[caption id="attachment_143569" align="aligncenter" width="800"] М. Быжьым ихъарзынэщ.[/caption] Псауныгъэр къэухъумэгъэным иIахьы­шIу зэрэхишIыхьагъэм ыкIи гуетыныгъэ фыриIэу илъэсыбэхэм иIофшIэн зэри­гъэцакIэрэм афэшI «АР-м псауныгъэр къэухъумэгъэнымкIэ изаслуженнэ IофышI» зыфиIорэ щытхъуцIэр ащ къыфагъэшъошагъ.

— Мыщ фэдэ цIэ лъапIэ къызэрэсфагъэшъошагъэм фэшI ти ЛIышъхьэу КъумпIыл Мурат ыкIи къоджэдэсхэм лъэшэу сафэраз, «тхьашъуегъэпсэу» ясэIо. Уасэ къыпфашIынышъ, пцIэ дахэкIэ къыраIоныр зымыуасэ щыIэп, ащ кIуачIэ къыуеты, нахьышIоу уиIофшIэн бгъэцэкIэным уфещэ, — еIо Мирэ.

ИIофшIэгъухэм, медицинэм иветеранхэм, мы къулыкъум зищыIэныгъэ езыпхыгъэ унагъохэм ягугъу къышIызэ, нэбгырэ пэпчъ осэ ин зэриIэм къыкIигъэтхъыгъ Мирэ.

— ЦIыфыр дунаим къызытехъокIэ сэнэхьатэу къыхихыщтыр лъым хэлъэу къэхъоу ары сызэрегупшысэрэр, — къе­Iуатэ Мирэ. — СицIыкIугъом къы­щыублагъэу гукIэгъуныгъэр къысэбэкIэу сы­къэтэджыгъ. Непэ къызнэсыгъэми гумахэу сыщыт, зыгорэ къызысымаджэкIэ, ащ псынкIэу сишIуагъэ зэрезгъэкIыщтым, IэпыIэгъу сызэрэфэхъущтым ренэу сыфэхьазыр.

Мирэ къызэрэтфиIотагъэмкIэ, гурыт еджапIэр къызеух нэуж 1986-рэ илъэсым Мыекъуапэ дэт медицинэ колледжым чIэхьагъ. Ащ ыуж псэупIэу Мостовскоим дэт сымэджэщым иотделение зэфэ­шъхьафхэм медсестрау илъэс 12-рэ ащылэжьагъ. Нэужым, 1998-рэ илъэсым къыщегъэжьагъэу къуаджэу Фэдз епхыгъэ IэпыIэгъу псынкIэм медсестрау, мы уахътэм амбулаторием ифельдшерэу Iоф ешIэ.

— Сымаджэр къысэолIагъэу сыдемы­Iэу зэкIэзгъэкIожьырэп, ренэу цIыфхэм сиIэпыIэгъу зэрязгъэкIыщтым сыпылъ. Врач дэгъу тиI, Нэгъой Фатимэ, мы уахътэм сабыим икъэхъун епхыгъэу ащ Iоф ышIэрэп, ащ ычIыпIэ Лабинскэ къи­кIызэ тхьамафэм тIогъогогъо врач къыт­фэкIо. Ар щымыIэ хъумэ, ащ ипшъэрылъхэр сэгъэцакIэх. ПIэкIори 10-м телъытагъэу сымаджэхэм мафэрэ амбулаторием тыщяIэзэн тэлъэкIы. Ахэм япсауныгъэ зыпкъ иуцожьыгъэу къызытаIокIэ, лъэшэу тигуапэ мэхъу, джащыгъум ти­шIуагъэ зэрядгъэкIышъугъэр къыдгурэIо. Сымаджэр бэ, уз хьылъэ ыкIи мы­хъу­жьын уз зиIэхэри ахэтых. Ахэр зэкIэ тигукIэгъу, тиIэпыIэгъу щэгугъых.

МашинакIэ къытатыгъ, арышъ, сыма­джэхэр Кощхьаблэ нэс тымыгъакIохэу район сымэджэщым епхыгъэ аптекэм Iэзэгъу уцхэр къафитэщы, ахэм лъэпIэ дэдэхэр ахэт. Арэу щытми, тфекъу, игъом аIэкIэтэгъахьэх. Ащ нэмыкIэу, IэпыIэгъу псынкIэм къеджагъэхэу, ау такъикъ 40-м къыкIоцI ахэр къемыо­лIагъэхэ хъумэ, къытфытеохэшъ, тэкIо, IэпыIэгъу ятэгъэгъоты.

Амбулаториер дэгъоу зэтегъэпсы­хьагъ, илъэс заулэкIэ узэкIэIэбэжьмэ мыщ гъэцэкIэжьын дэгъухэр рашIылIагъэх. Медицинэ пкъыгъохэр, Iэмэ-псымэхэр зэкIэ яIэх. Арэу щытми, Мирэ зыгъэгумэкIэу къытиIуагъэр IофышIэхэм зэращыкIэхэрэр ары.

Мирэ илIакъокIэ Блащэпсынэ Хьаткъохэм ащыщ, ятэу Мухьажьыр, янэу Тхьабысым Царицэ дунаим ехыжьыгъэх, Тхьэм джэнэт къарет. Ишъхьэгъусэу Азраильрэ ежьыррэ сабыищ зэдапIугъ, щыIэныгъэ гъогум тырагъэхьагъэх. Фатимэрэ, Аслъанбэчрэ врачых, Азэмат сурэтышIэу Лъэпкъ музеим Iоф щешIэ.

Къоджэдэсхэм Мирэ шIу алъэгъу, гукIэгъуныгъэу хэлъым, исэнэхьат зэрэ­фэ­шъыпкъэм афэшI шъхьэкIэфэныгъэшхо фашIы.

Зылэжьэрэ илъэсхэм къакIоцI чIыпIэ къин ифагъэу бэрэ къызэрэхэкIыгъэр тигущыIэгъу къеIо, ау мы IофшIэныр чIидзыжьынышъ, нахь зыщырэхьатыщтым, нахьыбэ къызщилэжьыщтым зигъэзэжьынэу ыгу къихьагъэп.

— СиIэзапIэ сыфэщагъ, — еIо Мирэ. — ЦIыфхэр дэгъоу сэшIэх, сашIэ, ащ мэхьанэшхо иI. IэпыIэгъу зищыкIагъэм узэрэдеIэшъущтыр, ипсауныгъэ, ары пакIошъ, ищыIэныгъэ о пIэ зэрилъыр зэхапшIэмэ, сыд икъиныгъэми, уисэнэхьат уфэшъыпкъэщт, уиIофшIэн рэзэныгъэ хэпхыщт.

КIАРЭ Фатим.