Къэралыгъо телерадиокомпаниеу «Адыгеим» эфирым уахътэу щыриIэм зы сыхьат къыхэхъуагъ. Ар мэхьанэшхо зиIэ хэхъоныгъ. Телеканалэу «Уры­сыер 1» зыфиIорэм къызэрэщыдэкIыщтыгъэхэ уахътэм пчыхьэм сыхьатыр тфым ыныкъом щыублагъэу хым ыныкъом нэс къыхэхъощт. Сыхьат охътэ тедзэр тематическэ редакцием фагъэшъо­шагъ, Адыгеим икъэралыгъо бзитIукIэ яохътэ пIалъэкIэ зэфэдэхэу къэтынхэр къихьащтых.

Блыпэмрэ гъубджымрэ — адыгабзэкIэ, бэрэскэжъыемрэ мэфэкумрэ — урысыбзэкIэ, бэрэскэшхом — бзитIукIэ, та­къикъ щэкI-щэкIэу зэфагощызэ къыдэкIыщтых. Къэралыгъо телерадиокомпанием студиякIэ щагъэпсыщт, къэтыныкIэхэм, проектыкIэхэм адэлэжьэщтых. Шъолъырым ихъугъэ-шIагъэхэм афэгъэхьыгъэ къэбар къэтынхэр нахьыбэмэ алъыIэсынхэу агъэпсыщт.

Культурэм ыкIи шэн-хабзэхэм, тарихъым, бзэм афэгъэхьыгъэ къыдэкIыгъохэм ягъэхьазырын телевидением иIофышIэхэр джыдэдэм дэлажьэх. Республикэм итеатрэхэм агъэуцугъэхэр, Адыгеим ирежиссерхэм яфильмхэр къагъэ­лъагъозэ ашIыщтых. Гъэхъагъэхэр зышIырэ цIыфхэр къырагъэб­лагъэхэзэ эфирым занкIэу къихьэрэ къэтынхэри зэхащэщтых.

Урысыем и Къэралыгъо телерадиокомпание ипащэхэм яIэпыIэгъу, республикэм ибюджет къыхэхыгъэ мылъкум ыкIи Къэралыгъо телерадиокомпаниеу «Адыгеим» ясэнэхьат фэIэпэIасэхэу Iоф щызышIэхэрэм яшIуагъэкIэ хэхъоныгъэшIур къадэхъугъ.

«Урысыем и Къэралыгъо телерадиокомпание республикэм ителевидение ыкIи ирадио ренэу IэпыIэгъу къазэрэфэхъурэм пае Олег Добродеевым ыкIи Рифат Сабитовым лъэшэу сафэраз, – къыIуагъ АР-м и ЛIышъхьэу КъумпIыл Мурат.