ИлъэсыкIэм иапэрэ мафэхэм къэбар гухэкI зэхэтхыгъ — Адыгеим изаслуженнэ журналистэу Пратэкъо Зубер илъэс 62-рэ ыныбжьэу идунай ыхъо­жьыгъ.

Къоджэ почтальоным иунагъо Зубер къихъухьагъ, еджапIэр дэгъоу къызеух уж Пшызэ мэкъумэщ институтым псэолъэшIынымкIэ ифакультет чIэхьагъ. Охътэ гъэнэфагъэрэ псэолъэшIынми щылэжьагъ.

Журналистикэм ылъэныкъокIэ апэрэ лъэбэкъур зишIыгъэр я 7-рэ классым щеджэ зэхъур ары — урысыбзэмкIэ икIэлэегъаджэ фэгъэхьыгъэу тхэгъагъэ. НахьыжъыIо зэхъум, мы сэнэхьатыр лъигъэкIотагъ, район гъэзетэу «Знамя коммунизма» зыфиIорэм мэкъу-мэщымкIэ иотдел иIофышIагъ. Адыгэкъалэу район гупчэщтыгъэм ар къыщыдэкIыщтыгъэ. Нэужым районыр агощыжьи, Тэхъутэмыкъуае (ОктябрьскэкIэ еджэщтыгъэх) гъэзетэу «По ленинскому пути» зыфиIорэр къыщыдагъэкIэу ауб­лагъ, нэужым «Согласие» фаусыжьыгъ. Ащ Iоф щишIэнэу Зубер къэкIожьыгъ. Бэ темышIэу, иIофшIакIэ уасэ фашIи, Пратэкъо Зубер гъэзетым ипащэу агъэ­нэфагъ.

Адыгеир загъэпсыгъэр илъэсипшI зыщыхъугъэм ипэгъокIэу районым ицIыф пэрытхэм афэгъэхьыгъэ тхылъ ыгъэхьазырынэу район пащэхэм Пратэкъом пшъэрылъ къыфашIыгъ, «Радетели земли тахтамукайской» зыцIэу джырэ уахътэми агъэфедэрэ тхылъыр джаущтэу щыIэ хъугъэ.

1992-рэ илъэсым къыщыублагъэу Зубер депутатхэм ярайон Совет изэIугъэкIэгъу заулэмэ яхэбзэгъэуцоу щытыгъ. Ау ошIэ-дэмышIэу къин къыфыкъокIыгъ — хьылъэу къэсымэджагъ. Редакциер къыбгынэн фаеу хъугъэми, ащ IофшIэныр чIидзыгъэп. ЗиIофшIэн шIу зылъэгъурэ журналистым охътабэ иIэ хъугъэ тхэным фигъэхьынэу. Къыз­щыхъугъэ къуаджэу Щынджые, ащ щыщ­хэм осэшхоу, гуфэбэныгъэу афишIырэр итхылъ къыщыриIотыкIыгъ – «Эхо древних синдов» зэреджагъэр. Джащ фэдэу «Тахтамукай и тахтамукайцы» зыфиIорэр зытхыгъэхэми ахэтыгъ.

Пратэкъо Зубер исэнэхьат хэшIыкI ин фыриIагъ, ащ хьалэлэу фэлэжьагъ, журналистхэм я Союз хэтыгъ, АР-м изаслуженнэ журналист хъугъэ, пре­миеу «Золотое перо Кубани» зыфиIорэр къыфагъэшъошэгъагъ.

ИцIыф гъэпсыкIэкIэ, ишIэныгъэхэмкIэ, Iофым фыщытыкIэу фыриIэмкIэ къахэщыщтыгъ, иIофшIэгъухэм шъхьэкIэфэныгъэрэ лъытэныгъэрэ фашIыщтыгъ. Пратэкъо Зубер ищыIэныгъэ зэрэзэпыугъэр «Адыгэ макъэм» щыла­жьэхэрэм гухэкIышхо ащыхъоу игупсэхэм чIэнагъэу ашIыгъэмкIэ афэтхьаусыхэх. Тхьэм джэнэт лъапIэр къырет.