АР-м хэдзынхэмкIэ и Гупчэ комиссие итхьаматэу Сэмэгу Нурбый журналистхэм аIукIэгъагъ. УФ-м и Президент ихэдзынхэу къихьащт 2024-рэ илъэсым игъэтхэпэ мазэ щыIэщтхэр ары пресс-конференциер зыфэгъэхьыгъагъэр.

Журналистхэм яупчIэхэм джэуапхэр къаритыжьзэ, Сэ­мэгу Нурбый хэдзынхэм язэхэщэнкIэ шапхъэу хэбзэгъэуцугъэм къыдэ­лъытагъэхэм кIэу къахэхьагъэ­хэм къатегущыIагъ. Ащ къызэриIуагъэмкIэ, джы ахэр зыщыIэщтхэм ыпэкIэ комиссиехэм ахэтхэм унагъо пэпчъ къакIухьэзэ хэдзынхэм ахэлэжьэнэу зы­ныбжь икъугъэхэм унэм имыкI­хэу амакъэхэр атыныр нахьышIоу алъытэмэ, хьауми участкэм екIолIэщтхэмэ зэрагъэшIэщт. Шъхьадж ишIоигъоныгъэ къыдэлъытагъэу, хэдзынхэр зыщыкIощтхэ мафэхэм унэм исмэ зышIоигъохэм якIолIэщтых. Хэдзынхэр 2024-рэ илъэсым гъэтхапэм и 15 — 17-м щыIэщтых. Мэзаем и 17-м щегъэжьагъэу унагъохэр къакIухьанхэу рагъэжьэщт, гъэтхапэм и 7-м а IофшIэнхэр аухыщтых. Нэбгырэ миным ехъумэ а пшъэ­рылъыр агъэцэкIэщт.

НахьыпэкIэ зэрэщытыгъэу, хэдзынхэр зыщыкIощтхэ мафэ­хэм ихэдзыпIэ участкэ екIолIэн е унэм исэу ымакъэ ытын амал зимыIэщтхэм нэмыкI чIыпIэ щатын алъэкIыщт. Ахэм пэшIоры­гъэшъэу лъэIу тхылъэу къатыщтхэри къихьащт илъэсым имэзаем и 29-м щыублагъэу гъэтхапэм и 11-м нэс участковэ комиссиехэм аштэщтых.

Электроннэ мэкъэтыныр кIэу щыIэныгъэм къыхэхьагъэхэм ащыщ. Журналистхэр ар респуб­ликэм щагъэфедэщтмэ къыкIэ­упчIагъэх. Сэмэгу Нурбый къы­зэриIуагъэмкIэ, ащ изэхэщэн лъэныкъо пстэумкIи фэхьазырых, ау Урысыем исубъект 30-у зыщыпхыращыхэрэм Адыгеир джыри ахагъэхьагъэп. Игъорыгъоу къэралыгъор электроннэ мэкъэтыным игъэфедэн техьэ.

— Къыхэзгъэщымэ сшIоигъор, хэдзынхэр зэфагъэ ахэлъэу, щынэгъончъэу зэхэщэгъэнхэм, цIыфхэм яшIоигъоныгъэхэр къы­дэлъытэгъэнхэм афэшI илъэс къэс кIэу шапхъэхэм зыгорэ къахагъахьэ, — къыIуагъ Сэмэгу Нурбый. — Республикэми ахэр икъоу щыпхырыщыгъэнхэм лъэшэу ынаIэ тет. Мары гущыIэм пае, АР-м и ЛIышъхьэ пшъэрылъ къышIыгъэу унагъохэр къэзыкIухьащтхэм ялэжьапкIэ пэIухьащт ахъщэ тедзэр къытфатIупщыгъ. Муниципальнэ образованиехэр транспорткIэ, нэмыкI лъэныкъохэмкIэ къыддеIэнхэуи пшъэрылъ ащ ипащэхэм афишIыгъ.

Адыгеим пстэумкIи хэдзыпIэ участкэ 265-рэ иI, Президентым ихэдзынхэм апае Мыекъуапэ дэт сымэджэщхэм ащыщэу 3-мэ къащызэIуахыщт. Бюллетеньхэр къызэралъытэрэ комплексэу 41-рэ пстэумкIи яI. Ахэм ащыщэу 25-р шэпхъакIэхэм атетэу кIэу къыдагъэкIыгъэхэм афэдэх.

ПстэумкIи хэдзынхэм ахэлэжьэнхэм аныбжь нэсыгъэу Адыгеим нэбгырэ 342633-рэ ис. Ахэм япроцент 40-р зыщыпсэурэр къалэу Мыекъуап.

ХЪУТ Нэфсэт.