ЦIыфхэр анахь зэжэхэрэ мэфэкI шъхьаIэр илъэсыкIэм икъихьагъу ары. ПцIыикъ чъыгым ымэ IэшIуи, хьалэмэтыгъэу илъэсыкIэм къыздихьырэми тигуапэу тяжэ.

Хэти ащ зэфэшъхьафэу пэгъокIы, анахьэу бысымгуащэхэр ары гушIогъо-гумэкIыгъохэм ахэтхэр. Зыщалъэщт шъуашэ­хэм, аупщэрыхьыщт шхыны­гъохэм ыкIи шIухьафтынхэм якъыхэхын анахьэу зыуж итхэр. Непэ титхыгъэ ахэм та­къыщытегущыIэщт.

Сыд фэда Блэгъожъым иилъэс?

2023-рэ илъэсым итамыгъэу ТхьакIумкIыхьэр тэгъэкIотэ­жьышъ, Блэгъожъым иилъэс тыпэгъокIы. КъокIыпIэ горос­копым къызэриIорэмкIэ, мыр зэхъокIыныгъэхэм ыкIи егъэжьэпIэшIухэм яуахът. Блэгъожъыр акъылыгъэм, кIуачIэм ыкIи тетыгъом ятамыгъ. ЛъэгэпIэшхо­хэм уафэзыщэщт шэнхэр — пкIуачIэкIи пшъхьэкIи уицыхьэ зытелъыжьыныр, творчествэр ыкIи теубытагъэр зыхэлъхэм Блэгъожъыр къадеIэщт. Зыхэмылъхэри инэплъэгъу икIыщтхэп. КIочIэшхо зыхэлъ псэу­шъхьэм тетыгъор инэшанэшъ, гъэхъагъэхэр ашIынхэм къы­фэджэ зэпытыщт, ащкIэ къин амылъэгъоу амалышIухэр къаритыщтых.

Сыдэущтэу ащ тыпэгъокIыщта?

Къихьащт илъэсым итамыгъэ ишэнхэм ялъытыгъэу ащ тыпэгъокIын фае. Блэгъожъыр псэу­шъхьэ кIочIэшхоу зэралъытэрэм дакIоу, чэфыгъор ыкIи мэкъэшхохэр икIасэх. Арышъ, уигупсэ нэбгырабэхэм укъяджэнышъ, илъэсыкIэр къызэдибгъэхьаныр дэгъу. ГухэлъышIухэр зыфэб­гъэуцужьхэмэ къыбдэхъущтых, ау пцIыр Блэгъожъым ыгу ри­хьырэпышъ, уицыхьэ зытемылъ Iофхэр епхьыжьэхэ хъущтэп. Мы псэушъхьэм унагъом мэхьанэшхо реты. Унэгъо зэфыщытыкIэхэм, зэгурыIоныгъэм, зэдеIэжьыным, унэгъо хэбзэшIухэм уасэ афешIы. Арышъ, унэгъо кIоцIым илъэсыкIэр къыщибгъахьэмэ дэгъу.

Щыгъынэу зыщыплъэщтхэм, унэр зэрэбгъэкIэрэкIэщтым, Iанэм теппхъощт шэкIхэм ды­шъэпсыр нахь къябэкIынэу щыт. Лыдрэ ыкIи нэфырэ шъохэр Блэгъожъым икIасэх. Джащ фэдэу плъыжьыр ыкIи уцышъор хэбгъахьэхэмэ хъущт. Ау фы­жьышъохэм, шхъуантIэм, гъо­жьым защыудзыемэ нахьышIу.

Iанэм тебгъуцощт шхыныгъохэр

Тетыгъор ыкIи пэщэныгъэр зинэшэнэ псэушъхьэм Iэнэ бай шыгъэр ыгу рихьыщт. Анахь шъхьаIэу тетын фэе пкъыгъохэм ащыщ, зы нахь мыхъуми, къэ­нэфырэ шэф остыгъэр. Сыда пIомэ мы мэфэкIым Блэгъо­жъым итамыгъэ шъхьаIэр ма­шIор ары.

Гъомылапхъэу уупщэрыхьыщтхэм лы зэфэшъхьафхэр (мыгъэщтыгъэхэмэ нахь дэгъу) къябэкIынхэу щыт, анахьэу бы­лымылыр ыкIи тхьачэтылыр, псычэтылыр, ау тхьакIумкIыхьэ­лыр ыкIи чэтылыр хъущтхэп. Пцэжъыер, пынджыр ыкIи щыбжьый стырыгъакIэр къызыхэ­щырэ салатхэр тебгъэуцощтых. Пхъэшъхьэ-мышъхьэхэм алъэныкъокIэ цитрусхэр нахь хэбгъэхьанхэ фае. Дэшхо лъэпкъ зэфэшъхьафхэр, дэшхынхэмкIэ нэкулъыр ыкIи къуаер пIуакIэу зэтеупкIыгъэхэу Iанэм къекIущтых.

ГъэшIэгъонэу шъуупщэрыхьын шъулъэкIыщтхэм ащыщхэр:

Салатэу «Тайскэ блэгъожъ»

Хэлъыщтхэр: былымылэу – грамм 800, помидори 2 — 3, нэшэбэгуи 3, щыбжьый IэшIуи 2, бжьыныф грамми 10, шъугу рихьырэм фэдизэу сое соусыр, оливкэ дэгъэ миллилитрэ 30, зэрэбгъэкIэрэкIэщтхэ петрушкэр ыкIи кунжутыр (угу рехьымэ), щыгъу, щыбжьый.

ЗэрэпшIыщтыр: 1. Былымылыр бгъэжъонышъ, пIуакIэу, ау шъуамбгъоу зэтеуупкIыщт. 2. Оливкэ дагъэр, сое соусыр, бжьыныфыр, щыгъур, щыб-­ жьыир зэхэбгъэкIухьащтых, ащ лыр хэплъхьащт. 3. Нэшэбэгур хъурэешхоу, щыбжьыир — псыгъоу уупкIэтэщтых, помидорыр плIэу зэгоуупкIыщт. Щыбжьыир макIэу бгъэлыбжьэн фае. Хьазыр хъугъэхэр зэкIэ зэхэо­лъхьэхэшъ, жъгъэеу упкIэтэгъэ петрушкэр, кунжутыр теотэ­къожьых.

Гъэушъэбыгъэхэр ­зыкIоцIылъ кIэнкIэу «Блэгъожъым ынэхэр»

Хэлъыщтхэр: кIэнкIи 3, къое пытэ грамм 45-рэ, бжьыныф цэли 2, нэшэбэгу грамм 60, майонез щайджэмышхи 3, кIэ зэрымылъ маслинэхэр — 2, щыгъу. Зытеплъхьащтхэ салат тхьапэхэр.

ЗэрэпшIыщтыр: кIэнкIэр та­къикъи 10-рэ огъажъо, тIо зэгооупкIы, уфэсакъызэ кургъур къиохы. Фыжьхэр шъхьафэу огъэтIысых, кургъур цацэкIэ огъэушъэбы, теркэм дэгъэкIыгъэ къуаер ащ хэолъхьэ. Бжьыныф гъэушъэбыгъэри, майонезри ащ хэогъэкIухьэх. ИщыкIагъэмэ, макIэу щыгъу хэптэкъощт.

Зэхэшъулъхьагъэр теIэты­кIыгъэу кIэнкIэ ныку фыжьым иплъхьажьыщт. Ащ ыгузэгу пхъэпэ псыгъокIэ мэшэ цIыкIу фэпшIынышъ, нэхэм афэдэу маслинэхэм ахэуупкIынышъ, ибгъэтIысхьащт. Нэшэбэгу шъуам­пIэр псыгъоу къытеуупкIынышъ, къое зэхэлъым епщэ­кIыщт. КIэнкIэ ушъагъэхэр лэгъэ гъэкIэрэкIагъэм ибгъэтIыс­хьа­жьыщтых.

ШIухьафтынэу афэпшIыщтхэр

Блэгъожъыр псэушъхьэ нэхаеу зэрэщытым емылъытыгъэу, ыгъэлъапIэхэрэр ыгъэгушIонхэр икIас. Арышъ, шIухьафтынэу къыхэпхыщтхэм дэгъоу уягу­пшы­сэн фае.

Къихьэрэ илъэсым къекIущтхэм ащыщхэм ягугъу къэтшIын. Къэрэу лъэкъо кIыхьэ зытешIы­хьэгъэ керамикэ вазэр, пэгагъэм ыкIи дэхагъэм ятамыгъэу Китаим щагъэлъэпIэрэ дышъэ чэт зытешIыхьэгъэ салфеткэхэр зыдалъхьэрэр, дэпкъым палъэрэ жьыфыр — унэ кIоцIыр рагъэ­дэхэнэу шIухьафтын дэгъу хъущтых. Пхъэшъхьэ-мышъхьэхэр зэралъхьэрэ лэгъэ зэфэшъхьаф гъэкIэрэкIагъэхэри ашIогъэшIэгъоныщтых. Илъэсым итамыгъэ зэрышIыхьэгъэ хьап-щыпхэри къыхэпхыхэмэ дэгъу.

Лыдырэ пкъыгъохэр Блэгъо­жъым зэрикIасэхэр къыдыхэплъытэмэ, ювелир пкъыгъохэр шIухьафтынэу уигупсэхэм афэпшIымэ, ыгъэгушIощтых.

Къихьащт илъэсыкIэм хэти зэжэрэ гушIуагъор, хъярыр, псауныгъэр, гъомылапхъэкIи псэукIэмкIи баиныгъэр, ма­мырныгъэр къытферэхьых!

Къэзыгъэхьазырыгъэр Iэшъынэ Сусан.