ИлъэсыкIэм ипэгъокIэу къэралыгъо ыкIи муниципальнэ фэIо-фашIэхэр лъэныкъуабэкIэ зыгъэцэкIэрэ Унэгъо гупчэ ( Семейный МФЦ) апэрэу Мыекъуапэ къыщызэIуахыгъ. Ар цIыфхэм социальнэ фэIо-фашIэхэр языгъэгъотырэ Зэхэубытэгъэ гупчэм хэхьэ.

КIэлэцIыкIухэр зэрыс унагъохэм ящыкIэгъэ медицинэ, психологическэ, педагогическэ, юридическэ, социальнэ IэпыIэгъур шIуагъэ къытэу зы чIыпIэм ащыфызэхэщэгъэныр гупчэм ипшъэрылъ шъхьаIэхэм ащыщ. Ащ пае унагъор щыIэныгъэм зэригъэуцогъэ чIыпIэм елъытыгъэу фагъэцэкIэщт фэIо-фашIэхэм япхыгъэу республикэм ит къэралыгъо учреждение зэфэшъхьафхэм зэзэгъыныгъэ 84-мэ Унэгъо гупчэр адыкIэтхагъ. IэпыIэгъу зэфэшъхьафхэр языгъэгъотыщтхэ IофышIэ нэбгырэ 11 мы гупчэм Iут.

Къэралыгъо ыкIи муниципальнэ фэIо-фашIэхэр лъэныкъуабэкIэ зыгъэцэкIэрэ (МФЦ) Унэгъо гупчэхэр къызэIухыгъэнхэмкIэ пилотнэ проектым Адыгеир хэлажьи, сомэ миллиони 8-м ехъу ахъщэ къыфэкIуагъ. Ащ ишIуагъэкIэ апэрэ Унэгъо гупчэр икъоу IофшIэным фызэтырагъэпсыхьагъ: яIоф зэхафыфэ зыщежэхэрэ залыр, джэгупIэ кIэлэцIыкIу унэр, социальнэ фэIо-фашIэхэр зэрафагъэцэкIэщт мультимедийнэ ыкIи джэгун оборудованиер, цифрэ амалхэр, къэбар порталэу «Къэралыгъо фэIо-фашIэхэр» ащ иIэх.

— КIэлэцIыкIухэр зэрыс унагъохэм ящыIэныгъэ изытет нахьышIу шIыгъэным Унэгъо гупчэр фэIорышIэщт. Социальнэ IофышIэхэм къэралыгъо учреждениехэм ыкIи къулыкъухэм зэпхыныгъэ адыряIэу «зы шъхьаныгъупчъэ» шIыкIэм тетэу ящыкIэгъэ фэIо-фашIэхэр мы Гупчэм щафагъэцэкIэщтых, — къыIуагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.

Гупчэм иапэрэ IофшIэгъу мафэ зыкъыфэзыгъэзагъэхэм ащыщ сабыибэ зиIэ Алевтина Герасименкэр.

— Сэ Iофыгъо зэфэшъхьафхэм япхыгъэу гупчэм сыкъэкIуагъ. АпэрэмкIэ, Iоф зэрэсшIэгъэ илъэсхэр зыдэтхэгъэ тхылъым иэлектроннэ теплъэ къысIэкIагъэхьан фае, джащ фэдэу сикIалэу апэрэ классым щеджэрэм психологическэ IэпыIэгъу ищыкIагъ. Чэзыумэ сахэмытэу, чIыпIэ зэфэшъхьафхэри къэсымыкIухьэхэу, ащ дакIоу сабыеу скIыгъури зыщыджэгун чIыпIэ щыIэу сиIофыгъохэр къысфызэшIуахыгъэх, социальнэ координаторхэм ищыкIэгъэ къэбарыр игъэ­кIотыгъэу зэхэфыгъэу къысфаIотагъ. Унэгъо гупчэр зэрэIэрыфэгъур сицыхьэ телъэу къэсIон слъэкIыщт, — хигъэунэфыкIыгъ Алевтина Герасименкэм.

ЦIыфхэм социальнэ фэIо-фашIэхэр языгъэгъотырэ Зэхэубытэгъэ гупчэу Мыекъуапэ дэтым ипащэ игуа­дзэу Елена Бирюковам къызэриIуагъэмкIэ, ясоциальнэ учет зипсауныгъэ амалхэр зэщыкъогъэ ыкIи сэкъатныгъэ зиIэ кIэлэцIыкIу 40 фэдиз хэт. Iофтхьэбзэ зэфэшъхьафэу Зэхэубытэгъэ гупчэм зэхищэхэрэм илъэс зэкIэлъыкIохэм ахэр чанэу къахэлажьэх. Джы мы кIэлэцIыкIухэм ящыкIэгъэ социальнэ, педагогическэ, психологическэ ыкIи медицинэ IэпыIэгъур Унэгъо гупчэм щарагъэгъотыщт.

Iэшъынэ Сусан.