ХэушъхьафыкIыгъэ дзэ операцием иветеранхэм азыфагу киб­атле­тикэмкIэ Урысыем и Первенствэ къыдыхэлъытагъэу Фондэу «Хэ­гъэгум иухъумакIохэр» зыфиIорэмрэ Союзэу «Кибатлетика» зы­цIэмрэ зэрэзэдэлэжьэщтхэмкIэ зэзэгъыныгъэм зэдыкIэтхагъэх.

[caption id="attachment_143883" align="aligncenter" width="800"] Фондэу «Хэгъэгум иухъумакIохэр».[/caption]

ЛъэныкъуитIур зэгъусэхэу псауныгъэм зэрар езыхырэ шIыкIэхэр щыгъэзыегъэнхэм ветеранхэр фащэщтых, щыIэ­ныгъэм хэзыгъэгъозэжьыхэрэ техническэ пкъыгъохэр аIэкIагъэхьащтых ыкIи ахэр тэрэзэу зэрагъэфедэщтхэм фырагъэджэщтых, Хэгъэгум иухъумакIохэм агу рихьырэ сэнэхьатхэм афагъэзэжьынымкIэ IэпыIэгъу афэ­хъущтых, конференциехэр, семинархэр, проектхэр пхыра­щыщтых.

ИкIыгъэ илъэсым тыгъэгъа­зэм ыкIэхэм хэушъхьафыкIыгъэ дзэ операцием иветеранхэм азыфагу кибатлетикэмкIэ Урысыем и Первенствэу рагъэ­кIокIыгъэм икIэщэкIуагъэхэр фондыр, Союзэу «Кибатлетика» зыфиIорэр ыкIи Москва со­циальнэ ухъумэнымкIэ и Де­партамент. Фондэу «Хэгъэгум иухъумакIохэр» зыфиIорэм икъу­­тэмэ 50-мэ къарыкIыгъэ нэбгырэ 50-у протез зыфашIыгъэхэр зэнэкъокъум хэлэжьа­гъэх. Мыр зэхэубытэгъэ реа­билитацием ипрограммэу «С Кибатлетикой строим будущее» зыфиIорэм къыдыхэлъытэгъагъ.

Программэр едзыгъохэмкIэ зэтеутыгъ. ЗыIэ ыкIи зылъакъо протез зыфашIыгъэ дзэкIолI 60-м ехъу ахэм ахэлэжьагъ. Ветеранхэр протез зафашIыхэ нэужым унэгъо хъызмэтым зэресэщтхэм, щыIакIэу зыхэтыгъэхэм къызэрэфагъэзэжьын алъэкIыщтым фырагъэджагъэх, психологическэ IэпыIэгъу арагъэгъотыгъ.

— ТилIыхъужъхэм такъот ыкIи мамыр щыIакIэм псынкIэу къыфагъэзэжьынымкIэ IэпыIэгъу тафэхъу. ЦIыфым протез фяогъэшI къодыекIэ хъурэп, ар зэрэпсэущтым, Iоф зэришIэщтым ыкIи тапэкIэ гухэлъышIухэр зыфигъэуцужьыхэзэ зэрэщыIэщтым фэбгъэсэн фае. Мыщ дэжьым ифизическэ зытет мэ­хьанэ зэриIэм дакIоу, социальнэу щыIэныгъэм хэгъэгъозэжьыгъэни фае. Джа едзыгъохэр мы программэм къыдыхэлъытагъэх, — къыIуагъ Урысыем ифондэу «Хэгъэгум иухъума­кIохэр» зыфиIорэм итхьама­тэу Анна Цивилевам.

Шъолъыр фондыр зылъыплъэ­хэрэм ащыщэу Дмитрий Коваленкэр хэушъхьафыкIыгъэ дзэ операцием иветеранхэм азыфагу кибатлетикэмкIэ Урысыем и Первенствэу зэхащагъэм хэ­лэжьагъ. Ащ къызэриIуагъэмкIэ, демобилизованнэ дзэкIолIхэу сэкъатныгъэ зиIэхэр псын­кIэу щыIэныгъэм хэгъозэжьынхэмкIэ а программэм мэхьанэ иI.