КъокIыпIэм щы­псэурэ лъэпкъхэм яискусствэкIэ Къэралыгъо музеим и Темыр-Кавказ къутамэ къэгъэлъэгъонэу «Археология. Искусство» зыфиIорэр тыгъэ­гъазэм и 22-м къыщызэIуахыгъ.

Къэгъэлъэгъоным хэхьагъэх археологие пкъыгъуи 120-рэ фэдиз, АР-м исурэтышI IэпэIа­сэхэу Къат Теуцожь, Тыгъужъ Махьмуд, ЛэупэкIэ Нурбый, Быр­сыр Абдулахь ыкIи Сергей Филатовым яIофшIагъэхэм ащыщ­хэр, музеим ифонд къы­хэхыгъэхэр.

Музеим ипащэу ШъэуапцIэкъо Аминэт Iофтхьабзэр къызэIуихызэ къыIуагъ: «Къэгъэлъэ­гъоным тарихъ хъугъэ-­шIагъэхэм уахещэ. Археологием ишIуагъэ­кIэ адыгэхэм яблэ­кIыгъэ чыжьэ ыкIи пкъыгъо зэфэшъхьафхэм яшъэфыбэ зэрагъэунэфыгъэр цIыфэу къе­кIолIагъэмэ нафэ афэхъущт».

«СурэтышI пэпчъ илъэпкъ ынапэ къырегъэлъэгъукIы, лъэуж хэгъэунэфыкIыгъэ къегъэнафэ, — къыIуагъ АР-м изаслуженнэ сурэтышIэу ЛэупэкIэ Нурбый, — непэ шъуинэрылъэгъу IофшIагъэхэм псэ зэрапытыр. ЧiычIэгъым къычIахыгъэ пкъыгъо пэпчъ тарихъ гъэшIэгъон пылъ».

IэпэIасэхэм яIофшIагъэхэм ахэм ягупшысэхэм уахащэ, чIыопсым зэпхыныгъэу дыряIэр ахэолъагъо. Дунаим идэхагъэ зэхэпшIэн плъэкIынэу уашIы. Лъэпкъым игъашIэ дэIорышIэхэзэ, IэпэIасэхэм ягупшысэхэр аIапэкIэ агъэчъынхэр афызэшIокIы.

Музеим ифонд щыщхэм, джащ фэдэу Кавказ археологическэ экспедициехэм 2022 — 2023-рэ илъэсхэм къагъотыгъэ пкъыгъо хьалэмэтхэм цIыфхэр нэIуасэ афашIынхэм, ахэм ядэхагъэ арагъэлъэгъуным къэгъэ­лъэгъоныр фытегъэпсыхьагъ.

Мэзаем и 1-м нэс къэгъэлъэ­гъоным Iоф ышIэщт.

Лъэпшъыкъо Фатим. Сурэтхэр авторым иех.