ЯмэфэкIкIэ афэгушIуагъ
Урысыем икъэгъэнэжьакIо и Мафэ фэгъэхьыгъэ Iофтхьабзэр тыгъуасэ АР-м и Правительствэ зычIэт унэм щыкIуагъ. Адыгеим и ЛIышъхьэу КъумпIыл Мурат ащ хэлэжьагъ.
Адыгеим ипащэ ишIуфэс псалъэ зэрэщыхигъэунэфыкIыгъэмкIэ, республикэм икъулыкъухэу цIыфхэм якъэгъэнэжьынрэ машIом игъэкIосэжьынрэ афэгъэзагъэхэм япшъэрылъ зэрагъэцакIэрэм бэкIэ елъытыгъ республикэм исхэм рэхьатныгъэу, щынэгъончъагъэу яIэщтыр зыфэдэр.
«Чэщи, мафи шъуимыIэу къулыкъур шъохьы, шъуищыIэныгъэ къырыкIощтым шъуемыгупшысэу чIыпIэ къин ифагъэхэм апэу IэпыIэгъу шъуафэхъу. НэбгырипшI пчъагъэу зищыIэныгъэ къэжъугъэнэжьхэрэр къышъуфэразэх. ГумэкIыгъо къызщыкъокIырэм шъоры тызщыгугъырэр», — къыIуагъ КъумпIыл Мурат.
Республикэм и ЛIышъхьэ къызэрэхигъэщыгъэмкIэ, инфраструктурэ псэолъакIэхэр ошIэ-дэмышIэ Iофхэм ащыухъумэгъэнхэ фае. КъумпIыл Мурат къызэриIуагъэмкIэ, Адыгеим ихэбзэ къулыкъухэр мэшIогъэкIосэ къулыкъухэмрэ цIыфхэм якъэгъэнэжьын фэгъэзэгъэ къулыкъухэмрэ ясоциальнэ Iофыгъохэм язэшIохынкIэ IэпыIэгъу тапэкIи афэхъущтых. 2023-рэ илъэсым игъэмафэ Херсон хэкумкIэ Каховскэ ГЭС-р зызэщэкъом, IэпыIэгъу афэхъугъэхэм, Урысыем ишъолъырыкIэхэм шIушIэ IэпыIэгъур аIэкIэзыгъахьэхэрэм лъэшэу зэрафэразэр АР-м и ЛIышъхьэ къыхигъэщыгъ.
ЩытхъуцIэу «АР-м изаслуженнэ къэгъэнэжьакIу» зыфиIорэр къэзыушыхьатырэ тхылъыр КъумпIыл Мурат Урысыем и МЧС АдыгеимкIэ икъэгъэнэжьэкIо отряд ипащэ игуадзэу Валерий Черепановым ритыжьыгъ. Республикэм и ЛIышъхьэ и Рэзэныгъэ тхылъ афагъэшъошагъ къэгъэнэжьакIоу Олег Науменкэм, министерствэм иIофышIэхэу Игорь Ситниковым, Тхьайшъэо Байзэт, Уракъ Бислъан, ХьакIэмыз Сафьят.
Адыгеим и ЛIышъхьэ МЧС-м АР-мкIэ и ГъэIорышIэпIэ шъхьаIэ иветеранхэм, ипащэхэм, иIофышIэхэм ямэфэкIкIэ ыкIи ИлъэсыкIэу къихьэрэмкIэ къафэгушIуагъ.
Джащ фэдэу медаль къыратыжьыгъ псыхъом хэфэгъэгъэ кIэлэцIыкIуитIур къэзыгъэнэжьыгъэ Хьаджымэ СултIан. Къуаджэу Улапэ щыщ кIалэм Урысыем и МЧС имедалэу «За спасение погибающих на водах» зыфиIорэр къыфагъэшъошагъ. Мыекъуапэ щыщэу, пщыныжь ягъэхьыгъэнымкIэ Федеральнэ къулыкъум АР-мкIэ и ГъэIорышIапIэ иIофышIэу ЛIыхэсэ Мурат псым ытхьалэщтыгъэ бзылъфыгъэр Анапэ къызэрэщигъэнэжьыгъэм пае МЧС-м АР-мкIэ и ГъэIорышIэпIэ шъхьаIэ и Рэзэныгъэ тхылъ къыфагъэшъошагъ.
АР-м и ЛIышъхьэ ипресс-къулыкъу