Адыгеим испортсменхэм мы илъэсым гъэхъэгъэшIухэр ашIыгъэх, тиреспубликэ ыцIэ шIукIэ рарагъэIуагъ. Анахь мэхьанэшхо зиIэгъэ спорт хъугъэ-шIагъэхэм непэ ягугъу къэтшIын, зэфэхьысыжьхэм зафэдгъэзэн.

2023-м икоманд

Урысые зэнэкъокъоу «Локобаскет – Школьная лига» зыфиIорэм текIоныгъэр къыщыдихыгъ Мые­къопэ спорт еджапIэу В.С. Максимовым ыцIэ зыхьырэм икомандэ. Финал едзыгъор къалэу Челябинскэ щыкIуагъ. Зэнэкъокъур 2006-рэ илъэсым щегъэжьагъэу зэхащэ, республикэм икомандэ апэрэу текIоныгъэр къыщыди­хыгъ. Тренерэу Хейсам Биттар ыгъэсэрэ тибаскетболистхэр дэгъу дэдэу ешIагъэх, финалыр Калининград хэкум илIыкIохэм къа­шIуа­хьыгъ. КIэлакIэхэм ащыщхэр нахьыжъхэр зыхэт командэхэм арагъэблэгъагъэх. — КIэлэцIыкIу баскетболым Адыгеим зыщиушъомбгъуным, лъэгэпIэ инхэм анэсыным, спортсменхэм ягъэхьазырын фытегъэпсыхьэгъэ системэ гъэнэфагъэ тиIэным такъы­фэкIоныр, тикомандэхэр дунэе ыкIи Урысые зэнэкъокъухэм зэрифэшъуашэу ахэлэжьэнхэ алъэкIыныр ары непэ пшъэ­рылъ шъхьаIэу щытыр, — къы­Iуагъ баскетболымкIэ Мые­къопэ академием ипащэу Хейсам Биттар.

Спортсмен анахь дэгъур

МыщкIэ узыхэдэнэу щыIэр макIэп. Ахэм ащыщых спорт лъэпкъ зэфэшъхьафхэмкIэ зэнэкъокъухэм ащытекIогъэхэ Гъомлэшк Анзор, Даур Къадырбэч, Беданэкъо Заур, Ордэкъо Астемир. Ау анахьэу къахэдгъэщынэу тызыфаер боксерэу Мушег Баяндурян. Европэм ипервенствэ ащ текIоныгъэр къыщыдихыгъ.

Хъугъэ-шIэгъэ шъхьаIэр

Мы икIырэ илъэсыр спорт хъугъэ-шIагъэхэмкIэ баигъ. Адыгеим футболымкIэ ифедерацие ипащэхэр зэблахъугъэх. Джащ фэдэу бзылъфыгъэ гандбольнэ командэу «АГУ-Адыифым» зэхъокIыныгъабэ щыкIуагъ, пащэхэр ыкIи тренерхэр зэблахъугъэх. ТхэквондомкIэ Урысыем ичемпионат, атлетикэ онтэгъумкIэ Урысыем ипервенствэ Адыгеим щыкIуагъэх. Джащ фэдэу кушъхьэфэчъэ спортымкIэ дунэе ыкIи Урысые мэхьанэ зиIэ зэнэкъокъухэр тишъолъыр щырекIокIыгъэх.