Адыгэ Республикэм и ЛIышъхьэу КъумпIыл Мурат япащэу медицинэ координаторхэм якъу­лыкъу изэхэщэнкIэ про­ектэу реабилитацием илъэхъан цIыфхэм Iэпы­Iэгъу ягъэгъотыгъэным тегъэпсыхьагъэр зэхагъэ­уцуагъ ыкIи агъэцэкIагъ.

Социальнэ унашъохэм яакселераторэу автоном мысатыу организациеу «ПроектыкIэхэм япхырыщынкIэ стратегическэ гукъэкIхэмкIэ Агентствэм» зэхищагъэм къыдыхэлъытагъэу Iофхэр зэшIуахыгъэх. Республикэм илъэсрэ проектым Iоф дишIагъ. Стратегическэ гукъэкIхэмкIэ Агентствэм ирейтингкIэ социальнэ унэшъо анахь дэгъуи 10-мэ ахалъытагъэм экспертхэм къыдырагъэ­штагъ. Социальнэ унашъохэм яакселератор икIэух тыгъэгъазэм и 12-мрэ и 13-мрэ Москва щыкIуагъ. Хэгъэгум ишъолъыр 30-мэ якупхэр ащ хэлэжьагъэх. Къэралыгъо фэIо-фашIэхэр на­хьышIоу гъэцэкIэгъэнхэмкIэ унэшъо 64-рэ къырахьылIагъ. Адыгеим ипроектэу «Реабилитация» зыфиIорэр анахь дэгъухэм ахалъытагъ.

Адыгеим ишъолъыр сервиснэ уполномоченнэ къепхыгъэ купымрэ респуб­ликэм ихэбзэ къулыкъухэмрэ Iоф зыдашIагъэр уз хьылъэ къызэутэлIагъэхэм, гущыIэм пае, инсульт хъугъэхэм е гъогум техъухьэгъэ тхьамыкIагъом шъобж хэзыхыгъэхэм япсауныгъэ зэтегъэуцожьыгъэнымкIэ медицинэ IэпыIэгъу икъу ягъэгъотыгъэныр ары. Мыекъопэ къэлэ сымэджэщым реабилитациемкIэ иотделение иIофхэм язытет ахэм зыщагъэгъозагъ, сымаджэхэр зэутэлIэрэ Iофыгъо шъхьаIэхэр къыхагъэщыгъэх.

Нафэ къызэрэхъугъэмкIэ, Iофыгъо шъхьаIэхэм ащыщ сэкъатныгъэ зэряIэр къэзыушыхьатырэ тхылъхэр къаратынхэмкIэ е реабилитациемкIэ къэбархэр икъоу сымаджэхэм зэраIэкIэмыхьэхэрэр ары. Ащ епхыгъэу игъо алъэгъугъ сымэджэщым реабилитациемкIэ иотделение джыри зы IофышIэ — медицинэ координатор аштэнэу. Реабилитацием илъэхъан ащ сымаджэхэми, ахэм яIахьылхэми ишIуагъэ аригъэкIыщт.

«РеабилитациемкIэ отделением чIэ­фэрэ цIыфым реабилитацие ужым зыз­дигъэзэщтыр ышIэрэп. Медицинэ координаторым иставкэ зыкIагъэнэфагъэр, сэкъатныгъэ зэряIэр къэзыушыхьатырэ тхылъхэр агъэхьазырхэ, медицинэ, социальнэ IэпыIэгъу арагъэгъоты зыхъукIэ, сымаджэхэм ишIуагъэ аригъэкIынэу ары», — къыIуагъ шъолъыр сервиснэ уполномоченнэу Тазэ Бэллэ.

Медицинэ координаторхэм якъулыкъу изэхэщэн фэгъэхьыгъэ унашъор мы илъэсым ичъэпыогъу Адыгэ Республикэм IофшIэнымрэ социальнэ хэхъоныгъэм­рэкIэ и Министерствэ, АР-м псауны­гъэр къэухъумэгъэнымкIэ и Министерствэ, федеральнэ учреждениеу «Медикэ-социальнэ экспертизэмкIэ Адыгэ Респуб­ликэм икъэралыгъо бюро» аштагъ. Мы илъэсым ичъэпыогъу къыщегъэжьагъэу медицинэ координаторым Мыекъопэ къэлэ клиникэ сымэджэщым реабилитациемкIэ иотделение Iоф щешIэ. Отделением къычIатхыкIыжьырэм ежь-ежьырэу терапевтым дэжь заригъэтхын фаеу ыпэкIэ щытыгъэмэ, джы ащ фэгъэза­гъэр медицинэ координаторыр ары. Сыма­джэм исоциальнэ статус игъэнэфэн епхыгъэ анкетэхэм язэхэгъэуцонкIи ар IэпыIэгъу афэхъу.

«Участковэ терапевтым ыштэным сымаджэр зэрежэрэр фэди 5,5-кIэ нахь макIэ хъугъэ. ЫпэкIэ мэфэ 22-рэ ащ ежэщтыгъэмэ, джы мэфи 4-м нэсэу къеIыхыгъ. Сэкъатныгъэ зиIэхэм медицинэ уплъэкIунхэм уахътэу атырагъэкIуа­дэрэми фэди 4-кIэ къыкIичыгъ. Ахэм мэзитIу фэдиз ыпэкIэ апылъыщтыгъэ­хэмэ, джы тхьамэфитIум нэсэу къеIы­хыгъ. Реабилитацие ужым участковэ терапевтыр IэпыIэгъу зыфэхъухэрэм япчъагъэ процент 77-кIэ нахьыбэ хъугъэ», — къыIуагъ АР-м и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Хъот­къо Саниет.

Стратегическэ гукъэкIхэмкIэ Агентствэм игенеральнэ пащэу Светлана Чупшевам шъолъырхэм япащэхэм, ахэм ягуадзэхэм, министрэхэм «тхьашъуегъэ­псэу» ариIуагъ сервиснэ уполномоченнэхэм якъулыкъу изегъэушъомбгъун чанэу зэрэпылъхэм афэшI.

«ГъэрекIо федеральнэ гупчэм унэ­шъуабэмэ ынаIэ къатыридзагъ. Джы ахэр къызщыхахыгъэ шъолъырхэм ямызакъоу, нэмыкIхэми ащагъэцакIэх. Федеральнэ шэпхъэ базэм ахэр хэгъэхьэгъэнхэм иIофыгъуи тегущыIэх», — къы­Iуагъ Агентствэм игенеральнэ пащэ.

АР-м и ЛIышъхьэу КъумпIыл Мурат зэрэхигъэунэфыкIыгъэмкIэ, тиреспубликэ стратегическэ гукъэкIхэмкIэ Агентствэм зэдэлэжьэныгъэу дыриIэм нахь зыригъэ­ушъомбгъущт.

«Тэ Iофэу тшIэрэр зэкIэ зытегъэ­псыхьагъэр цIыфхэм ящыIэкIэ-псэукIэ зыкъегъэIэтыгъэныр ары. Сервиснэ упол­номоченнэхэм ясоциальнэ проектхэм ащ фэдэ гухэлъым тыфащэ. Стратегическэ гукъэкIхэмкIэ Агентствэм амалэу къытитыхэрэр зэкIэ къызфэдгъэфедэщтых. Шъолъыр сервиснэ уполномоченнэхэм якъулыкъуи тэри тишъыпкъэу тызыпылъы­щтыр цIыфхэм яфэныкъоныгъэхэм апшъэ­рэ мэхьанэ ятыгъэныр, щыIэкIэ-псэукIэр нахьышIу шIыгъэныр ары», — къыIуагъ республикэм ипащэ.

АР-м и ЛIышъхьэ ипресс-къулыкъу