Къэралыгъо Советым изэхэсыгъоу егъэджэкIо-гъэсакIом имэхьанэ зыкъегъэIэтыгъэным фэгъэхьыгъэр Урысыем и Президентэу Владимир Путиным непэ Кремлым щызэрищагъ. АР-м и ЛIышъхьэу КъумпIыл Мурат ащ хэлэжьагъ.

[caption id="attachment_143722" align="aligncenter" width="800"] Кремлин. ру[/caption]

Илъэсэу икIырэм икIэуххэр зэхэсыгъом щызэфахьысыжьыгъэх, кIэлэцIыкIухэм яегъэджэнкIэ ыкIи япIункIэ, шIэныгъэ куу ахэм ягъэгъотыгъэнымкIэ зигъо Iофыгъо­хэм, кадрэ ныбжьыкIэхэр гъэсэныгъэм къыхэщэгъэнхэ, кIэлэегъаджэм уасэу ратырэм зыкъегъэIэтыгъэн зэрэфаем щатегущыIагъэх.

Къэралыгъо Советым изэхэсыгъо къызэIуихызэ, УФ-м и Президент хэушъхьафыкIыгъэ операцием хэлэжьэрэ тидзэкIолIхэр езыгъэджагъэхэмрэ зыгъасэхэрэмрэ лъэшэу зэрафэразэр къыIуагъ. «Урысые егъэджэкIо цIэрыIоу Константин Ушинскэм зэриIощтыгъэу, апэрэ еплъыгъомкIэ къызэрыкIоу къып­шIошIыми, пIуныгъэ Iофыр мэхьанэ ин дэдэ тарихъым зыщыратырэ лъэныкъохэм зэу ащыщ. НыбжьыкIэхэм ядунэееплъыкIэ зыпкъ иуцонымкIэ гъэ­сакIом мэхьанэу иIэм фэгъэхьыгъэу ащ бэ ытхыгъэр. Непэ тэ ащ фэдэ хабзэхэм къафэтэгъэзэжьы. Гурыт, апшъэрэ еджапIэхэм, техникумхэм, колледжхэм пIуныгъэ Iофтхьабзэу ащызэрахьэщтыгъэхэр зыпкъ итэгъэуцожьых. Егъэджэныр нахьышIоу зэхэщэгъэн, пэрыт технологиехэр гъэсэныгъэм щыгъэфедэгъэнхэ зэрэфаем фэдэу, тисуверенитеткIэ ащ мэхьанэшхо иI», — къыIуагъ Президентым.

ЛэжьэпкIэшхо къагъэхъэнымкIэ, цIыфхэм, Урысыем ис унагъохэм ящыIэкIэ-псэукIэ зыкъегъэIэтыгъэнымкIэ гъэсакIохэм мэхьанэшхо зэряIэм къэралыгъом ипащэ зэхэсыгъом хэлажьэхэрэм анаIэ тыраригъэдзагъ.

«Илъэсым игъэсэкIо анахь дэгъу» зыфиIорэ шIухьафтыныр илъэс къэс аратынэу Владимир Путиным игъо ылъэгъугъ.

«Щытхъу тамыгъэу «За наставничество» зыфиIорэр Урысыем защыфагъэшъуашэрэр илъэси 5 хъугъэ. Гъэ­сакIохэм ястатус зыкъегъэIэтыгъэнымкIэ лъэбэкъу гъэнэфагъэхэр тишъолъырхэм ащашIын фае. СиIофшIэгъухэу мы зэхэсыгъом хэлажьэхэрэми, УФ-м ишъолъыр­хэм япащэхэми ащкIэ зафэсэгъазэ», — къыIуагъ Урысыем ипащэ.

КIэлэегъаджэхэм ялэжьапкIэ зыкъегъэIэтыгъэным екIолIэкIэ зыкI къыфагъотынэу, классхэм япащэхэм япшъэрылъхэр нахь агъэнэфэнхэу, творческэ амал дэгъу зиIэ ныбжьыкIэ чанхэр нахь игъэкIотыгъэу гъэсэ­ныгъэм иIоф къыхагъэлэжьэнхэу В. Путиным пшъэ­рылъ афишIыгъ.

Зэхэсыгъом къыщыгущыIагъэх УФ-м и Правительствэ и Тхьаматэ игуадзэу Татьяна Голиковар, УФ-м гъэсэныгъэмкIэ иминистрэу Сергей Кравцовыр, лъэныкъоу «ГъэсэныгъэмкIэ» Къэралыгъо Советым икомиссие итхьаматэу, Севастополь игубернаторэу Михаил Развожаевыр, политическэ партиехэм япащэхэр, общественнэ IофышIэхэр, кIэлэегъаджэхэр, хэушъхьафыкIыгъэ дзэ операцием хэлажьэхэрэр зыгъасэхэрэр.

АР-м и ЛIышъхьэу КъумпIыл Мурат зэхэсыгъом икIэуххэм къатегущыIэзэ зэрэхигъэунэфыкIыгъэмкIэ, егъэджэкIо-гъэсакIом и Илъэс джыри зэ агу къыгъэ­кIыжьыгъ къыткIэхъухьэрэ ныбжьыкIэхэм яегъэджэнрэ япIунрэ пшъэдэкIыжьышхо зыпылъ, пшъэрылъ лъапIэу зэрэщытыр.

КъумпIыл Мурат къызэрэхигъэщыгъэмкIэ, мы лъэныкъомкIэ бэ ашIагъэр. Ау УФ-м и Президент ипсалъэ къыщигъэнэфэгъэ пшъэрылъхэм ащыщэу джыри бэ зэшIохыгъэн фаер. КIэлэегъаджэхэм, кIэлэпIухэм, гъэ­сакIохэм IэпыIэгъу афэхъугъэнымкIэ, ахэр яIофшIэн кIэгъэгушIугъэнхэмкIэ амалхэр Адыгеим щызэрахьэх. КIэлэегъэджэ ныбжьыкIэхэм гурыт еджапIэм Iоф щашIэнымкIэ амал тедзэхэр зэрахьэх. КIэлэегъаджэхэр зэрафимыкъущтыгъэр дэгъэзыжьыгъэным тегъэпсыхьагъэу республикэм ипедагогическэ классхэм ахэхъуагъ, джыдэдэм ащ фэдэ класс 19 Адыгеим иI. Къэралыгъо программэу «Къоджэ кIэлэегъадж» зыфиIорэм диштэу илъэси 5-м къыкIоцI кIэлэегъэджэ 49-мэ республикэм икъоджэ еджапIэхэм Iоф ащашIэу рагъэжьагъ. АКъУ-м иапшъэрэ курсхэм арыс студент 20-мэ Адыгеим икъуа­джэхэм ягурыт еджапIэхэм акIуачIэ ащаушэты. Хэушъхьа­фыкIыгъэ дзэ операцием хэлэжьэрэ ветеранхэр зыгъэсагъэхэр ныбжьыкIэхэм япатриотическэ пIуныгъэ къыхагъэлажьэх.

АР-м и ЛIышъхьэ зэрэхигъэунэфыкIыгъэмкIэ, гъэсэныгъэм, кIэлэегъаджэхэм мэхьанэу аратырэм зыкъе­гъэIэтыгъэнымкIэ республикэм бэ щашIэрэр. Лъэпкъ проектхэмрэ къэралыгъо программэхэмрэ адиштэу илъэс къэс Адыгеим гурыт еджапIэхэр, кIэлэцIыкIу IыгъыпIэхэр щагъэпсых, щагъэцэкIэжьых; кIэлэеджакIо­хэм ягъэхьазырынкIэ научнэ-технологическэ лъапсэм зырагъэушъомбгъу. Республикэм гъэсэныгъэмкIэ иучреждениехэм федеральнэ къэралыгъо шэпхъакIэхэмрэ федеральнэ программэ шъхьаIэхэмрэ ащагъэфедэх.

Сэнэхьатым икъыхэхынкIэ, опыт пэрытым игъэфедэнкIэ Президентым къыгъэнэфэгъэ пшъэрылъхэм ягъэцэкIэнкIэ Адыгеим амалхэр иIэх. Федеральнэ проектэу «Профессионалитет» зыфиIорэм ишIуагъэкIэ мыгъэ АКъУ-м зекIонымкIэ ыкIи Адыгеим щагъэцэ­кIэщт фэIо-фашIэхэмкIэ гъэсэныгъэ гупчэ къыщызэIуа­хыгъ. Къихьащт илъэсым МКъТУ-м гурыт сэнэхьат гъэсэныгъэ языгъэгъотыщт медицинэ кластерэу «ПрофиМед» зыфиIорэр къыщызэIуахыщт.

«ЕгъэджэкIо-гъэсакIом и Илъэс тематическэ Iофтхьабзэхэр, зэнэкъокъухэр, мастер-классхэр бэу Адыгеим щызэхащагъэх. Гъэсэныгъэм ылъэныкъокIэ Iофэу агъэцакIэрэм хэпшIыкIэу хэхъуагъ. Ау пшъэрылъэу щыIэр джыри бэ, республикэм икIэлэегъаджэхэм тырягъусэу ахэм язэшIохын ыуж тит. Хэгъэгум и Президент къыгъэнэфэгъэ пшъэрылъхэмрэ игъоу ылъэгъу­гъэхэмрэ дгъэцэкIэщтых, кIэлэегъаджэхэр яIэнатIэ щылъыкIотэнхэу амал ядгъэгъотыщт, кIэлэегъаджэм мэхьанэу ратырэм зыкъегъэIэтыгъэным ыуж титыщт, шIэныгъэ куу ягъэгъотыгъэным кIэлэеджакIохэр кIэдгъэ­гушIущтых», — къыIуагъ АР-м и ЛIышъхьэ.

Шъугу къэтэгъэкIыжьы мы аужырэ илъэси 6-м къы­кIоцI Адыгеим гурыт еджэпIи 4 зэрэщашIыгъэр, джыдэдэм еджэпIи 6-мэ ягъэпсын ыуж зэритхэр, кIэлэцIыкIу IыгъыпIэ 19 зэрагъэпсыгъэр. Къоджэ еджапIэхэм гъэсэныгъэмкIэ гупчэхэу «Точка роста» зыфиIохэрэм афэдэу 89-рэ къащызэIуахыгъ. КIэлэцIыкIу технопарки 4-мэ, «IT-куб» зыфиIорэ гупчи 2-мэ Iоф ашIэ. ИлъэситIум къыкIоцI гурыт еджэпIэ 15-мэ гъэцэкIэжьын IофшIэнхэр арашIылIагъэх.