Мы илъэсымкIэ апэрэ зэнэкъокъу
Мыекъуапэ, Адыгэкъалэ ыкIи къуаджэу Нэшъукъуае яспортсменхэр Христос къызыхъугъэ мафэм фэгъэхьыгъэ турнирэу Лабинскэ щыкIуагъэм хэлэжьагъэх ыкIи медальхэм афэбэнагъэх. Мызыгъэгум кIэлэ ыкIи пшъэшъэ ныбжьыкIэхэр зэнэкъокъугъэх. Мыекъуапэ испорт еджапIэу С.М. Джэнчатэм ыцIэ зыхьырэм зыщызыгъэсэрэ нэбгыритф республикэм икъэлэ шъхьаIэ илIыкIуагъэх. АнахьыкIэхэм якуп хэтыгъэ Адам Матюшиным текIоныгъэр къыдихыгъ, Бзаго Дамир ящэнэрэ хъугъэ. Зыныбжь илъэс 14-м шIомыкIыгъэхэм якуп хэтыгъэ Артем Вариводиным зэIукIэгъуи 6 иIагъ, ахэр зэкIэри къыхьыгъэх ыкIи апэрэ чIыпIэр къыдихыгъ. КIалэхэр зыгъасэхэрэр Бзаго Рустам.
Пшъашъэхэм язэнэкъокъу къащыхэщыгъ къуаджэу Нэшъукъуае щыщ Чэтэо Альбинэ, ащ текIоныгъэр къыдихыгъ. Мы куп дэдэм хэтыгъэ Адыгэкъалэ щыпсэурэ Пэнэшъу Мадинэ ящэнэрэ чIыпIэр къыфагъэшъошагъ. Пшъашъэхэм ятренерых КIыкI Бислъанрэ Ешыгоо Мухьтаррэ.