Процент 95-м гъэстыныпхъэ шхъуантIэр агъэфедэ
Адыгеир ары зигугъу тшIырэр. Iахьзэхэлъ обществэу «Газпром межрегионгаз Майкоп» зыфиIорэм ипресс-къулыкъу тызэрэщигъэгъозагъэмкIэ, республикэм исым ипроцент 95-мэ мы гъэстыныпхъэр яI.
Iахьзэхэлъ обществэу «Газпром» зыфиIорэм ипрограммэу гъэстыныпхъэ шхъуантIэр цIыфхэм аIэкIэгъэхьэгъэным фэгъэхьыгъэм Адыгеир зыхэлажьэрэр 2002-рэ илъэсым къыщыублагъ. Зэрэзэдэлэжьэщтхэм фэгъэхьыгъэ тхылъым лъэныкъуитIур зыкIэтхагъэр 2007-рэ илъэсыр ары. 2011-м Адыгеим газ зимыIэу исхэм аIэкIэгъэхьэгъэнэу зэзэгъыныгъэ зэдашIыгъ.
2002 — 2022-рэ илъэсхэм сомэ миллиардрэ миллион 600-м ехъу инвестициеу «Газпромым» республикэм къыхилъхьагъ. АщкIэ псэупIэхэр зэзыпхыхэрэ газрыкIопIэ 22-рэ ашIыгъ, ар километрэ 219,3-рэ мэхъу, унэ 5905-мэ гъэстыныпхъэ шхъуантIэр аIэкIэгъэхьэгъэным пае котельнэ 38-рэ агъэуцугъ.
«Догазификацием» фэгъэхьыгъэ программэр 2021-рэ илъэсым ибэдзэогъу мазэ Адыгеим щыпхыращынэу рагъэжьагъ. «Газпром межрегионгаз Майкоп» зыфиIорэм ипресс-къулыкъу къызэритыгъэмкIэ, а уахътэм гъэстыныпхъэ шхъуантIэр зимыIэу, ар ищагу ращэлIэным пае лъэIу тхылъ къэзытыгъэр 9900-м ехъу. Ащ щыщэу 8000-м ехъумэ компаниер зэзэгъыныгъэм адыкIэтхагъ, зэкIэми ягъунапкъэхэм афыращэлIагъ, унэм рищагъэу зыгъэфедэрэр 9380-м ехъу. Социальнэ псэуалъэхэм газыр ящэлIэгъэным фэшI лъэIу тхылъи 10 къатыгъ.
Урысые политическэ партиеу «Единэ Россиер» мы программэм кIэщакIо фэхъугъ, УФ-м и Президент къадыригъэштагъ. Владимир Путиным псэупIэу гъэстыныпхъэ шхъуантIэр зыдэщагъэхэм ар зимыIэу адэсхэм ящагу гъунапкъэхэм ыпкIэ хэмылъэу газыр афынагъэсынэу пшъэрылъ къышIыгъ. ЦIыфхэм ежьхэм яунэ зэрэращэлIэщтымрэ зэрэщызэбгыращыщтымрэ зыпкIэ атырэр.
2005 — 2020-рэ илъэсхэм ателъытэгъэ программэу Адыгеим гъэстыныпхъэ шхъуантIэр щызэбгырыщыгъэным фэгъэхьыгъэм къызэрэщыдэлъытагъэу, сомэ миллиардрэ миллион 300-м ехъурэ инвестициеу компанием республикэм къыхилъхьагъ. АщкIи псэупIэхэр зэзыпхыхэрэ газрыкIопIэ 21-рэ ашIыгъ, ар километрэ 204-рэ мэхъу.
2020-рэ илъэсым ичъэпыогъу мазэ Iахьзэхэлъ обществэу «Газпром» зыфиIорэм ипащэу Алексей Миллеррэ АР-м и ЛIышъхьэу КъумпIыл Муратрэ 2021 — 2025-рэ илъэсхэм ателъытэгъэ зэзэгъыныгъакIэм зэдыкIэтхагъэх. Республикэм гъэстыныпхъэ шхъуантIэ зимыIэу исхэм аIэкIэгъэхьэгъэным джыри сомэ миллиони 3,1-рэ компанием пэIуигъэхьанэу ащ къыщыдэлъытагъ. «Газпромым» гъэстыныпхъэ шхъуантIэм икIуапIэхэр псэупIэхэм арищэлIэщтых, урамхэм ащызэбгырищыщтых, республикэм и Правительствэ цIыфхэм яхьакухэр газыр ящэлIэгъэным фэгъэхьазырыгъэнхэр ыпшъэ рилъхьажьыгъ.
Программэм къызэрэщыдэлъытагъэмкIэ, социальнэ мэхьанэ зиIэ псэолъэ 21-рэ ашIыщт, Мыекъопэ, Тэхъутэмыкъое, Джэджэ, Красногвардейскэ, Шэуджэн ыкIи Теуцожь районхэм япсэупIэ 19-мэ гъэстыныпхъэ шхъуантIэр арищэлIэщт, ащызэбгыращыщт. Джащ фэдэу индустриальнэ паркхэу «Яблоновский», «Новый Сад» зыфиIохэрэм гъэстыныпхъэ шхъуантIэр зэбгырызытIупщырэ станциехэмрэ ар зэрыкIощтхэмрэ ащыгъэуцугъэныр къыдэлъытагъ.