Илъэс тIокIым ехъугъэу цумпэ къэгъэкIыным пылъ Мыекъопэ рай­о­ным ит поселкэу Тимирязевэм щыщ Инна Савосько. ИлъэсиплIкIэ узэкIэIэбэжьмэ ежевики ыгъэтIысхьагъ.

Иннэ къызэрэтиIуагъэмкIэ, 1998-рэ илъэсыр ары апэрэ цумпэ куашэхэр зигъэтIысхьэгъагъэхэр. Ащыгъум ежь ихатэ къыщигъэкIыщтыгъэх. Илъэс къэс цумпэу ыгъэтIысхьэрэм хигъахъозэ зызеушъомбгъум, мэкъумэщ-фермер хъызмэтшIапIэ ыгъэпсыгъ.

2017-рэ илъэсым къэралыгъо IэпыIэгъур Иннэ ыгъэ­федагъ. Мэкъумэщ хъызмэтыр мылъку къэкIуапIэу къыхэзыхыгъэхэм грантхэр ятыгъэнхэм фэгъэхьыгъэ программэу «Езгъэжьэгъэ­кIэ фермер» зыфиIорэм хэлажьи сомэ миллионрэ мин 300-рэ къыратыгъагъ.

— Ар лъэшэу ­къыэтшъхьэпагъ, — ыIуагъ ащ. — Тхылъэу ищыкIагъэхэм ягъэпсыни Iофыбэ къыпыкIыгъэп, мэкъумэщ хъыз­мэтымкIэ район ГъэIорышIапIэм испециалистхэр къыддеIэгъагъэх. Программэм о уиIа­хьэу хэплъхьащтыр пIэкIэлъынэу къы­дэлъытагъ. Арышъ, ар пфэугъоимэ ухэлэжьэн фаеу сэлъы­тэ. Ахъщэу къытатыгъэмрэ тэ тиIагъэмрэ зэхэдгъахъохи фэбапIэхэр тшIыгъэх, рассадэхэр къэтщэфыгъэх.

Непэ Иннэ цумпэр фэбапIэхэми къащегъэкIы, ахэм ачIэмытэуи иIэх. Зы куашэм грамм 400 — 500 къеты. Ар мыдэеу еIо фермерым. Мыгъэ тонни 2,5-рэ къаугъои Iуагъэ­кIыгъ. Цумпэр зыпарэми ащэ­рэп, сатыу зы­шIыхэрэр къакIо­хэзэ хьасэм щащэфы.

КъызэрэтIуагъэу, илъэсиплIыкIэ узэкIэIэбэжьмэ ежевикэр агъэтIысхьэгъагъ. ЫпэрапшIэу мы цумпэ лъэпкъым икъэгъэ­кIын опыт щызиIэхэр упчIэжьэгъу ашIыхи, ахэм къараIуагъэм тетэу кошэ цIыкIухэр Респуб­ликэу Къырым къыращыгъагъэх. Ар чIыгоу зыхагъэтIысхьагъэм мыдэеу екIугъ, илъэсищ зытешIэ ужым дэгъоу къыпыкIэнэу ригъэжьагъ. Иннэ тызэрэ­щигъэгъо­загъэмкIэ, охътэ зэфэшъхьаф­хэм IуагъэкIын яIэным фэшI жьэу къэхъурэ лъэпкъхэри, кIа­сэу зигъо хъухэрэри, ахэм азыфагу къифэу къызпыкIэхэрэри агъэтIысхьагъэх.

А зэпстэумэ анэмыкIэу цумпэ ыкIи ежевикэ гъэтIысыжьхэр къызщагъэкIырэ питомник агъэ­псыгъ. Ащ лъэпкъ зэфэшъхьафыбэ дэт, ежьхэм агъэтIысхьащтыр къызэрахахырэм имыза­къоу сатыу зэрашIыни яI.

— Цумпэм, ежевикэм чIыгоу ядгъэубытырэм тапэкIи хэдгъэ­хъонэу тыфай, нэмыкIхэри дгъэтIысхьэхэмэ тшIоигъу, — ыIуагъ Иннэ тапэкIэ гухэлъэу яIэхэм тызакIэупчIэм.

ЗэкIэ агу илъыр къадэхъунэу тэри тафэлъаIо, илъэ­сыкIэу къихьагъэмкIэ тафэгушIо!