Адыгеим и ЛIышъхьэу КъумпIыл Мурат Урысыем и Президент иегъэблэгъапIэ къалэу Мыекъуапэ, Джэджэ ыкIи Мыекъопэ районхэм ащыпсэухэрэм щаIукIагъ. КъекIолIагъэхэм къаIэтыгъэ Iофыгъохэм социальнэ мэхьанэ зиIэхэр ащыщых: инфраструктурэм хэхъоныгъэ егъэшIыгъэныр, чIыпIэхэр зэтегъэпсыхьэгъэнхэр, кIэлэцIыкIу IыгъыпIэхэр гъэцэкIэжьыгъэнхэр ыкIи нэмыкIхэр.

Мы Iофтхьабзэм хэлэжьагъэх Урысые Федерацием и Президент иприемнэу АР-м щыIэм ипащэу, федеральнэ инспектор шъхьаIэу Сергей Дрокиныр, АР-м ипрокурорэу Игорь Шевченкэр. Мыекъуапэ щыпсэурэ бзылъфыгъэр къыкIэлъэIугъ Свято-Троицкэ кафедральнэ чылысым ылъэныкъокIэ урамхэм якъэгъэ­нэфын нахьышIу шIыгъэнымкIэ ишIуагъэ къыригъэкIынэу. Чылысым дэжь икъоу зэрэмынэфынэм къыхэкIэу автотранспортым изе­кIонкIи, ащ къыпэблэгъэ еджапIэхэм кIэлэеджакIохэр якIолIэнхэмкIи къиныгъо гъэнэфагъэхэр щыIэ мэхъух.

Мыекъуапэ имэрэу Геннадий Митрофановым къызэриIуагъэмкIэ, 2024-рэ илъэсым урамхэм якъэгъэнэфын изытет уахътэм нахь диштэу шIыгъэным къыды­хэлъытагъэу а чIыпIэу зигугъу къашIыгъэр Iофтхьэбзэ тедзэу зэшIуахыщтхэм ахагъэхьагъ. Ащ пае ищыкIэгъэ мылъкури къагъо­тыгъ. Мы лъэхъэнэ благъэхэм а Iофыгъор зэшIуахын мурад яI.

Республикэм и ЛIышъхьэ лъэс гъогухэр, транспорт уцупIэхэр ыкIи а лъэныкъомкIэ щыIэ тучан­хэр нахь зэтегъэпсыхьэгъэнхэм къалэм ипащэ ынаIэ тыридзэнэу фигъэпытагъ.

«А чIыпIэр къалэм нахь Iужъоу цIыфхэр зыщызэхэсхэм ащыщ, арышъ ащ изэтегъэпсы­хьан лъэныкъо пстэумкIи зэдиштэу къекIолIэгъэным мэхьэнэ гъэнэфагъэ иIэу сэлъытэ», — къы­Iуагъ КъумпIыл Мурат.

Джэджэ районым ипсэупIэу Гончаркэм къикIыгъэ бзылъфыгъэм илъэIу зыфэгъэхьыгъагъэр кIэлэцIыкIу IыгъыпIэу «Березкэм» иэлектричествэ рыкIуапIэ игъэцэкIэжьын ары. Муниципальнэ образованием ипащэу Андрей Таранухиным къызэриIуагъэмкIэ, илъэсэу къихьащтымкIэ район бюджетым а гухэлъхэм апэIуагъэхьанэу сомэ мин 800-м ехъу къыщыдалъытагъ. Гъэмэфэ зыгъэпсэфыгъохэм ауж IофшIэныр аухын мурад яI. ХэушъхьафыкIыгъэу КъумпIыл Мурат муниципалитетым ипащэ анахьэу ынаIэ зытыраригъэдзагъэхэм ащыщ псэупIэр джыри нахь зэтегъэпсыхьэгъэным, инфраструктурэ псэолъэ заулэ гъэ­кIэжьыгъэным япхыгъэ Iофы­гъохэр.

«ПсэупэIу Гончаркэм чыжьэу зыцIэ Iугъэ дендропаркыр дэт. ЗекIоным хэхъоныгъэ егъэшIыгъэным пае Iофтхьэбзабэ зэшIотэхы, арышъ, инфраструктурэ Iофыгъохэу зекIохэр нахьыбэу къихьанхэм, цIыфхэм ящыIакIэ нахьышIу шIыгъэным япхыгъэу щытхэм муниципалитетым икъоу анаIэ щатырагъэтын фае», — къыIуагъ КъумпIыл Мурат.

Джэджэ районым къикIыгъэ хъулъфыгъэр къызкIэлъэIугъэр псэупIэу Джаджэм иурамэу Центральнэм энергиер къызэрэIэкIэхьэрэ Iофым изытет ары. БэшIагъэ электричествэ рыкIуапIэхэр мыщ щызэблэхъугъэнхэ зэрэфаем иIоф цIыфхэр зигъэгумэкIыхэрэр. Районым ипащэ республикэм и ЛIышъхьэ къыфиIотагъ ПАО-у «Россети Кубань» зыфиIорэм ибаланс а линиер зэрэхагъэуцуагъэм фэгъэхьыгъэу. Республикэм и ЛIышъхьэ компанием идирекцие телефонымкIэ зэдэгущыIэгъу зыдешIым 2024-рэ илъэсым мэлылъфэгъум ехъулIэу электричествэ рыкIуапIэм игъэкIотыгъэ гъэцэкIэжьын IофшIэнхэр рашIылIэнхэу зэрагъэнэфагъэр къыриIуагъ. Амал зэриIэкIэ а IофшIэнхэр агъэпсынкIэщтых.

Мыекъопэ районым ипсэупIэу Каменномостскэм щыщ хъулъфыгъэр зыщыпсэурэ унэм гъэс­тыныпхъэ шхъуантIэр ещэлIэгъэ­ным иIофыгъокIэ къыдеIэнэу Адыгеим и ЛIышъхьэ зыкъыфигъэзагъ. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром меж­регионгаз Майкоп» зыфиIорэм игенеральнэ пащэу ЕкъутэкI Аслъан къызэриIуагъэмкIэ, гъэстыныпхъэ шхъуантIэр аIэкIэгъэ­хьэгъэнымкIэ зэзэгъыныгъэу зэдашIыгъэм къызэрэдыхэлъытагъэм тетэу проект-лъыхъон ыкIи псэолъэшI-монтаж IофшIэнхэр зэшIуахыгъэх. Мы лъэхъэнэ благъэхэм унэ кIоцIым ит газ Iэмэ-псымэм итехническэ фэIо-фашIэхэм ягъэцэкIэн епхыгъэ зэзэгъыныгъэр зэдашIыщт ыкIи газыр афатIупщыщт.

«Гъэстыныпхъэ шхъуантIэр зыIэкIэгъэхьэгъэн фэе унэхэм нахьыбэу тынаIэ атедгъэтын фае. МыщкIэ федеральнэ программэхэр ыкIи цIыфхэм IэпыIэгъу ятыгъэнымкIэ шIыкIэ-амал зэфэшъхьафэу щыIэхэр нахь шIогъэ икъу хэлъэу гъэфедэгъэнхэм мэхьэнэ гъэнэфагъэ иIэу щыт», — къыIуагъ КъумпIыл Мурат.

ЗэIукIэгъум икIэуххэр зэфихьысыжьхэзэ республикэм и ЛIышъхьэ къызэрэхигъэщыгъэмкIэ, цIыфхэр зыгъэгумэкIхэрэ Iофыгъохэм язэшIохынкIэ теурыкIуагъэ къызхагъафэ хъущтэп, пIэлъэ кIэкIым къыкIоцI ахэр зэшIохыгъэ хъунхэм зэкIэми тынаIэ тедгъэтын фае. Непэ мыщ къекIолIэгъэ пстэуми къаIэтыгъэ Iофыгъохэр зэшIохыгъэ хъунхэм пае ахэр зэпхыгъэ лъэныкъохэм япащэхэм пшъэрылъ афишIыгъ зэрищыкIагъэм тетэу анаIэ атырагъэтынэу.

АР-м и ЛIышъхьэ ипресс-къулыкъу