Адыгэ Республикэм и ЛIышъхьэу КъумпIыл Мурат кIэщакIо зыфэхъугъэ илъэсыкIэ шIушIэ Iофтхьабзэхэр Адыгеим щаублагъэх. Мы илъэсым ахэр щыкIощтых Пушкиным и Унэ. ИлъэсыкIэ мэфэкIхэм ялъэхъан ЛIыжъ ЩтыргъукIым и Унэу ар щытыщт.

[caption id="attachment_143597" align="aligncenter" width="800"] А. Гусев[/caption]

ЗэхэщакIохэм анаIэ лъэшэу тырагъэ­тыгъ сабый пэпчъ пшысэ хьалэмэтым хэтым фэдэу къыщыхъуным. Ащ пае шIушIэ Iофтхьабзэхэр окIофэхэ артистхэм, гуфакIохэм, аниматорхэм Iоф ашIэщт. ИлъэсыкIэ къэгъэлъэгъонхэр аублэнхэм ыпэкIэ кIэлэцIыкIухэм апае творческэ чIыпIэхэр агъэнэфэщтых, джэгукIэ чэфхэр афызэхащэщтых. Ащ нэмыкIэу спектаклэу «Мэзэ пшIыкIутIу» зыфиIорэр къафагъэлъэгъощт, нэмыкI Iофтхьэбзэ гъэшIэгъоныбэмэ ахагъэлэжьэщтых.

Непэ апэрэ илъэсыкIэ мэфэкI Iофтхьабзэм нэбгырэ 350-рэ фэдиз къекIолIагъ. ПстэумкIи мы илъэсым сэнаущыгъэ зыхэлъ кIэлэцIыкIухэу, хэушъхьафыкIыгъэ дзэ операцием хэлажьэхэрэм ыкIи гъот макIэ зиIэ унагъохэм къарыкIыгъэхэу мини 4-м ехъу илъэсыкIэ пцIыикъхэм къякIолIэщт. Республикэм имуниципальнэ образование пстэуми ахэр къарыкIыщтых. КIэлэцIыкIу пэпчъ шIухьафтын фагъэ­хьазырыгъ — IэшIу-IушIу зэфэшъхьафхэр ыкIи республикэм и ЛIышъхьэу КъумпIыл Мурат ыцIэкIэ илъэсыкIэ шIуфэс гущыIэхэр зытетхэгъэ открыткэр. Адыгеим и ЛIышъхьэ республикэм щыпсэурэ кIэ­лэцIыкIу пстэуми афэлъаIо еджэнымкIэ, творчествэмкIэ, спортымкIэ гъэхъэгъа­кIэхэр ашIынхэу.

«Республикэм хэбзэшIу щы­хъугъ ащ фэдэ илъэсыкIэ шIушIэ Iофтхьабзэхэр зэхэщэгъэнхэр. Ахэм тищыIакIэ хьалэмэтыбэ къыхалъхьэ. ТикIэлэцIыкIухэм тызэрафэгумэкIырэр зэхядгъэшIэныр, илъэсыкIэ гухэлъхэу яIэхэр къа­дэхъунхэм иамал яттыныр тэ типшъэрылъ, ежьхэм ящхы мэкъэ чэфрэ гушIор къызыкIихырэ нэгу насыпышIохэмрэ ащ иджэуапэу къытпагъохых. Тэ, нахьыжъхэм, зэкIэ тфэ­лъэкIыщтыр тшIэн фае ыкIи тшIэщт тикIэлэцIыкIухэм зыкIэхъопсыхэрэр къадэхъунхэм пае, анахьэу етIани щыIэны­гъэм чIыпIэ зэжъу ригъэфэгъэ унагъохэм ыкIи хэушъхьафыкIыгъэ дзэ операцием хэлажьэхэрэм якIэлэцIыкIухэм мы Iофтхьабзэхэм афэдэхэр ащымыгъупшэхэу агу къинэнхэм пае», — къыIуагъ КъумпIыл Мурат.

Адыгеим и ЛIышъхьэ агу къызэригъэ­кIыжьыгъэмкIэ, республикэм джащ фэдэу щэкIо Iофтхьабзэу «ШIоигъоныгъэхэм япцIыикъ» зыфиIорэр. Ащ епхыгъэ Iоф­тхьэбзэшIухэу зэрахьэхэрэм ахэлэжьэрэ цIыфхэм япчъагъэ нахьыбэ мэхъу зэпыт. Илъэс заулэу ар зыщыкIорэм къыкIоцI кIэлэцIыкIу мин пчъагъэу щыIэныгъэм чIыпIэ зэжъу ригъэуцогъэ унагъохэм къарыкIыгъэхэм зыкIэхъопсыхэрэр къа­дэхъунымкIэ ишIогъэшхо къэкIо. Ащ нэмыкIэу республикэм иублэпIэ классхэм арыс пстэуми апае илъэсыкIэ шIухьафтынхэр къащэфыгъэх. Херсон хэкум и Геническэ районэу Адыгеим ынаIэ зытыригъэтырэм ис кIэлэцIыкIухэми шIухьафтын IэшIухэр афагощыщтых.

АР-м и ЛIышъхьэ ипресс-къулыкъу