Республикэм ихэбзэ къулыкъушIэхэр егъэзыгъэ IофкIэ Херсон хэкум зышъхьэ къизыхыжьыхи, Адыгеим къэкIуагъэхэу зыгъэпсэфыпIэ базэу «Турист» зыфиIорэм къыдэнагъэу щыпсэухэрэм илъэсыкIэмкIэ афэгушIуагъэх.

[caption id="attachment_143696" align="aligncenter" width="800"] А. Iэшъын.[/caption]

МэфэкI зэIукIэгъум икIэщакIор Адыгэ Рес­публикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ары. Ащ итхьаматэу Шъхьэлэхъо Аскэр Iофтхьабзэр зэрищагъ.

Джащ фэдэу мыщ хэлэжьагъэх зихэку къэзыгъэзэжьыгъэхэр щыIэныгъэм хэгъэгъозэгъэн­хэмкIэ Гупчэм ипащэу ГъукIэлI Асхьад, Краснооктябрьскэ къоджэ псэупIэм ипащэу Андрей Бондарец, динлэжьхэр, Адыгэ Хасэм, Мыекъопэ район къэзэкъ отделым ялIыкIохэр.

Шъхьэлэхъо Аскэр пэублэ псалъэ къышIызэ, егъэзыгъэ IофкIэ Украинэм зышъхьэ къизыхыжьи, Адыгеим къэкIуагъэхэм гумэкIыгъо горэ яIэмэ зэрагъэшIэным фэшI зыкIызэрэугъоигъэхэр къыIуагъ.

— АпэрапшIэу, мыщ къычIэнэгъэ нэбгырэ 40 фэдизмэ ИлъэсыкIэмкIэ тафэгушIон, яунэ кIэрычыгъэ хъугъэхэм агу къыдэтщэен, республикэм ихэбзэ къулыкъухэм янэплъэгъу зэрарамыгъэкIыхэрэр, тишъо­лъыр илъ щыIэкIэ-псэукIэм хэщэгъэнхэм ыуж зэритхэр зэхядгъэшIэнэу тыкъэкIуагъ. ЗыгъэпсэфыпIэу «Туристым» кIэлэцIыкIуи 9-у чIэсхэм шIухьафтынхэр къа­фэдгъэхьазырыгъэх. IэшIу-IушIу къэмланхэм анэмыкIэу, зыгъэпсэфыгъо мафэу къэблагъэхэрэм зэджэнхэ алъэкIыщт тхылъхэр, мэфэпчъхэр къафэтщагъэх, — хигъэунэфыкIыгъ Шъхьэлэхъо Аскэр.

Iэшъынэ Сусан.