2024-рэ илъэсэу къихьэ­рэр Блэгъожъым иилъэс. Ар къыдэтлъыти, Блэгъожъ лIакъом икъэбар зэдгъашIэ тшIоигъоу ахэр нахьыбэу зыщы­псэу­хэрэ бжъэдыгъу шъо­лъырым тыкIуагъ ыкIи лъэкъуацIэр къызытекIыгъэм тыкIэуп­чIагъ.

[caption id="attachment_143667" align="aligncenter" width="800"] Блэгъожъхэм яхъарзынэщ[/caption]

Нэшъукъуае щыщ зэшхэу Блэгъожъ Налбыйрэ Казбекрэ дахэу къытпэгъокIыгъэх ыкIи ялIэкъо тарихъ къэбарэу пы­лъыр къытфаIотагъ. КъызэраIуагъэмкIэ, зэшхэм ятэу Нурбый лIэкъо чъыгым икъэбар зэрыт тхьапэм изэхэгъэуцон пылъыгъ, ар зыщымыIэжьым къыщыублагъэу ятэ къафигъэнагъэм хахъохэр фашIызэ лъагъэкIуатэ.

— Блэгъожъхэр нахьыбэу зыщыпсэухэрэр Теуцожь районым ит къуаджэу Нэшъукъуай, — къеIуатэ Казбек. — Тятэ къызэрэтфиIотэжьыгъэмкIэ, Блэгъожъ лIакъор лIитIум ате­кIыгъ, зым ЖэкIэгъу раIощтыгъ, пэшIорыгъэшъэу къызэралъы­тэрэмкIэ, ар 1700-рэ илъэсхэм къэхъугъэу ары, адрэм ыцIэ къесIонэу сшIэрэп. Ащ къыхэкIэу Блэгъожъхэр тIоу зэтеу­тыгъэ хъугъэх, къоджашъхьэм щыIэхэмрэ къоджакIэм щы­псэухэрэмрэ. Тижъхэм къызэраIотэжьыщтыгъэмкIэ, зы лIыбланэ горэ благъом текIуи, нэужым ащ блэгъожъ фаусы-гъэу ары.

— Сэ къоджашъхьэм щы­псэурэ Блэгъожъхэу ЖэкIэгъум текIыгъэхэм сащыщ ыкIи ахэм якъэбар ары нахь сызщыгъуазэу къэсIотэн слъэкIыщтыр, — лъегъэкIуатэ игущыIэ Казбек. — ЖэкIэгъум текIыгъэх Къэншъао, Мосэ, Мыхьамэт, Хьазрэт, Мышъэост, Сахьидэ, нэмыкI­хэри. Къэншъао сэ сятэжъэу Хьазрэт текIыгъ, ащ шищ етIани иIагъ, Юныс, Мыхьамод, Ахъмэт. Хьазрэтрэ Юнысрэ заом хэкIодагъэх. Мыхьамод тятэу Нурбый текIыгъ, ащ тэ кIалэхэу Юрэ, Налбый, Казбек, Замир аIоу тыкъыфэхъугъ, тэри лъфыгъэхэр тиIэх.

Казбек къызэриIорэмкIэ, Блэ­гъожъхэр бэгъашIэхэу ары. Ятэжъэу Хьазрэт илъэси 117-рэ къыгъэшIагъ. Хьазрэт икIалэу Ахъмэт илъэс 90-рэ, ипшъа­шъэ­хэм илъэс 90 — 100-рэ къа­гъэшIагъ. Мы уахътэми къуа­джэм мымакIэу дэсых лIакъом щыщ бэгъашIэхэр.

— Блэгъожъхэр анахь лIэ­къошхоу Нэшъукъуае дэсхэм ащыщ. Мы мафэм ехъулIэу унэгъо 57-м ехъу ыкIи нэбгырэ 1120-м кIахьэу къуаджэм щэ­псэух. Ащ нэмыкIэуи Мые­къуа­пэ, Адыгэкъалэ, Инэм унэгъуа­бэ хъухэу ащэпсэух. Хъяр ти­Iэми, нэшхъэягъо щыIэми тызэхахьэ, тызэщыгъупшэхэрэп, — къыIуагъ Казбек.

— Блэгъожъ лIакъор сыда адрэхэм къазэрэхэщырэр, — сеупчIы Казбек.

— ЗэкIэ лэжьакIох,— псын­кIэу джэуап къытыжьыгъ ащ. — ЕтIани къыхэзгъэщымэ сшIоигъу, зыми ыгу хэзгъэкIынэу сыфаеп, ау гущыIэм пае, лIэкъо инхэм ащыщэу КIыкIхэм ягугъу пшIын хъумэ ахэр орэд къэIоным, къэшъоным нахь фэгъэзагъэх. Тэ, Блэгъожъхэр, гъэсэныгъэмкIэ такъыхэщы, джащ фэдэу лIыбланэхэр, бэнакIохэр бэу тиIэх. Ахэм ащыщхэм ацIэхэр сигуапэу къесIон: БлэгъожъхэмкIэ шIэныгъэлэжьэу, кIэлэегъэджэ цIэрыIоу Зулкъаринэ, мэкъумэщ хъызмэтым изаслуженнэ IофышIэу Хьылым, Нэшъукъуае игъэIорышIакIоу щытыгъ Нурбый, физикэ-хьисап шIэныгъэхэмкIэ профессорэу, УФ-м апшъэрэ гъэсэныгъэмкIэ иIофышIэ гъэшIуагъэу Заурбый, тIогъогогъо гъэсэныгъэм иотличникэу, Адыгеим инароднэ кIэлэегъаджэу, «Адыгеим и Щытхъузехь» зыфиIорэ медалыр къызфагъэшъошагъэу Шъаукъо (Блэгъожъ) Сафыет, таможеннэ къулыкъум итхьамэтагъэу, полковникэу Юр, полицием иполковникэу Хъалид, Адыгэ къэралыгъо технологическэ университетым ишIэныгъэлэжьэу Замирэ, нэмыкIхэри. Ащ нэмыкIэу спортсмен бэлахьхэр мымакIэу тиIэх. Ахэр: спортымкIэ мас­терхэу Юсыф, Славик (самбэмкIэ Урысыем текIоныгъэ къыщы­дихыгъ), Юрэ, Къэплъан, Хъалид (самбэмкIэ Европэм ичемпион) Аскэр, нэмыкIхэри.

— 2024-рэ илъэсэу къихьэ­рэр Блэгъожъым иилъэсэу ары гороскопым зэритыр. Арышъ, Блэгъожъ лIакъомкIэ ар шъуиилъэсэу пIон плъэ­кIыщт. Ащ о сыд фэдэ еплъы­кIа фыуиIэр ыкIи Илъэ­сы-кIэу къихьэрэмкIэ сыдэущтэу уафэ­лъаIо пшIоигъуа?

— Тэ тикIэлэгъум гороскоп зыфаIорэм фэдэ тиIагъэп, мы лъэхъаным ащ мэхьанэ раты хъугъэ, — еIо Казбек.— Арэущтэу щытми, Блэгъожъ лIакъом сыфэлъаIо хъярыр къебэкIэу, лIакъом игугъу шIукIэ, дахэкIэ ашIэу, псауныгъэ пытэ яIэу, бэгъашIэ хъунхэу. Блэгъожъхэр зэрэлъытэжьых, шIу зэрэлъэ­гъух, нахьыжъхэм уасэ афашIы, нахьыкIэхэр агъашIох. КIэлакIэу къыткIэхъухьэхэрэми а шэн дахэхэр лъагъэкIотэнэу, лIыбланэу щыIэнхэу тащэгугъы. Дунаир мамырэу зэкIэхэми ИлъэсыкIэ хъяр тытехьанэу афэсэIо.

КIарэ Фатим.