Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу АР-м иминистрэхэм я Кабинет изэхэсыгъоу илъэсым Iофэу ашIа­гъэм икIэуххэм афэгъэхьыгъагъэр зэрищагъ АР-м иминистрэхэм я Кабинет и Тхьаматэу КIэрэщэ Анзаур.

Зэхэсыгъом иIофшIэн хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэ игуадзэу ЛIыхэсэ Махьмуд, хабзэм ифедеральнэ ыкIи ишъолъыр къулыкъухэм яIэшъхьэтетхэр, муниципалитетхэм япащэхэр.

Лъэпкъ проектэу «Псауныгъэр къэ­ухъумэгъэныр» зыфиIорэм игъэцэкIэн зэрэкIорэм, унэгъо фермэхэм хэхъоныгъэу ашIырэм, къэралыгъо автоматизированнэ системэм уплъэкIокIо къулыкъухэм Iофэу щагъэцакIэрэм, шъолъырым исхэм IофшIэн агъотынымкIэ IэпыIэгъу зэрафэхъухэрэм япхыгъэ Iофыгъохэм мыщ щатегущыIагъэх.

АР-м псауныгъэм икъэухъумэнкIэ иминистрэу Мэрэтыкъо Рустем къызэриIуагъэмкIэ, лъэпкъ проектэу «Псауныгъэр къэухъумэгъэныр» зыфиIорэм къызэрэдилъытэрэмкIэ, 2030-рэ илъэсым ехъулIэу цIыфхэм гурытымкIэ къагъашIэрэр илъэс 80-м шъхьадэкIынэу ары.

Мы илъэсым лъэпкъ проектыр пхырыщыгъэным пае республикэм сомэ миллион 440-м ехъу къыфыхагъэкIыгъ. Мылъкур зыпэIухьагъэр пэублэ медикэ-санитарнэ IэпыIэгъу ятыгъэныр, гу-лъынтфэ узхэм ыкIи онкологием апэшIуекIорэ бэнэныгъэр гъэлъэшыгъэ­ныр, сымэджэщхэр Iэмэ-псымэхэмкIэ, Iэзэгъу уцхэмкIэ, кадрэхэмкIэ зэтегъэ­псыхьэгъэнхэр, кIэлэцIыкIухэм япсауныгъэ къэухъумэгъэныр, цифрэ шIыкIэм зегъэушъомбгъугъэныр ыкIи пэублэ звенэр уахътэм диштэу зэхэщэгъэныр ары.

КъызэрэхагъэщыгъэмкIэ, респуб­ликэм агъэкощырэ медицинэ комплекси 7-мэ ыкIи санитар авиацием Iоф щашIэ. Нэбгырэ мин 300-м ехъумэ япсауныгъэ изытет ауплъэкIугъ. Гу-лъын­тфэ узхэм апэшIуекIогъэным ипроект къызэрэдилъытэрэм тетэу медицинэ учреждении 3 медицинэ Iэмэ-псымэхэмкIэ дэгъоу зэтырагъэ­псыхьагъ. Псауныгъэм икъэухъумэн епхыгъэ псэолъи 5 пэублэ звенэм щашIыгъ, ахэм ащыщэу 3-р атIупщыгъах. Псэолъи 2-мэ игъэкIотыгъэ гъэцэкIэжьынхэр арашIылIагъэх, медицинэ Iэмэ-псымэхэр ыкIи автомобиль 14 къащэфыгъ.

Зэхэсыгъом джащ фэдэу къыщыгущыIагъ АР-м мэкъу-мэщымкIэ иминистрэу Къуанэ Анзаур. Республикэ къэралыгъо программэм тегъэпсыхьагъэу унэгъо фермэхэм хэхъоныгъэ ягъэшIыгъэным ар къытегущыIагъ.

КъызэрэхигъэщыгъэмкIэ, унэгъо былымхъуным грант IэпыIэгъоу ратырэр мы илъэсым фэди 3,7-кIэ нахьыбэ ашIын алъэкIыгъ ыкIи сомэ миллиони 121-м ар шIокIыгъ. Грантыр къаратыным кIэдэун зылъэкIыщтхэр хъызмэтшIапIэхэу илъэсым нахь мымакIэу Iоф зышIэхэрэр, хэбзэIахьхэмкIэ чIыфэ зытемылъхэр, проектым тефэщтым ипроцент 40-м нахь мымакIэу къыхэзылъхьан ыкIи IофшIэпIэ чIыпIэ пчъагъэу ящыкIэгъэщтыр изыгъэкъун зы­лъэкIыщтхэр ары. Мы илъэсэу икIырэм иублэгъум къыщегъэжьагъэу проекти 6-мэ къадырагъэштагъ. Грантэу къаратыгъэмкIэ щэ фермэ, чэтэхъо фабрикищ, складхэр ашIыгъэх, былымпIэшъэ 280-рэ къащэфыгъ, IофшIэпIэ чIыпIэ 12 зэхащагъ, агъэфедэщт Iэмэ-псымэхэр къащэфыгъэх.

АР-м иминистрэхэм я Кабинет и Тхьаматэ анахьэу къыхигъэщыгъэр электрон шIыкIэм тетэу цIыфхэм фэIо-фашIэхэр аIэкIэгъэхьэгъэнхэм респуб­ликэм и ЛIышъхьэ екIолIакIэу фыриIэр ары. УплъэкIун-лъыплъэн Iофтхьабзэхэм япхыгъэу ар щыт. Мы Iофыр зэшIохыгъэ хъуным пае гъогу картэр зэхэгъэуцогъэн, цIыфхэм ялъэIу тхылъхэм къапкъырыкIыхэзэ, анахь мэхьанэ зиIэ, пстэуми апэу зэшIохыгъэн фэе Iофыгъохэр гъэнэфэгъэнхэ фае.

Зэхэсыгъом икIэухым министрэхэм я Кабинет хэтхэм Iофэу ашIагъэм пае зэрафэразэр КIэрэщэ Анзаур къы­Iуагъ. Ащ дакIоу АР-м и Къэралыгъо Совет – Хасэм идепутатхэм гъэцэкIэкIо хабзэм икъулыкъухэм шIуагъэ къэзытырэ зэдэлэжьэныгъэ зэрадыряIагъэм пае министрэхэм я Кабинет зэрафэразэр шъхьафэу къыхигъэщыгъ.