Аужырэ уахътэм Адыгеим икъоджэ щыIакIэ зэхапшIэу мэкIэжьы, ныбжьыкIэхэми, нахьыжъыIохэми ашIогъэшIэгъоны хъущт лъэныкъохэр лъэхъаным диштэу зэтырагъэпсыхьэх. Тичылагъохэр нэкIы мыхъунхэмкIэ, къэлэ щыIакIэм дегъэштэгъэнхэмкIэ амалхэр гъэфедагъэ мэхъух. Ахэм зэу ащыщ культурэм епхыгъэ лъэныкъор зэтегъэпсыхьэгъэныр.

Лъэпкъ проектэу «Культурэм» ифедеральнэ проектэу «Культурная среда» зыфиIорэм къыхиубытэу къуаджэу Хьалъэ­къуае культурэм и Унэ щашIы. ЗытырашIыхьэрэ чIыпIэм квадрат метрэ 812-м ехъу иинагъ, унэм квадрат метрэ 666-м нахьыбэ илъ, ащ щыщэу шIуагъэ къэзытынэу хэлъ Iахьыр — квадрат метрэ 597,27-рэ. КъекIуалIэхэрэр зычIагъэтIысхьащт концерт гъэлъэгъуапIэм нэбгырэ 250-рэ чIэфэщт.

— ПсэолъэшIыныр илъэситIумэ ателъытагъ. ЗэкIэмкIи бюджет мылъкоу пэIуагъэхьащтыр сомэ миллион 76,2-рэ, ащ щыщэу федеральнэм къы­хэкIыщтыр сомэ миллион 74,6-рэ, республикэ ыкIи чIыпIэ бюджетхэм – сомэ мин 800 зырыз. Мы илъэсым сомэ миллион 38,3-рэ афатIупщы­гъахэу агъэфедэ, IофшIэнхэр къаухынхэу загъэ­нафэрэр къихьащт илъэсым мэзаем и 25-р ары,— къыщаIотагъ АР-м культурэмкIэ и Министерствэ.

Джырэ уахътэм ехъулIэу лъакъом, псырыкIуапIэхэм ягъэ­псын, джэхашъом игъэчъын, дэпкъхэм ягъэфэбэн ыкIи ягъэдэхэжьын адэлэжьэгъахэх, унашъхьэр тыралъхьанэу рагъэжьагъ, мыщ дакIоу инженер псэуалъэхэр ыкIоцIкIэ зэбгыращых, зэтырагъэпсыхьэ, нэмыкI IофшIэнхэри зэшIуа­хых. Непэрэ мафэм ехъулIэу техническэ ухьазырыныгъэр процент 65-рэ мэхъу.

Тикультурэ – Адыгеир пстэуми дахэкIэ къахэзыгъэщыхэрэм ащыщ. Ар джыри зэ къыщынэфагъ «Урысыер» зыфиIорэ къэгъэлъэгъон-форумым. IэпэIасэхэр, орэдыIо ыкIи къэшъо­кIо купхэм ахэтхэр — мы зэпстэуми ныбжьыкIэхэзэ къыздаштэгъэ Iоф зыпылъхэр. Адыгеим и ЛIышъхьэу КъумпIыл Мурат форумым гущыIэу къыщишIыгъэм къызэрэщыхигъэщыгъэмкIэ, аужырэ илъэси 6-м къыкIоцI республикэм культурэм иунэу 9 кIэу къиуцуагъ. Мыхэр къоджэдэс ныбжьыкIэхэмкIэ кIуапIэ мэхъух, ясэнаущыгъэ къащызэIуахы, тапэкIи тикультурэ зэраIэтыщтым ущыгугъы хъущт.

МэшIодз Саид. Сурэтхэр; АР-м культурэмкIэ и Министерств ⁣ ⁣