Тыгъэгъазэм и 27-м къэра­лыгъо ыкIи муниципальнэ фэIо-фашIэхэр лъэныкъуабэкIэ зыгъэцэкIэрэ (МФЦ) Унэгъо гупчэ апэрэу Мые­къуапэ къыщызэIуахыгъ. [caption id="attachment_143677" align="aligncenter" width="800"] О. Ефимова[/caption] Ар цIыфхэм социальнэ фэIо-фашIэхэр языгъэгъотырэ Зэхэубытэгъэ гупчэм хэт. МэфэкI Iофтхьабзэм хэлэжьагъэх АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч, кIэлэцIыкIухэм яфитыны­гъэхэр къэухъумэгъэнхэмкIэ Уполномоченнэу Наталья Агеевар, бзылъфыгъэхэм я Союз итхьаматэу Вэ­рэкъо Хьалимэт, нэмыкIхэри. КъызэIуахыгъэкIэ гупчэм пшъэрылъ шъхьаIэу иIэр — кIэлэцIыкIухэр зэрыс унагъохэм ящыкIэгъэ медицинэ, психологическэ, педагогическэ, юридическэ, социальнэ IэпыIэгъур шIуагъэ къытэу зы чIыпIэм ащарагъэгъотыныр ары. Къэралыгъо ыкIи муниципальнэ фэIо-фашIэхэр лъэныкъуабэкIэ зыгъэ­цэкIэрэ Унэгъо гупчэхэр къызэIухыгъэнхэм фытегъэпсыхьэгъэ пилотнэ проектым Адыгеир хэлажьи, сомэ милиони 8-м ехъу къыфэкIуагъ. Ащ ишIуагъэкIэ апэрэ Унэгъо гупчэр зэрифэшъуашэу зэтырагъэпсыхьагъ, 2024-рэ илъэсым ащ фэдэ IэпыIэгъу чIыпIэ селоу Красногвардейскэм къыщызэIуахыщт. — КIэлэцIыкIухэр зэрыс унагъохэм ящыIэныгъэ нахьышIу шIыгъэным мы гупчэр фэIорышIэщт. Социальнэ Iофы­шIэхэм къэралыгъо учреждениехэм ыкIи ведомствэхэм зэпхыныгъэ адыряIэу зэхэубытэгъэ IэпыIэгъур закъы­фэзыгъазэхэрэм арагъэгъотыщт, — хигъэунэфыкIыгъ Мырзэ Джанбэч.