«ШIоигъоныгъэхэм япцIыикъ чъыг» зыфиIорэ Урысые Iофтхьабзэм хэлажьэзэ Адыгеим и ЛIышъхьэ кIэлэцIыкIухэр зыкIэхъопсыхэрэр афигъэцэкIагъ.

Мы Iофыгъор УФ-м и Президент 2018-рэ илъэсым къырихьыжьагъ ыкIи ащ къыщыублагъэу кIэлэцIыкIу мини 100-м ехъоу щыIэныгъэм чIыпIэ къин ригъэуцуагъэхэм яшIоигъоны­гъэхэр къадэхъунхэмкIэ амалышIу хъугъэ.

Iофтхьабзэр заублагъэм къы­щегъэжьагъэу КъумпIыл Мурат илъэсыкIэ чъыгхэу Кремлым, дунэе къэгъэлъэгъон-форумэу «Урысыем», республикэм и Правительствэ и Унэ ащагъэуцугъэхэм шIоигъоныгъэ-джэгуалъэхэу 6 къапихыгъ. ШIоигъоныгъиплIыр Адыгеим щыпсэурэ кIэлэцIыкIухэм, тIур — Херсон хэкум щыщхэм яягъэх. Мыекъуапэ ыкIи Мыекъопэ районым ащыпсэухэу илъэс 13 зыныбжь Ксение, 14 хъугъэ Сергей ыкIи илъэс 16 зыныбжь Залинэ кушъхьэфачъэ фэягъэх. ПсэупIэу Тульскэм дэс Максимэу илъэси 8 зыныбжьыр пульткIэ агъэIорышIэрэ машинэ джэгуалъ зыкIэхъопсыщтыгъэр.

Херсон хэкум щыщхэу илъэс 15 зыныбжьхэ Ольгэрэ Софиерэ гитарэ фэягъэх.

Республикэм щыпсэухэрэм яшIухьафтынхэр волонтерхэмрэ ЛIыжъ ЩтыргъукIымрэ афащэжьыгъахэх. Херсон хэкум исхэм Адыгеим и ЛIышъхьэ ишIухьафтынхэр анэзыгъэсыжьыгъэхэр Геническэ районым республикэм илIыкIоу щыIэ Хъоткъо Хъызыр.

«МэфэкI мафэхэм тэркIэ мэхьанэшхо иI сабыйхэм агу цIыкIухэр насыпым зэлъиштэнхэм. Ахэр зыкIэхъопсырэр къадэхъуным пае тфэлъэкIыщтыр зэкIэ тшIэщт. Ащыщыбэ щыIэныгъэм чIыпIэ къин ригъэуцуагъ. Зыхэм япсауныгъэ къыщыкIагъ, адрэхэм ятэхэр хэу­шъхьафыкIыгъэ дзэ операцием щыIэх, ащыщхэм ны-тыхэр яIахэхэп. Сицыхьэ телъ мы IофтхьэбзэшIум тисабыйхэр нахьышIум зэрэфищэщтхэм имызакъоу, тэри, нахьы­жъхэми, тишIулъэгъуныгъэкIэ, тигуфэбэ­ныгъэкIэ нэмыкIхэм тадэгощэным тызэрэфигъэсэщтым», — къыхигъэщыгъ КъумпIыл Мурат.

«ШIоигъоныгъэхэм япцIыикъ чъыг» джащ фэдэу хэлажьэх АР-м и Къэралыгъо Совет —Хасэм идепутатхэр, АР-м иминистрэхэм я Кабинет хэтхэр, общественнэ, федеральнэ ыкIи шъолъыр хэбзэ IофышIэхэр.

Iофтхьабзэр икIыгъэ илъэсым ишэкIогъу мазэ и 15-м аублагъ, мы илъэсым имэзае и 28-м нэс кIощт. «Движение первых» зыфиIорэм ыкIи Урысыем иныбжьыкIэхэм анаIэ тетэу ар макIо. Сэкъатныгъэ зиIэ сабыйхэр, зипсауныгъэкIэ щыкIагъэ зиIэхэр, зигъот макIэхэр, сабый ибэхэр, хэушъхьафыкIыгъэ дзэ операцием хэлажьэхэрэм якIэлэцIыкIухэр, Урысыем ишъолъырыкIэхэм ащыпсэухэрэр Iофтхьабзэм хэлэжьэшъущтых. Ащ пае кIэлэцIыкIум е ащ илIыкIо официальнэ сайтэу елка желаний.рф лъэIу тхылъ щитхын фае.

Cурэтхэр; М. Гордышов.