IэпыIэгъур лъагъэкIуатэ
ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм ящыкIэгъэ социальнэ IэпыIэгъур ягъэгъотыгъэнымкIэ Межведомственнэ комиссием тыгъуасэ зэхэсыгъо иIагъ. Ар зэрищагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.
Зэхэсыгъом ипэублэ ащ къызэрэщиIуагъэмкIэ, яIофшIэнкIэ лъэныкъо шъхьаIэу анаIэ зытырагъэтыхэрэм мы зигугъу къэтшIыгъэ купыр ащыщ. Зидзэ пшъэрылъхэр зыгъэцакIэхэрэм яфэшъошэ социальнэ IэпыIэгъур ягъэгъэгъотыгъэныр лъагъэкIуатэ.
— АР-м и ЛIышъхьэ унашъо зэришIыгъэм тетэу хэушъхьафыкIыгъэ дзэ операцием хэлэжьэнэу кIуагъэхэм зэтыгъо ахъщэ IэпыIэгъоу сомэ мини 100 зырыз ыпэкIэ аратыщтыгъ (зэкIэмкIи мыщ фэдэ тынхэр нэбгырэ 1586-мэ аIэкIагъэхьагъ). 2023-рэ илъэсым мэкъуогъум и 16-м къыщегъэжьагъэу и 29-м нэс а зэтыгъо ахъщэ тыныр сомэ мини 150-м нагъэсыгъ ыкIи ар нэбгыри 149-мэ аратыгъ. Мы илъэсым мэкъуогъум и 30-м къыщыублагъэу ахъщэ тыныр сомэ мин 200 хъугъэ, нэбгырэ 803-мэ ар аIэкIагъэхьагъ. ХэушъхьафыкIыгъэ дзэ операцием хэлэжьэгъэ къулыкъушIэхэу ыпэкIэ контузие, шъобж ыкIи уIагъэ зытещагъэ хъугъэхэм зэтыгъоу сомэ мин 500 зырыз ятыгъэныр (нэбгырэ 441-мэ) а IэпыIэгъум къыдыхэлъытагъ. ХэкIодэгъэ къулыкъушIэхэм яунагъохэм сомэ миллион зырыз араты (унэгъуи 112-мэ афатIупщыгъэх). ХэушъхьафыкIыгъэ дзэ операцием хэлэжьэрэ къулыкъушIэхэм ясабыйхэм зэтыгъоу сомэ мин 20 зырыз ятыгъэныри социальнэ IэпыIэгъум хэхьэ, — хигъэунэфыкIыгъ Мырзэ Джанбэч.
НэмыкI социальнэ фэIо-фашIэу хэушъхьафыкIыгъэ дзэ операцием хэлажьэхэрэм ыкIи ахэм яунагъохэм афагъэцакIэхэрэм министрэр игъэкIотыгъэу къащыуцугъ.
Купэу зигугъу къэтшIыхэрэм яIэзэнхэмкIэ, егъэджэн IофхэмкIэ фэгъэкIотэнэу яIэхэм къатегущыIагъэх псауныгъэр къэухъумэгъэнымкIэ министрэу Мэрэтыкъо Рустемрэ гъэсэныгъэмрэ шIэныгъэмрэкIэ министрэу Евгений Лебедевымрэ.
Джащ фэдэу къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ мэзихым IофшIэнэу ышIагъэр зэхэсыгъом къыщызэфихьысыжьыгъ ащ ипащэу ПIатIыкъо Аслъан. Зэхэсыгъом къыщаIэтыгъэ IофыгъохэмкIэ ищыкIэгъэ унашъохэр аштагъэх, къэкIощт илъэсым анаIэ зытырагъэтыщт лъэныкъохэр агъэнэфагъэх.
Iэшъынэ Сусан