УФ-м и Президент иунашъокIэ цIыфхэм якъэгъэнэжьын фэгъэзэгъэ къулыкъум иIофышIэхэм я Мафэ 1990-рэ илъэсым къыщегъэжьагъэу тыгъэгъазэм и 27-м хагъэунэфыкIы.

Урысые Федерацием икъулыкъухэу цIыфхэм якъэгъэнэжьын фэгъэзагъэхэм яIофшIэн къинэу, щынагъоу щытыр зэрагъэцакIэрэм бэкIэ елъытыгъ цIыфхэм ящыIакIэ зыфэдэщтыр, республикэм ипредприятиехэм Iоф зэрашIэщтыр, социальнэ лъэныкъом Iофхэр зэрэщызэпыфэщтхэр. ЧIыпIэ зэжъу ифагъэхэм IэпыIэгъу афэхъунхэм ренэу фэхьазырхэу машIом, псыкъиуным, чIыопс, техногеннэ нэшанэ зиIэ тхьамыкIагъохэм къыздахьырэ къиныгъохэм ядэгъэзыжьынкIэ япшъэрылъ щытхъу хэлъэу агъэцакIэ.

Урысыем ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгем щыIэм иIофышIэхэр цIыфэу IэпыIэгъу зищыкIагъэхэм апэу алъэIэсых. Ахэм яIофшIэн изэфэхьысыжь шъхьаIэр щыIэныгъэ мин пчъагъэу къагъэнэжьыгъэхэр ары.

Илъэс 15 хъугъэу ищытхъу аригъаIозэ мы къулыкъум Iоф щешIэ Кощхьаблэ дэт мэшIогъэкIосэ-къэгъэнэжьэкIо частэу N 4-м икъэгъэнэжьакIоу Мамыщ Аслъан Нурбый ыкъом.

Аслъан къуаджэу ХьакIэмзые щыщ. Гурыт еджапIэм ыуж бухгалтер-экономист сэнэхьатыр зэригъэгъотыгъ. Нэужым дзэ къулыкъум кIуагъэ. Ар дэгъоу къыхьи къызегъэзэжьым, IофшIэн зэфэшъхьафхэр ыгъэцэкIагъэх. Кощхьаблэ дэт мэшIогъэ­кIосэ-къэгъэнэжьэкIо частэу N 4-м ипащэщтыгъэу ХьакIэмыз Бислъан икъоджэгъу зыфэдэ цIыфыр дэгъоу ешIэти, ригъэблагъи, ошIэ-дэмышIэ IофхэмкIэ и Министерствэ епхыгъэу къулыкъур ригъэжьагъ.

МэшIогъэкIосэ-къэгъэнэжьакIоу Ас­лъан IофшIэныр ригъэжьагъ. Илъэс зэкIэлъыкIохэм иIэпэIэсэныгъэ хигъахъозэ къырыкIуагъ, частым ипащэу зэрагъэнэфагъэмкIэ цыхьэу къыфашIыгъэр къыгъэшъыпкъэжьыгъ, иIофшIэн хэшIыкIышхо фыриIэу егъэцакIэ.

Илъэс 15-м къыкIоцI пшъэдэкIыжьэу иIэр къыгурыIозэ къэгъэнэжьэкIо къулыкъум Iоф зэрэщишIагъэм фэшI щытхъу тхылъхэмкIэ мызэу, мытIоу къыхагъэ­щыгъ. Ащ нэмыкIэу мэшIогъэкIосэ-прикладной спортымкIэ зэнэкъокъухэм ха­гъэ­унэфыкIырэ чIыпIэхэр къащыдихы­гъэх.

Игъэхъагъэхэм афэгъэхьыгъэу Аслъан бэ къыIотэн икIасэп, иIофшIэн щынагъоу зэрэщытым, псэемыблэжьныгъэ зэрэхэлъым ямылъытыгъэу, ащ лIыхъужъэу зилъытэжьырэп. Къыхигъэщырэ закъор иIофшIэн шIу зэрилъэгъурэр, шъыпкъагъэ хэлъэу ар зэригъэцакIэрэр ыкIи обществэмкIэ ащ мэхьанэшхо зэриIэр ары.

ЕтIани къэIогъэн фае, Аслъан гуетыныгъэшхо фыриIэу къэгъэнэжьэкIо сэнэхьатыр къыхэзыхыгъэ ныбжьыкIэхэм яшIэныгъэхэм, яIэпэIэсэныгъэ ахэгъэхъо­гъэнымкIэ Iофтхьабзэу зэхащэхэрэм ахэлажьэ.

— Мы структурэм хэтхэр мэшIогъэ­кIосэн-къэгъэнэжьын Iофыгъохэм дэгъоу ащыгъозэнхэ фае, — еIо Аслъан. — Ахэм апэрэ медицинэ IэпыIэгъури арагъэкIы­шъун, цIыфым изытет зыфэдэр агъэунэфышъун фае. Джащ фэдэу ежь къэгъэ­нэжьакIор сыд фэдэрэ чIыпIэ ифагъэми, къыхэкIыжьышъун, нэмыкIхэми адэIэпыIэшъун ылъэкIыным фытегъэпсыхьэгъэн фае.

— ЦIыфхэм IэпыIэгъу афэхъугъэным сыдигъуи фэхьазыр, исэнэхьат фэшъыпкъэ цIыфхэм ащыщ Аслъан, — аIо иIоф­шIэгъухэм, — ащкIэ шъхьэкIэфэныгъэ къылэжьыгъ.

КъэгъэнэжьэкIо сэнэхьатым урылэжьэным фэшI теубытагъэ ыкIи пытагъэ пхэ­лъынхэ, ащ дакIоу физическэ ухьазырыныгъэ дэгъу уиIэн фае. А нэшанэхэр зэкIэ хэлъых Аслъан.

IэпэIэсэныгъэшхо зыхэлъ къулыкъу­шIэхэм апсэ емыблэжьхэу, щытхъу хэлъэу япшъэрылъ агъэцакIэ. ЛIыхъужъныгъэ ин зищыкIэгъэ сэнэхьатым зищыIэныгъэ езыпхыгъэхэм мы мафэм гущыIэ фабэхэр апэтэгъохых. Республикэм икъулыкъухэу цIыфхэм якъэгъэнэжьын фэгъэзагъэхэм ащылажьэхэрэм псауныгъэ пытэрэ щыIэкIэ-псэукIэ дэгъурэ яIэнэу, шIоу щыIэр къадэхъунэу, мамырэу псэунхэу тафэлъаIо!

КIАРЭ Фатим.