Мы илъэсым гъэхъэгъэшIухэр зышIыгъэхэм ащыщ спортсмен ныбжьыкIэу Гъомлэшк Ан­зор. Ар дунаим ичемпион хъугъэ. Мы лъэгэпIэ иным къыфэкIоныр илъэситф ыныбжьэу ригъэжьагъ.

[caption id="attachment_143619" align="aligncenter" width="800"] Гъомлэшк Анзор ихъарзынэщ.[/caption]

Анзор Теуцожь районым ит къуаджэу Нэчэрэзые къыщы­хъугъ. Ятэ тренерэу кIэлэцIыкIухэр зэригъасэхэрэм къы­хэ­кIэу ицIыкIугъом къыщегъэ­жьа­гъэу спортым фэщагъэ хъу­гъэ. Спортзалым чIэт нахьыжъхэм шIогъэшIэгъонэу ар алъыплъэщтыгъ.

— Илъэситф сыныбжьыгъ сыбэнэнэу зесэгъажьэм. Апэрэ зэнэкъокъоу сызхэлэжьэгъагъэр дэгъоу къэсэшIэжьы, ар Пэнэжьыкъуае щызэхащэгъагъ, лъэшэу сыгумэкIыщтыгъ, ау апэрэ чIыпIэ къыщыдэсхыгъагъ. Джащ къыщегъэжьагъэу илъэс 15-м къыкIоцI сыгукIэ сыфэщагъэу самбэм сыпылъ, — еIо кIэлэ ныбжьыкIэм.

Анзор гурыт еджапIэм чIэсыфэ ятэу Алый итренерыгъ, ары апэрэ лъэбэкъухэр езыгъэ­дзыгъэр, гъэхъагъэхэм афэзыщагъэр. Районым, республикэм, Къыблэ федеральнэ шъо­лъырым ащызэхащэрэ зэнэ­къо­къу­хэм пчъагъэрэ ахэлэжьагъ, гъэ­хъагъэхэр ащишIыгъэх.

— Уятэ уигъэсэныр, зы лъэ­ныкъомкIэ, къины, ар къызэрэс­щыгугъырэр амалэу сиIэмкIэ къэзгъэшъыпкъэжьынэу сыфай. Ар зэрэсигъусэм нахь кIуачIэ къысхелъхьэ, нахь сызщэгугъы­жьы. Мы аужырэ илъэсхэм АР-м самбэмкIэ испорт еджапIэ сэкIо, синасып къыхьыгъ спортымкIэ дунэе класс зиIэ мастерэу Де­лэкъо Адам сигъэсэнэу зэрэлъыпысыдзэжьыгъэр. СицIыкIугъом къыщегъэжьагъэу ар дэгъоу сэшIэ, сятэ иныбджэгъу, сыдигъокIи ынаIэ къыттет, — еIо тигущыIэгъу.

[caption id="attachment_143620" align="aligncenter" width="800"] Гъомлэшк Анзор ихъарзынэщ.[/caption]

Анзор я 9-рэ классыр къызеухым Адыгэ къэралыгъо уни­верситетым и Мыекъопэ къэралыгъо гуманитар-техническэ колледж чIэхьагъ ыкIи АР-м самбэмкIэ испорт еджапIэ ыцIэ­кIэ зэнэкъокъухэм ахэла­жьэу ыублагъ. 2019-рэ илъэсым ЦIэмэз щызэхащэгъэ зэ­нэкъокъум хэлэжьагъ, ятIонэрэ чIыпIэр къыщихьыгъ, мэзищ тешIагъэу Урысыем иныбжьыкIэхэм самбэмкIэ язэнэкъокъоу Екатеринбург щыкIуагъэм хэлэжьагъ, тыжьын медаль къыфагъэшъошэгъагъ ыкIи Европэм иныбжьыкIэхэм якIэух зэнэ­къокъоу Болгарием щыкIощтым ар хэлэжьэнэу щытыгъ, ау пан­демиер къежьи, кIошъугъэп.

Мэхьанэ ин зиIэ зэнэкъо­къум зэрэхэмылэжьагъэр ыгукIэ зыдиIыгъыгъ, ау мы илъэсым гъэ­хъэгъэ инхэр ышIынхэу инасып къыхьыгъ. Свердловскэ хэкум ит къалэу Верхняя Пышма 2023-рэ илъэсым мэзаем и 14-м щегъэжьагъэу и 18-м нэс щыкIогъэ зэнэкъокъум Анзор зыщиушэтыгъ, алырэгъум дэгъу дэдэу щыбэнагъ ыкIи Урысыем ипервенствэ идышъэ медаль къыдихыгъ.

Мы спорт лъэп­къымкIэ дунэе зэнэкъокъум Урысыер къыщигъэлъэгъуагъ. Чъэпыогъу мазэм Кыргызстан икъалэу Бишкек щыкIогъэ турнирым дышъэ медаль къыщи­хьыгъ, Анзор дунаим ичемпион хъугъэ.

— Къэралыгъо 28-мэ яспорт­сменхэр мы зэнэкъокъум хэлэжьагъэх. Молдавием, Казахстан, Армением, Монголием ялIы­кIохэм сябэныгъ, сатекIонэу синасып къыхьыгъ. Килограмм 64-рэ къэзыщэчыхэрэм якуп сыхэтыгъ. Мыщ къыкIэлъы­кIуагъ спортымкIэ дунэе класс зиIэ мастерыцIэр. АщкIэ сызыгъэсэгъэ тренерхэм лъэшэу сафэраз, — еIо чемпионым.

Анзор алырэгъум зытехьэкIэ зэкIэ щэгъупшэ, такъикъи­тфым къыкIоцI нахь дэгъоу зыкъызэригъэлъэгъощтыр, текIоныгъэр къызэрэдихыщтыр ары ышъхьэ илъыр. Ар къызыдэ­хъукIэ, ипшъэ­рылъ ыгъэцэкIагъэу елъытэ.

Гуетыныгъэу иIэм ишIуагъэкIэ Гъомлэшк Анзор икъуаджэ, Адыгеим, зызщигъэсэрэ еджапIэм ацIэ чыжьэу егъэIу, рес­публикэм ибыракъ еIэты.

Ыныбжь елъытыгъэу лъэгэпIэ анахь иным кIэлэ ныбжьыкIэр нэсыгъ. ДжырэкIэ Мыекъопэ къэралыгъо технологическэ университетым итехнологическэ факультет иапэрэ курс ар ис. Зы мафэ химынэу тре­нировкэ ешIы, иIэпэIэсэныгъэ хегъахъо. КъэкIорэ илъэсым нахьыжъхэм якуп хэхьащт, ащи гъэхъагъэхэр щишIынхэу, дахэкIэ къахэщынэу итренерхэр щэгугъых.

Зэшъхьэгъусэхэу Гъомлэшк Алыйрэ Мариетрэ кIэлищ зэдапIу, нахьыжъхэри яцIыкIугъом спортым пыщэгъагъэх. Альбек гурыт еджапIэм чIэсыфэ бэнагъэ, ищыIэныгъэкIэ ащ ишIуагъэ къекIыжьы, джырэкIэ полицием Iоф щешIэ. Амир гурыт еджапIэм ыуж бэнэным пылъыгъ, ау IофшIэныр зырегъажьэм уахътэ зэрэфимыкъурэм къыхэкIэу ар щигъэзыягъ, непэ хэбзэухъумакIохэм ахэт.

— Анзор ицIыкIугъом къыщегъэжьагъэу нахь къахэщэу, спортыр шIогъэшIэгъонэу щытыгъ, цIыкIу дэдагъ нахьыжъхэм анахьи ежь нахь дэгъоу зыкъы­гъэлъагъо зэхъум. Гурыт еджапIэмкIэ иныбджэгъухэу Хьакъуй Анзор, Бэгъ Тимур, Хьакъуй Амир, Къумыкъу Рустам непэ гъэхъагъэхэр яIэх. Зэнэкъокъум зытщэхэкIэ зы классым ащ фэдиз бэнэкIо IэпэIасэ къызэрикIыгъэр ашIошъ хъущтыгъэп. НыбжьыкIэхэм спортымкIэ гъэ­хъэгъэшIухэр ашIынхэмкIэ анахь шъхьаIэу слъытэрэр ахэр зэ­нэкъокъухэм ахэбгъэлэжьэнхэр ары, — еIо Алый.

Илъэс 30 хъугъэ Нэчэрэзые дэс ныбжьыкIэхэр Гъомлэшк Алый зигъасэхэрэр. А уахътэм къыкIоцI нэбгырэ пчъагъэмэ гъэхъагъэхэр ашIыгъэх, ахэм джы икIэлэ нахьыкIи къахэ­хъуагъ. Тренерым зэхэдз имыIэу зэкIэми афэгумэкIы, ахэм те­кIоныгъэр къызыдахыкIэ ащэгушIукIы.

Республикэм самбэмкIэ ­испорт еджапIэ тыди щызэлъа­шIагъ. Адыгеим ыцIэ дахэкIэ рязыгъэIогъэ спортсмен пчъагъэ мыщ къычIэкIыгъ. Ахэм ащыщ дунаим гъогогъу 11-рэ ичемпионэу Хьасанэкъо Мурат.

Мы аужырэ илъэсхэм еджапIэм ипащэр Делэкъо Адам. БэмышIэу ащ щытхъуцIэу «Адыге­им изаслуженнэ тренер» зыфиIорэр къыфагъэшъошагъ.

— Мы илъэсым тикIалэхэм гъэхъэгъэ инхэр ашIыгъэх. ­Адыгеим, Урысыем, дунаим ащызэхащэгъэ зэнэкъокъухэм тахэлэжьагъ, зэрифэшъуашэу закъыщыдгъэлъэгъуагъ, тикIалэ­хэм медальхэр къахьыгъэх. Анзор дунаим ичемпион зэрэ­хъугъэм лъэшэу тигъэгушIуагъ. Мы зэныбджэгъухэм зы мафэ бламыгъэкIэу тренировкэм къэ­кIох, агу етыгъэу спортым пы­лъых. Ахэм ащыщэу нэбгыритф спортымкIэ мастер хъугъэх. Анзор спортымкIэ дунэе класс зиIэ мастерыцIэр къыфагъэ­шъошагъ. Джы нахьыжъхэм якуп хэуцощт, тыщэгугъы игъэхъа­гъэхэм къащымыуцоу ахигъэ­хъонэу, — еIо Делэкъо Адам.

Ащ къызэрэхигъэщыгъэмкIэ, мы спорт еджапIэм зыщызы-гъа­сэхэрэр къазыкIыхэщыхэрэр агу етыгъэу зызэрагъэхьазы­рырэр ары. ХэушъхьафыкIыгъэ ха­бзэхэмкIэ мыщ Iут тренерхэм Iоф ашIэ, нахьыжъхэм ягъэхъа­гъэхэр ныбжьыкIэхэм ящысэтехыпI. КIэлэцIыкIухэм апэрэ гъэхъагъэхэр языгъэшIырэ къуа­джэхэм ащылэжьэрэ тренерхэм яIофшIэни мэхьанэшхо зэриIэр ащ къыIуагъ. БэнакIохэм яIэпэIэсэныгъэ тапэкIи зэрэ­хагъэхъощтыр, хэгъэгум изэ­нэ­къокъухэм ахэ­лэжьэнхэу зызэрагъэхьазырыщтыр Адам къыхи­гъэ­щыгъ.

ДЕЛЭКЪО Анет.