Урысые Федерациемрэ АР-мрэ якъэралыгъо шIухьафтынхэр ятыжьыгъэнхэм фэгъэхьыгъэ Iофтхьабзэ АР-м ифилармоние щыкIуагъ. Мыщ къе­кIолIагъэх хэбзэ IофышIэхэр, сэнэхьат зэфэшъхьаф­хэм ялIыкIохэр, общественнэ IофышIэхэр.

[caption id="attachment_143710" align="aligncenter" width="800"] А. Гусев.[/caption]

Адыгеим и ЛIышъхьэу КъумпIыл Мурат шIухьафтынхэр зэратыгъэхэм афэгушIозэ къызэрэхигъэщыгъэмкIэ, илъэсэу икIырэр гъэпсын IофшIэнышхом иилъэсэу щы­тыгъ, республикэр ихэхъоныгъэкIэ джыри нахь лъэшэу лъыкIотэным иамал ащ къытыгъ.

«Социальнэ-экономикэ гъэхъагъэу тиIэ­хэр къэзыгъэлъэгъорэ пчъагъэхэм ахэхъо, мэхьанэшхо зиIэ проектхэу итхъухьагъэхэр зэкIэ зэшIохыгъэ мэхъух. Ахэр зэкIэ Адыгеим щыпсэухэрэм Iофэу агъэцакIэрэм къыкIэкIуагъэх, шъощ фэдэ цIыф хъупхъэ­хэу зиIоф хэшIыкIышхо фызиIэхэм ягъэ­хъагъэх. Узфэгъэзагъэм упылъын зэрэфаемкIэ шъуащыщ пэпчъ щысэ шIагъоу мэхъу. Урысыер гумэкIыгъо инхэм апэуцужьын фаеу зыщыхъурэ лъэхъаным ащ фэдэ шэн-зе­кIуакIэхэм мэхьанэшхо яI», — къыIуагъ КъумпIыл Мурат.

АР-м и ЛIышъхьэ анахьэу хигъэунэфыкIыгъэр тичIыпIэгъухэуи хэушъхьа­фыкIыгъэ дзэ операцием хэлажьэхэрэм ялIыхъужъныгъ. ДзэкIолI пэпчъ икъулыкъу пшъэ­рылъхэр зэригъэцакIэхэрэм ыкIи ихэ­гъэгу зэрэ­фэшъыпкъэм апае лъэшэу зэрафэразэр республикэм и ЛIышъхьэ къы­Iуагъ.

Джащ фэдэу КъумпIыл Мурат къыхигъэщыгъэх хэгъэгумрэ республикэмрэ нахь зэтегъэпсыхьагъэ хъунхэм зиIахьы­шхо хэзышIыхьэгъэ тичIыпIэгъухэм ягъэ­хъагъэхэр. Мэкъу-мэщым ылъэныкъокIэ гъэхъагъэу яIэхэм ыкIи илъэсыбэ хъу­гъэу гуетыныгъэ фыряIэу Iоф зэрашIэрэм апае щытхъуцIэу «УФ-м мэкъу-мэщымкIэ иза­служеннэ IофышI» зыфиIорэр къафагъэ­шъошагъ мэкъумэщ кооперативэу «Родина» зыфиIорэм итракторнэ бригадэ ипащэу Александр Бережноим ыкIи мэкъумэщ кооперативэу «Лениным ыцIэкIэ щыт колхозыр» зыфиIорэм ищэ-товар фермэу N 2-м ипащэу Любовь Черниковам.

ЦIыфхэр социальнэу ухъумэгъэнхэм ылъэныкъокIэ гъэхъагъэу яIэхэм ыкIи илъэсыбэ хъугъэу гуетыныгъэ фыряIэу Iоф зэрашIэрэм апае «УФ-м цIыфхэр социальнэу ухъумэгъэнхэмкIэ изаслуженнэ IофышI» зыфиIорэ щытхъуцIэр афагъэшъошагъ Адэмые дэт унэ-интернатым имедицинэ сестрау Даур Гуащэ ыкIи цIыф­хэм ясоциальнэ фэIо-фашIэхэм ягъэцэкIэнкIэ Джаджэм дэт гупчэм исоциальнэ IофышIэу Галина Малинэ. ЩытхъуцIэу «УФ-м изаслуженнэ артист» зыфиIорэр фагъэшъошагъ ансамблэу «Налмэсым» иартисткэу Хьакъуй Анжеликэ искусствэм ылъэныкъокIэ гъэхъагъэу иIэхэм ыкIи илъэсыбэ хъугъэу Iоф зэришIэрэм апае.

УФ-м и Президент и Щытхъу тхылъ къыфагъэшъошагъ АР-м иминистрэхэм я Кабинет и Тхьаматэу КIэрэщэ Анзаур республикэм исоциальнэ-экономикэ пшъэрылъхэр шIуагъэ къытэу зэшIохыгъэнхэм иIахь зэрэхишIыхьэрэм пае.

УФ-м и Президент ирэзэныгъэ тхылъ ратыгъ автомобиль гъогухэм я ГъэIорышIапIэу «Адыгеяавтодорым» иотдел ипащэу Павел Бахтиным. ХэушъхьафыкIыгъэ инфраструктурэ проектхэр зэшIохыгъэнхэмкIэ, Херсон хэкум и Геническэ район зыпкъ игъэуцожьыгъэнымкIэ гъэхъэгъэшхохэр зэришIыгъэхэм фэшI ар къыфагъэшъошагъ. УФ-м и Федеральнэ ЗэIукIэ ФедерациемкIэ и Совет и Щытхъу тхылъ къыфагъэшъошагъ Адыгэ рес­публикэ клиническэ сымэджэщым иневрологическэ отделение ипащэу ВэкъашIэ Саидэ илъэсыбэ хъугъэу гуетыныгъэ фыриIэу Iоф зэришIэрэм, псауныгъэм икъэухъумэн ихэхъоныгъэ иIахьышхо зэрэхишIыхьэрэм апае.

Республикэм иапшъэрэ тынэу медалэу «Адыгеим и Щытхъузехь» зыфиIорэр фагъэшъошагъ тренерэу Емыж Арамбый — я XXII-рэ Олимпиадэм джэрз медалыр къыщызыхьыгъэм, Европэмрэ СССР-мрэ ячемпионатхэм текIоныгъэр къащыдэзыхыгъэм ыкIи дзюдом республикэм хэхъоныгъэ щишIыным ышъхьэкIэ зиIахьышхо хэзышIыхьагъэм. Медалэу «Адыгеим и Щытхъузехь» зыфиIорэр фагъэшъошагъ Дондуковскэ къоджэ псэупIэмкIэ народнэ депутатхэм я Совет идепутатэу Виктор Пуклич, IофшIэкIо къызэрыкIом къыщыригъажьи гъогушхо ащ къыкIугъ, Джэджэ районым ипэщэ IэнатIэ нэсыгъ.

Наукэм иIофышIэшхохэм, юристхэм, тренерхэм, предпринимательхэм, къэралыгъо къулыкъушIэхэм, рабоч сэнэхьатхэр зиIэхэм щытхъуцIэхэр афагъэшъошагъэх. ИкIэухым КъумпIыл Мурат къа­лэжьыгъэ тынхэр зыфагъэшъошэгъэ пстэуми афэгушIуагъ ыкIи зэрафэразэр къыIуагъ, 2024-рэ илъэсым гъэхъэгъа­кIэхэр ашIынхэу афэлъэIуагъ.

ПстэумкIи нэбгырэ 46-мэ шIухьафтынхэр аратыгъэх.