Адыгэ Республикэм футболымкIэ икIымэфэ зэIухыгъэ зэнэкъокъу къыдыхэлъытэгъэ ешIэгъухэр мы мафэхэм щыIагъэх. Я 3-рэ турыр гъэшIэгъонэу кIуагъэ.

Ветеранхэм ялигэ хэт командэхэм ащыщэу плIымэ очко хырых рагъэкъугъ. Ау апэрэ чIыпIэм щытыр «Делотехникэр» ары. Мыр командэу «Звездам» дешIагъ ыкIи 2:0-у текIоныгъэр къыдихыгъ. ЯтIонэрэ чIыпIэр зыIыгъ «Дорожникыр» «Щагъдыим» нахь лъэшыгъ, пчъагъэр 2:0. Ящэнэрэр — «Щагъдый». Ащ къыкIэлъэкIо «ВНГ-р», ар «Фыщтым» дешIагъ ыкIи 5:0-у къышIуихьыгъ. «Джокерыр» очкоуи 3-кIэ ащ ыуж къенэ. «Звездам» ыкIи «Фыщт» очко яIэп.

Апэрэ лигэм щешIэхэрэм нахь къахэщырэр командэу «Ошъутенэр» ары. Ащ ешIэгъуи 4 иIагъ, зэкIэри къыхьыгъэх. Гъогогъу 35-рэ Iэгуаор къэлапчъэм ди­дзагъ, къышIудадзагъэр 9 ныIэп. Мы командэм хэт Мазлэ Арсен гъогогъу 14-рэ дидзагъ. Пэрытныгъэ зыIыгъым очкоуи 2-кIэ ыуж къенэ «Тульскэр». Ящэнэрэ чIыпIэм щыт «Зэкъошныгъ-2008» зыфиIорэр.

Апшъэрэ лигэм хэт командэхэм язэIукIэгъухэр сыдигъуи гъэшIэгъоных. Апэрэ чIыпIэм щыт «Урожаир» «Кавказым» дешIагъ ыкIи 4:0-у текIоныгъэр къыдихыгъ. Ащ ыуж ит «МФОК Ошъутенэр». Медальхэм афэбанэх командэхэу «Юность» ыкIи «Картонтара-Шытхьал» зыфиIохэрэр.

Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Урожай» — 6. 2. «МФОК Ошъутен» — 6. 3. «Юность» — 4. 4. «Картонтара-Шытхьал» — 3. 5. «ИФК и дзюдо АГУ» — 3. 6. «МГГТК АГУ» — 1. 7. «Кавказ» — 0. 8. «Зэкъошныгъ» (Ермэлхьабл) — 0.