Янэплъэгъу рагъэкIырэп
ХэбзэшIу зэрафэхъугъэу, IэкIыбым къикIыжьыгъэ тилъэпкъэгъухэр щыIэныгъэм хэгъэгъозэжьыгъэнхэмкIэ Гупчэм хэкум къэзыгъэзэжьыгъэ тилъэпкъэгъухэм якIэлэцIыкIухэм ИлъэсыкIэ мэфэкIым ехъулIэу шIухьафтынхэр афешIых.
[caption id="attachment_143589" align="aligncenter" width="800"] А. Iэшъын[/caption]
Тыгъуасэ кIэлэцIыкIу 80-м ехъумэ IэшIу-IушIу зэхэпхъагъэхэр зэрылъ къэмлэнэ гъэкIэрэкIагъэхэр ыкIи мэфэкI Iофтхьабзэу Мыекъуапэ щырекIокIыхэрэм кIэлэцIыкIухэр ахэлэжьэнхэ алъэкIынэу АР-м и ЛIышъхьэ иегъэблэгъэ тхылъхэр Гупчэм ипащэу ГъукIэлI Асхьад аритыжьыгъэх.
Илъэсым къыщегъэжьагъэу илъэс 14-м нэс зыныбжь кIэлэцIыкIухэр Гупчэм къыращэлIагъэх. Ащ ипащэ зэхахьэм хэлэжьэрэ ны-тыхэм, кIэлэцIыкIухэм ИлъэсыкIэ мэфэкIым фэгъэхьыгъэу къафэгушIуагъ, шIоу щыIэр къадэхъунэу афиIуагъ.
— Мыгъэ илъэс 12 хъугъэ мыщ фэдэ шIушIэ Iофтхьабзэр зэрэзэхатщэрэр. Тилъэпкъэгъу кIэлэцIыкIухэм дэгъоу ашIэ мы мэфэкIыр зыфэдэр. Илъэс къэс тиамал къызэрихьэу шIухьафтын цIыкIухэр афэтэшIых, тэгъэгушIох. Ятарихъ хэку къызэрифэжьыгъэхэм щыгушIукIхэу, зэрэтицIыфхэр ашIэу, щыIэкIэшIу яIэу щыIэнхэу тыфай, — къыIуагъ ГъукIэлI Асхьад.
— Мыщ фэдэ шIушIэ Iофтхьабзэ зэхэтщэнымкIэ зишIуагъэ къытэзыгъэкIыгъэхэм лъэшэу тафэраз. Апэ ягугъу къэсшIымэ сшIоигъу АР-м IофшIэнымкIэ ыкIи социальнэ хэхъоныгъэмкIэ и Министерствэрэ гъэсэныгъэмрэ шIэныгъэмрэкIэ Министерствэмрэ. Ахэм яхьатыркIэ АР-м и ЛIышъхьэ иегъэблэгъэ тхылъхэр хэкум къэзыгъэзэжьыгъэ тилъэпкъэгъухэм якIэлэцIыкIухэм зэкIэми къаратыгъэх. Джащ фэдэу ренэу тиIэпыIэгъух пшъэдэкIыжьэу ахьырэмкIэ гъунэпкъэ гъэнэфагъэ зиIэ обществэхэу «Мыекъопэ машинэшI заводыр», «Картонтарэр», зэIухыгъэ Iахьзэхэлъ обществэу «Мыекъопэ редукторышI заводыр», Яблоновскэ дэт «Домбытхимыр», «Мыекъопэ пивэшI заводыр», Кощхьэблэ районым ит дэгъэшI заводэу «Мамырыкъор», Мыекъопэ щэ заводыр. Илъэс къэс мылъкукIэ IэпыIэгъу къытфэхъу шIушIакIоу Байбек Заурбый. Мыхэм зэкIэми «Тхьашъуегъэпсэу» ясIо сшIоигъу. Гъэзетыр къызфэзгъэфедэзэ илъэсыкIэу къихьэрэмкIэ ахэм сафэгушIо, псауныгъэ яIэу, агу пыкIырэм фэдишъэ хэхъожьэу щыIэнхэу сафэлъаIо.
Зихэкужъ къэзыгъэзэжьыгъэ тилъэпкъэгъухэм къакIэхъорэ кIэлэцIыкIухэм япчъагъэ илъэс къэс зэрэхахъорэм уимыгъэгушIон ылъэкIыщтэп. ТапэкIи мыхэр янэплъэгъу рагъэкIыщтхэп, кIэлэцIыкIухэм щыIэкIэ тэрэз яIэу псэунхэм Гупчэр зэрэдэлэжьэщтыр къыIуагъ ГъукIэлI Асхьад.
КIАРЭ Фатим.