Спортсмени 100-м ехъу хэлэжьагъ
БоксымкIэ зэIухыгъэ турнирэу Красногвардейскэ районым щыкIуагъэм Адыгэ Республикэм ыкIи Краснодар краим яспортсменхэр хэлэжьагъэх, ахэр нэбгыри 100-м ехъущтыгъэх.
Зэфэхьысыжьхэм къызэрагъэлъэгъуагъэмкIэ, чIыпIэ боксерхэм гъэхъэгъэшIухэр ашIыгъэх, апэрэ чIыпIибл къыдахыгъ. Ахэм ащыщэу Иван Дьячковыр боксер анахь дэгъоу зэнэкъокъум еплъыгъэхэм къыхахыгъ ыкIи ахъщэ шIухьафтын фагъэшъошагъ. ЗэхэщакIохэм зэрагъэнэфагъэмкIэ, лъэныкъоу «Боксер анахь дэгъу» зыфиIорэм текIоныгъэр къыщыдихыгъ Адыгэкъалэ щыщ Пщыпый Мурат. Техникэ анахь дахэ къэзыгъэлъэгъуагъэр Шытхьалэ илIыкIоу Давид Ашанян. Джащ фэдэу къахагъэщыгъэхэм ащыщ Мыекъуапэ щыпсэурэ Уджыхъу Нарт. Мыхэм зэкIэми кубокхэр ыкIи ахъщэ шIухьафтынхэр афагъэшъошагъэх.