ЕгъэджэкIо-гъэсакIом и Илъэс ыкIэм фэкIо. Мыщ къыдыхэлъыта­гъэу республикэм Iоф­тхьэбзэ зэфэшъхьафхэр, зэнэкъокъухэр щызэхащагъэх. Гъэсэныгъэм исистемэ Iоф щызышIэ­хэрэм яшIэныгъэхэм ахагъэхъуагъ, анахь дэгъухэр къыхахыгъэх.

[caption id="attachment_143683" align="aligncenter" width="800"] Елена Мосоловам ихъарзынэщ.[/caption]

«2023-рэ илъэсым икIэлэ­егъэджэ анахь дэгъу» зыфиIорэ цIэр зыфагъэшъошагъэр АдыгеякIэм дэт гурыт еджапIэу N 27-м пэублэ классхэмкIэ икIэлэегъаджэу Елена Мосоловар ары. Зэнэкъокъум иаужырэ уцугъоу Москва щыкIуагъэм ащ зыкъыщигъэлъэгъуагъ.

Еленэ кIэлэегъэджэ пэрыт. Янэрэ янэжърэ ищысэтехыпIэхэу, илъэс 32-рэ хъугъэу кIэлэегъэджэ сэнэхьатым рэлажьэ. 2018-рэ илъэсым нэ­мыкI шъолъыр къикIыжьи Адыгеим къэкIожьыгъ. АдыгеякIэм гурыт еджапIэу къыщызэIуахыгъэм ипшъашъэ щеджэнэу ритыгъ, ежьыри ащ Iухьагъ.

— Апэрэ мафэм къыщегъэ­жьагъэу сиIофшIэгъухэми, езгъа­джэхэрэми сагурыIуагъ. КъызэIуахыгъэкIэ еджапIэм апэрэ классым къычIэхьэгъэ кIэлэ­еджэкIо цIыкIухэр езгъэджэнхэу сыублагъ. Непэ ахэр я 6-рэ классым нэсыгъэх, янэ-ятэхэр къысэлъэIухи яегъэджэн лъыпыздзэжьыгъ, класснэ пащэу джы ахэм сыряI ыкIи урысыбзэ ясэгъэхьы. Ащ нэмыкIэу я 2-рэ классым ис кIэлэцIыкIухэр есэгъаджэх, — еIо тигущыIэгъу.

Елена Мосоловам иIофшIэн хэшIыкI ин фыриIэу, ригъаджэ­хэрэр сыдигъокIи къахэщых. ГъэхъэгъэшIухэр иIэх нахь мы­шIэми, АдыгеимкIэ анахь кIэлэ­егъэджэ дэгъу хъуныр ышIагъэп. Ащ мэхьанэшхо реты. Муниципальнэ ыкIи республикэ зэнэ­къокъухэм текIоныгъэр къащыдихыгъ. Москва аужырэ уцу­гъом хэлэжьагъ.

— Мы зэнэкъокъум пшъэдэ­кIыжь ин пылъ, зыгъэпсэфыгъо симыIэу зыфэзгъэхьазырыгъ. IэпыIэгъу къысфэхъугъэхэм зэ­кIэми сафэраз. Адыгэ Респуб­ликэм икIэлэегъаджэхэм ясэнэхьат сэнаущыгъэхэм зэпыу имыIэу зыщыхагъэхъорэ гупчэм ипащэу КIэсэбэжъ Людмилэ ишIуагъэ къысигъэкIыгъ. ТIуапсэ щызэхащэгъэ лагерым сагъэкIогъагъ, ащ мы зэнэкъокъум фэ­гъэхьыгъэу тхьамэфитIум къыкIоцI шIэныгъакIэхэр щызэдгъэ­гъотыгъэх, ыпэрэ илъэсым Уры­сыем икIэлэегъэджэ анахь дэгъу хъугъэм нэIуасэ тыфа­шIыгъ, гущыIэгъу къытфэхъугъ, — къытфеIуатэ кIэлэегъэджэ пэрытым.

Мыгъэрэ зэнэкъокъум шъо­лъыр 89-мэ ялIыкIохэр ыкIи Республикэу Иран икъалэу Те­геран щыщ кIалэ хэлэжьагъ ыкIи ары текIоныгъэр къыдэзыхы­гъэр.

— ЫпэрапшIэу сиIофшIэн, сыкъызэрыкIыгъэ республикэм фэгъэхьыгъэ видеороликэу къэз­гъэхьазырыгъэр къэзгъэлъэ­гъуагъ, — къеIуатэ Еленэ. — Джащ фэдэу урок, зэдэгущыIэгъу зэфэшъхьафхэмкIэ зытыушэтыгъ. Анахь сызыщыгумэкIыгъэр апэрэу слъэгъугъэ кIэлэеджакIохэм апашъхьэ урок къыщыстыныр ары, ау кIэлэцIыкIухэр Iушхэу къычIэкIыгъ, дэгъоу тызэгурыIуагъ. Зэнэкъо­къур сэркIэ ушэтыпIэ хъугъэ, сшъхьэ­кIэ къысшъхьэпэнэу бэ зэхэс­хыгъэри, слъэгъугъэри. НэмыкI шъолъырхэм якIэлэегъаджэхэм Iоф зэрашIэрэм нэIуасэ сыфэ­хъугъ, шIыкIэ-амалыбэ тапэкIэ згъэфедэн слъэкIынэу къыщыхэзгъэщыгъ.

КIэлэегъэджэ пэрытыр кIэу къежьэрэ пстэуми афэщагъэу зэрэщытыр икъэгущыIакIэ къы­хэщы. Ащ зэрилъытэрэмкIэ, кIэлэцIыкIухэм кIэлэегъаджэр ящысэтехыпIэн фае. Ригъаджэ­хэрэм аригъэгъотырэ шIэны­гъэр ыпэкIэ къазэрэфафедэжьыщтым ыуж ит.

Елена Мосоловар Адыгеим икIэлэегъэджэ анахь дэгъу зэ­рэхъугъэм кIуачIэ къыхилъ­хьагъ. ТапэкIи игъэхъагъэхэм ахигъа­хъозэ Iоф ышIэнэу егъэнафэ.

ДЕЛЭКЪО Анет.