Мы илъэсымкIэ аужырэ зэхэсыгъу
АР-м и Къэралыгъо Совет — Хасэм мы илъэсымкIэ аужырэ зэхэсыгъо непэ иIагъ. Iофтхьабзэр зэрищагъ Парламентым и Тхьаматэу Владимир Нарожнэм.
[caption id="attachment_143715" align="aligncenter" width="800"] А. Гусев[/caption]
Зэхэсыгъом хэлэжьагъэх АР-м и ЛIышъхьэу КъумпIыл Мурат, министрэхэм я Кабинет хэтхэр, федеральнэ ыкIи республикэ къулыкъухэм япащэхэр, нэмыкIхэр.
ЧIыгу зэфыщытыкIэхэм, чIыпIэ зыгъэIорышIэжьыпIэхэм, къэралыгъо граждан къулыкъум, зэгъэшIужь хьыкумышIхэм, Къэралыгъо Советым — Хасэм и Регламент, социальнэ IэпыIэгъум, 2023-рэ илъэс бюджетым, сабыим лъыплъэнэу е ыпIунэу зыштагъэхэм мазэ къэс ахъщэ IэпыIэгъу афэ- гъэкIогъэным, АР-м икъэралыгъо тамыгъэхэм, нэмыкIхэм афэгъэхьыгъэ хэбзэгъэуцугъэхэм зэхъокIыныгъэхэр афэшIыгъэнхэм афэгъэхьыгъэ законопроектхэм, законхэм мы зэхэсыгъом щахэплъагъэх, апэрэ ыкIи ятIонэрэ еджэгъухэмкIэ аштагъэх.
УФ-м ошIэ-дэмышIэ IофхэмкIэ, IофшIэнымкIэ ыкIи цIыфхэр социальнэу къэухъумэгъэнхэмкIэ, финансхэмкIэ яминистерствэхэм афэгъэзэгъэ джэпсалъэу депутатхэм агъэхьазырыгъэр Украинэм ыкIи СНГ-м инэмыкI къэралыгъохэм къарыкIыжьыгъэу Урысыер псэупIэкIэ къыхэзыхыгъэхэр социальнэу къэухъумэгъэнхэм фэгъэхьыгъ. ЗэкIэмкIи мы зэхэсыгъом Iоф 30-м ехъумэ щахэплъагъэх.
Пстэумэ ауж АР-м и ЛIышъхьэу КъумпIыл Мурат гущыIэр ыштагъ. УФ-м и Президентэу Владимир Путиным Къэралыгъо Советым изэхэсыгъо пшъэрылъэу къыщигъэуцугъэхэм ягъэцэкIэн анахь шъхьаIэу зэрэщытым ащ къыкIигъэтхъыгъ. КъумпIыл Мурат АР-м гъэсэныгъэмрэ шIэныгъэмрэкIэ и Министерствэ ипащэхэм ар пшъэрылъ къафишIыгъ. Джащ фэдэу Къэралыгъо Совет — Хасэмрэ хэбзэ гъэцэкIэкIо къулыкъухэмрэ зэгурыIоныгъэ азыфагу илъэу зэрэзэдэлажьэхэрэм фэшI депутатхэм зэрафэразэм ЛIышъхьэм къыкIигъэтхъыгъ.
— Къиныгъохэр щыIагъэхэми, къэралыгъо программэхэм хэзыгъэ имыIэу тахэлэжьагъ, мы илъэсымкIэ дгъэнэфэгъагъэр зэкIэ пхырытщыгъ, псэуалъэу тымыухыгъэхэм апае ахъщэ тедзэ къытатыгъ, — къыIуагъ республикэм ипащэ. — УФ-м и Президент ыкIи Правительствэм яIэпыIэгъу ишIуагъэкIэ ыпэкIэ тылъыкIотэн тэлъэкIы. ХэушъхьафыкIыгъэ дзэ операцием хэлажьэхэрэмрэ ахэм яунагъохэмрэ анахьэу тынаIэ зытетхэм ащыщых. Мы лъэныкъомкIэ джыри Iофыбэ зэрэщыIэр «линие занкIэм» къыгъэнэфагъ. Ахэм IэпыIэгъоу яттыщтыр пстэумэ апшъэ тшIын фай.
ХЪУТ Нэфсэт.