Iэшэ зэIуупIэныгъэхэм ахэкIо­дэгъэ дзэкIолIхэм яшIэжь щылэ мазэм и 2-м Мыекъуапэ щагъэлъэпIагъ. Мыекъопэ гарнизоным къыпэблэгъэ мемориалым дэжь Iэшэ зэIуупIэныгъэхэм ахэкIодагъэхэр агу къызыща­гъэкIыжьыгъэ митинг щы­кIуагъ.

Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, Урысыем и ЛIыхъу­жъэу Цэй Эдуард, народнэ депутатхэм я Совет итхьаматэу Джарымэкъо Азмэт, Мыекъуапэ ипащэ игуадзэу, ветеранхэм якъэлэ Совет итхьаматэу Юрий Томчак, хабзэм иреспубликэ, икъэлэ къулыкъу­хэм, иобщественнэ организациехэм ялIыкIохэр, депутатхэр, я 131-рэ мотошхончэо бригадэм иветеранхэр, фэхыгъэ дзэкIолIхэм ягупсэхэр. Джащ фэдэу митингым щыIагъэх генерал-лейтенантэу Константин Пуликовскэр. Ащ ыкъоу капитанэу Алексей ипшъэрылъ ыгъэцакIэзэ Чэчэным щыфэхыгъ, ЛIыхъужъныгъэм иорден къыфагъэшъошагъ.

АР-м и Къэралыгъо Совет – Хасэм и Тхьаматэу Владимир Нарожнэм ипсалъэ къызэрэщыхигъэщыгъэмкIэ, зыцIэ мемориалым тетхэгъэ дзэкIолIхэм Хэгъэгум ыпашъхьэкIэ япшъэрылъ гъэхъа­гъэ хэлъэу агъэцэкIагъ.

— Адыгэ Республикэм и ЛIышъхьэу КъумпIыл Муратрэ Адыгеим и Къэралыгъо Совет – Хасэм идепутатхэмрэ ацIэкIэ лIыхъужъ шъыпкъэхэр зыпIу­гъэхэм лъэшэу тызэрафэразэр къэсэIо. ТэркIэ ахэр гъозэшIух, цIыфыгъэ зэрэпхэлъын, уи Хэгъэгу уфэшъыпкъэн зэрэфаемкIэ ахэр ренэу тищысэтехыпIэх. Адыгэ Республикэр цIыф лIыбланэхэм яхэку, Хэгъэгур къащыгугъэу къызыщыджэрэ лъэхъаным тичIыпIэгъухэр сыдигъуи апэрэ сатырэхэм ахэ— тыгъэх, — къыIуагъ Владимир Нарожнэм.

Ащ зэрэхигъэунэфыкIыгъэмкIэ, илъэс зэфэшъхьафхэм Анголэ, Вьетнам, Афганистан, Абхъазым, Къыблэ Осетием, Сирием ащыкIогъэ заохэм ыкIи бырсыр къызэрыхъухьэгъэ нэмыкI чIыпIэхэм Адыгеим щыщ дзэкIолIыбэ ащыфэхыгъ. Ахэм Конституцием тетэу хабзэр Чэчэным зыпкъ щырагъэуцожьыгъ, дунэе терроризмэмрэ бандитхэмрэ псэемыблэжьэу апэуцужьыгъэх.

— Лъэхъэнэ къинхэм тидзэ­кIолIхэр емыджэнджэшхэу Хэгъэгум иухъумэн Iууцощтыгъэх, Родинэр къагъэгъунэщтыгъ. Джары сыдигъокIи зэрэщытыгъэр ыкIи тапэкIи зэрэщытыщтыр. Урысыем идзэ хэтыгъэ дзэкIолIхэу, офицерхэу Хэгъэгу зэошхом илъэхъан фашистхэр зэхэзыгъэтэкъуагъэхэри непэ тыгу къэтэгъэкIыжьых. Советскэ дзэкIолIхэм яхабзэхэр хэушъхьафыкIыгъэ дзэ операцием хэлажьэхэрэм лъагъэкIуатэ. Ахэм Донбасс пыим щаухъумэ, тарихъ зэфагъэр зыпкъ рагъэуцожьы. Тиреспубликэ щыщхэри ахэм ахэтых. Ахэр бланэу зэрэзаохэрэр дзэ корреспондентхэм къыхагъэщы, къэралыгъо тын лъапIэхэр къафагъэ­шъуашэх. Хэгъэгум иухъумакIохэм, тичIыпIэгъухэм лъэшэу тарэгушхо, — къыIуагъ АР-м и Къэралыгъо Совет —Хасэм и Тхьаматэ.

Генерал-лейтенантэу Константин Пуликовскэм митингым хэлажьэхэрэм апашъхьэ псалъэ къыщишIыгъ.

— Фэхыгъэ дзэкIолIхэм яшIэжь дгъэлъэпIэнэу тыкъызызэрэугъоирэр илъэс 29-рэ хъугъэ. Скъоу Алексей фэхыгъэхэм зэу ащыщ. Ау ар зэрэсикIалэм нэмыкIэу, мы купым ипащэуи сыщытыгъ. Илъэс къэс а хъу­гъэ-шIэгъэ гомыIухэр сыгу къыдехьыежьых. Тыгъэгъазэм и 11-м тэ унашъо къытфашIы­гъагъ рэхьатныгъэу Чэчэным щаукъуагъэр зыпкъ идгъэуцожьынэу. Тыгъэгъазэм и 14-м скъо фэхыгъ, ИлъэсыкIэр къызихьэгъэ чэщым тидзэкIолIхэр, сержантхэр, офицерхэр заохэм ахэкIодагъэх. Мы митингым щыIэ нэбгырабэмэ а пстэури дэгъоу къашIэжьы, а хъугъэ— шIэгъэ гомыIухэм ахэлэжьэнхэ фаеу хъугъагъэхэшъ. Илъэс къэс тэ тыкъызэрэугъои, тигъусэгъэ дзэкIолIхэу фэхы­гъэхэр тыгу къэтэгъэкIыжьых, — къыIуагъ Константин Куликовскэм.

Митингым икIэух дзэ­кIолIхэр шхончыкIэ дэоягъэх. Iофтхьабзэм хэлэ­жьагъэхэр зы такъикърэ фэхыгъэхэм афэшъыгъуа­гъэх, къэгъагъэхэр мемориалым кIэралъхьа­гъэх. Я 131-рэ Мыекъопэ мотошхончэо бригадэм идзэкIолIхэр 1995-рэ илъэсым ищылэ мазэ Грознэм зэрэщыфэхыгъэ­хэм епхыгъэу чIыпIэ заохэм ахэкIодагъэхэм яшIэжь зыщагъэлъэпIэрэ Мафэр илъэс къэс Адыгеим щыхагъэунэфыкIы. А лъэхъаным офице— ри, сержанти, дзэкIолIи 100-м ехъу Чэчэным щыфэхыгъагъ. ДзэкIолI 200-м ехъумэ ацIэхэр мемориалым тетхагъэх.

Александра Балабась.

Сурэтхэр: А. Балабась.