Лъэпкъ творчествэм хахъо ышIынымкIэ Iофышхоу ышIэрэм фэшI «Лъэпкъ къашъом» ылъэныкъокIэ тынэу «Урысыем ыпс» зыфиIорэ цIэр къыфагъэшъошагъ «Мыекъуапэ инэфылъэхэм» яхудожественнэ пащэу Нэныжъ Айдэмыр. Къылэжьыгъэ тыныр мы мафэхэм ащ Москва къыщыратыжьыгъ. Артист цIэрыIом фэгушIуагъ Адыгэ Республикэм и ЛIышъхьэу КъумпIыл Мурат.

«ТичIыгогъоу Нэныжъ Айдэмыр Теуцожь ыкъом къыфагъэшъошэгъэ тын лъапIэмкIэ сыфэгушIо сшIоигъу. КIэлэцIыкIу къэшъокIо купэу «Мыекъуапэ инэфылъэхэм» ар япащ. БлэкIыгъэм «Налмэсым» икъэшъуакIощтыгъ. Творческэ гъогу кIыхьэу къыкIугъэм къыкIоцI щытхъуцIэ пчъагъэ къылэжьыгъ. Ар УФ-м культурэмкIэ изаслуженнэ IофышI, АР-м инароднэ, КъБР-м изаслуженнэ артист.

Къэшъон искусствэм непи иIахьышIу хелъхьэ — джы кIэлэегъаджэу. Сэнаущы­гъэ ин зыхэлъ ныбжьыкIэхэр егъасэх, ти­творческэ куп цIэрыIохэм яIофшIэн лъы­зыгъэкIотэщт лIэужыкIэхэр егъэхьазырых.

Урысыем и Правительствэ и Тхьаматэ игуадзэу Татьяна Голиковам лауреатыцIэр къэзылэжьыгъэхэм закъыфигъэзагъ ыкIи къызхэкIыгъэхэм ямызакъоу, къэралыгъоми, дунаим зэрэ­псаоу щыпсэухэрэми ялъэпкъ культурэ зэра­лъа­гъэIэсырэр къыIуагъ.

Псауныгъэ пытэ иIэу, творческэ гухэ­лъыкIэхэр зыфигъэуцужьхэу ыкIи зыдэ­лэжьэрэ сабыйхэм ягъэхъэгъэшIухэм ащыгушIукIын амал иIэнэу сыфэлъаIо Нэныжъ Айдэмыр Теуцожь ыкъом», — къыщеIо Адыгэ Республикэм и ЛIышъхьэу КьумпIыл Мурат и ТГ нэкIубгъо.

Анцокъо Ирин.