыным дэлажьэрэр Iофхэм язытет тегущыIагъ. Херсон хэкум къикIхи Адыгеим къэкощыжьыгъэхэм IофшIэн гъэнэфагъэ адызэшIуа­хы. КъэбарлъыгъэIэс электрон ыкIи нэмыкI амалхэм илъэсэу икIыгъэм терроризмэм пэшIуе­кIорэ Iофыгъохэм афэгъэхьыгъэ материал 360-м ехъу къары­хьагъ.

Росгвардием и ГъэIорышIапIэу Адыгэ Республикэм щыIэм ипащэу Олег Якушевым къызэриIуа­гъэмкIэ, лъэпкъ ыкIи дин зэфыщытыкIэхэм япхыгъэу мыхъо- мышIагъэхэр, хэбзэукъоныгъэхэр къэмыхъунхэм инэшанэхэр джы­рэкIэ щыIэх. Ау щыт нахь мышIэми, терроризмэ нэшанэхэр къалъыIэсынхэм ищынагъо нахьыбэу къызшъхьащыхьан ылъэкIыщтхэм ащыщых инфраструктурэр, гъэсэныгъэ зыщарагъэгъотырэ учреждениехэр, зэ­пхыныгъэм, энергетикэм, унэ-коммунальнэ хъызмэтым ыкIи нэмыкIхэм япхыгъэ псэуа­лъэхэр. Мы лъэныкъохэмкIэ уплъэкIун IофшIэнхэр нахьыбэу зэхэщэгъэнхэ фае. КъызэрэхагъэщыгъэмкIэ, илъэсэу икIыгъэм Адыгеим кощын IофхэмкIэ хэбзэгъэуцугъэу щыIэр IэкIыб къэралхэм къарыкIыгъэ нэбгырэ 16-мэ аукъуагъ.

«ХэбзэухъумэкIо къулыкъухэм мыщ фэдэ лъэхъаным чIыпIэ зыгъэIорышIэжьыным икъулыкъу­хэм шIуагъэ къэзытырэ зэдэлэ­жьэныгъэ адыряIэнымкIэ Iоф­тхьабзэхэр зэрищыкIагъэм тетэу зэшIохыгъэнхэм мэхьанэшхо иI. Анахьэу тынаIэ зытедгъэтын фаер нэмыкI шъолъырхэм ыкIи къэралыгъохэм къарыкIхэу республикэм къихьэхэрэр ары. Анахьэу транзит транспортымрэ хьылъэхэмрэ алъэныкъокIэ а гумэкIыгъор къикIын ылъэкIыщт. Хабзэм икъулыкъу пстэуми Iоф­хэм язытет игъом ыкIи икъоу зыщагъэгъозэн фае. Хэгъэгум президент хэдзынхэр зыщыкIощт­хэм, ащ изыфэгъэхьазырын зыщырекIокIыщт лъэхъаным а пстэуми анахьэу етIани ямэхьанэ нахь зыкъиIэтыщт», — къыIуагъ КъумпIыл Мурат.

Зэхэсыгъом илъэхъан къэгущыIагъэх Роскомнадзорым илIы­кIохэр, чыристан ыкIи быслъы­мэн конфессиехэм япащэхэр.

Iофыгъоу къаIэтыгъэхэм ятегущыIэн ыкIэм зыщыфэкIощтым Адыгеим и ЛIышъхьэ зыпкъитыныгъэ республикэм илъыным пае къулыкъу пстэуми язэдэлэжьэныгъэ нахь пытэнымкIэ Iофтхьэбзэ тедзэхэр зехьэгъэнхэ зэрэфаер къыхигъэщыгъ. Ащ дакIоу КъумпIыл Мурат къы­Iуагъ общественнэ-политикэ IофтхьэбзэшIухэу республикэм щызэрахьэхэрэм нахь заушъомбгъуным пэрыохъу фэхъун зылъэ­кIыщт лъэныкъохэм игъом апэ­уцужьыгъэным, ахэм гъогур афызэпыбзыкIыгъэным мэхьанэшхо зэриIэр.

АР-м и ЛIышъхьэ ипресс-къулыкъу